Aịzaya 65:1-25
65 “Emeela m ka ndị na-ajụghị ajụjụ m chọta m.
Emeela m ka ndị na-achọghị m chọta m.+
Agwara m mba na-anaghị akpọku aha m, sị, ‘Lekwanụ m, lekwanụ m!’+
2 Ana m agbasara ndị dị isi ike aka m mgbe niile.+
Ha na-eje ije n’ụzọ na-adịghị mma,+Na-emekwa ihe ọ bụla gbatara ha n’obi.+
3 Ha na-akpasu m iwe mgbe niile n’asọghị anya,+Na-achụ àjà n’ubi,+ na-esukwa àjà ọkụ n’elu brik.
4 Ha na-anọdụ ala n’ebe ili dị iche iche dị,+Na-arahụ ụra abalị n’ebe ndị zoro ezo.*
Ha na-eri anụ ézì.+
Ofe e ji ihe rụrụ arụ* sie dịkwa n’ite ha.+
5 Ha na-asị, ‘Nọọrọ onwe gị. Abịala m nso,N’ihi na adị m nsọ karịa gị.’*
Ha na-akpasu m iwe mgbe niile.* Ha dịkwa ka ọkụ na-ere malite n’ụtụtụ ruo n’abalị.
6 A nọ n’ihu m dee ihe ndị a.
Agaghị m agbachi nkịtị,Kama m ga-ata ha ahụhụ.+
M ga-ata ha ahụhụ maka ihe ọjọọ niile ha mere.*
7 M ga-ata ha ahụhụ a n’ihi mmehie ha nakwa n’ihi mmehie ndị nna nna ha mere.”+ Ọ bụ Jehova kwuru ihe a.
“M ga-ebu ụzọ taa ha ahụhụ maka ihe ọjọọ niile ha mere,*N’ihi na ha na-esu àjà ọkụ n’elu ugwu ukwu dị iche iche,+Na-akọchakwa m n’elu ugwu nta dị iche iche.”
8 Jehova kwuru, sị:
“Ọ na-abụ mmadụ hụ ụyọkọ mkpụrụ vaịn nke ga-agbapụta mmanya ọhụrụ,Ya asị, ‘Emebila ya, n’ihi na ihe dị mma* dị n’ime ya.’
Otú ahụkwa ka m ga-emere ndị ohu m.
M gaghị ebibi ha niile.+
9 M ga-eme ka otu nwa* fọdụrụ Jekọb,Meekwa ka e nwee onye si na Juda ga-eketa ugwu m.+
Ndị m họọrọ ga-enweta ya.
Ndị ohu m ga-ebikwa ebe ahụ.+
10 M ga-eji maka ndị m, bụ́ ndị ga-achọ m,Mee ka Sharọn+ ghọọ ebe atụrụ ga na-ata ahịhịa,Meekwa ka Ndagwurugwu Ekọ+ ghọọ ebe ehi ga na-ezu ike.
11 Ma unu na-ahapụ Jehova,+Na-echefu ugwu nsọ m,+Na-edozi tebụl maka chi Ihu Ọma,Na-agbajukwara chi Akara Aka mmanya a gwara agwa.
12 M ga-enyefe unu n’aka mma agha.+
Unu niile ga-ehulatakwa ala ka e gbuo unu,+N’ihi na m kpọrọ unu òkù, ma unu azaghị.
Agwara m unu okwu, ma unu egeghị ntị.+
Unu nọ na-eme ihe dị njọ n’anya m.
Unu họkwaara ịna-eme ihe na-adịghị mụ mma.”+
13 N’ihi ya, Ọkaakaa Onyenwe anyị Jehova kwuru, sị:
“Ndị ohu m ga na-eri ihe, ma agụụ ga na-agụ unu.+
Ndị ohu m ga-ahụ ihe ha ga na-aṅụ,+ ma akpịrị ga na-akpọ unu nkụ.
Ndị ohu m ga na-aṅụrị ọṅụ,+ ma ihere ga na-eme unu.+
14 Ndị ohu m ga-eti mkpu ọṅụ n’ihi na obi dị ha mma,Ma unu ga-eti mkpu ákwá n’ihi na obi na-agbawa unu.
Unu ga-ebekwa ákwá n’ihi na ike ụwa agwụla unu.
15 Aha ọjọọ unu ga-enwe ka ndị m họọrọ ga-eji na-abụ mmadụ ọnụ.
Ọkaakaa Onyenwe anyị Jehova ga-egbukwa unu n’otu n’otu.
Ma, ọ ga-agụ ndị ohu ya aha ọzọ.+
16 Ihe a ga-eme ka onye ọ bụla nke chọrọ ka a gọzie ya n’ụwaRịọ Chineke, onye na-ekwu eziokwu,* ka ọ gọzie ya.
Ọ ga-emekwa ka onye ọ bụla nke na-aṅụ iyi n’ụwaJiri Chineke, onye na-ekwu eziokwu,* ṅụọ iyi.+
N’ihi na ha ga-echefu ahụhụ niile ha tara.*
M gaghị eji anya m ahụ ahụhụ ndị ahụ ọzọ.+
17 N’ihi na m na-eke eluigwe ọhụrụ na ụwa ọhụrụ.+
A gaghịzi echeta ihe niile mere na mbụ.
Ha agaghị abatakwa n’obi.+
18 N’ihi ya, ṅụrịanụ ọṅụ, ka obi dịkwa unu ụtọ ruo mgbe ebighị ebi maka ihe m na-eke.
N’ihi na m na-eke Jeruselem ka e jiri maka ya na-aṅụrị ọṅụ.
M na-ekekwa ndị bi na ya ka e jiri maka ha na-enwe obi ụtọ.+
19 M ga-aṅụrịkwa ọṅụ n’ihi Jeruselem. Obi ga-adịkwa m ụtọ n’ihi ndị m.+
A gaghịzi na-anụ ụda ákwá ma ọ bụ ụda ákwá arịrị na Jeruselem.”+
20 “A gaghịzi enwe nwa ọhụrụ ga-anọ naanị ụbọchị ole na ole nwụọ n’ebe ahụ.
A gaghịkwa enwe agadi nke na-akaghị ezigbo nká nwụọ.
N’ihi na onye nwụrụ mgbe ọ dị otu narị afọ ka bụ nwata.
Ọ bụrụgodị na onye mmehie dị otu narị afọ, ọ ga-anwụ n’ihi ọnụ a bụrụ ya.*
21 Ha ga-arụ ụlọ, birikwa na ha.+
Ha ga-akọ ubi vaịn, rie ihe si na ya.+
22 Ha agaghị arụ ụlọ, onye ọzọ ebichie ya,Ha agaghị akụ mkpụrụ, onye ọzọ erie ihe si na ya.
N’ihi na ndị m ga-anọ ogologo ndụ otú osisi si anọ.+
Ndị m họọrọ ga-eji ihe aka ha rụpụtara mee ihe n’uju.
23 Ha agaghị arụsi ọrụ ike na nkịtị,*+Ha agaghịkwa amụ ụmụ mụta nsogbu,N’ihi na ha na ụmụ haBụ ụmụ* Jehova gọziri agọzi.+
24 Tupudị ha akpọkuo m, m ga-aza ha.
Mgbe ha ka kpụ okwu n’ọnụ, m ga-eme ihe ha na-arịọ.
25 Anụ ọhịa wolf na nwa atụrụ ga na-atakọ ahịhịa.
Ọdụm ga na-ata okporo ọka dị ka ehi.+
Ájá ga-abụ nri agwọ.
Ha agaghị emerụ ihe ọ bụla ahụ́. Ha agaghịkwa emebi ihe ọ bụla n’ugwu nsọ m niile.”+ Ọ bụ Jehova kwuru ihe a.
Ihe E Dere n'Ala Ala Peeji
^ O nwere ike ịbụ, “n’obere ụlọ ndị ha na-anọ eche nche.”
^ Ma ọ bụ “ihe na-adịghị ọcha.”
^ O nwere ike ịbụ, “N’ihi na m ga-eme ka ị dị nsọ otú m dị.”
^ Na Hibru, “Ha bụ anwụrụ ọkụ bara m n’oghere imi.”
^ Na Hibru, “M ga-awụnye ụgwọ ọrụ ha n’obi ha.”
^ Na Hibru, “wụnye ụgwọ ọrụ ha n’obi uwe ha.”
^ Na Hibru, “ngọzi.”
^ Na Hibru, “mkpụrụ.”
^ Ma ọ bụ “na-eme ihe o kwuru.” Na Hibru, “Amen.”
^ Ma ọ bụ “na-eme ihe o kwuru.” Na Hibru, “Amen.”
^ Ma ọ bụ “nsogbu ha niile.”
^ O nwere ike ịbụ, “A ga-asị na mmadụ bụ onye a bụrụ ọnụ ma ọ bụrụ na ọ nọrughị otu narị afọ nwụọ.”
^ Ma ọ bụ “arụgbu onwe ha n’ọrụ n’efu.”
^ Na Hibru, “mkpụrụ.”
