Diuterọnọmi 33:1-29
33 Ihe a bụ ihe Mosis, bụ́ onye nke ezi Chineke, kwuru mgbe ọ na-agọzi ndị Izrel tupu ya anwụọ.+
2 Ọ sịrị:
“Jehova si na Saịnaị bịa.+
O sikwa na Sia nwukwasị ha ka ìhè.
O si na Peran bụ́ ugwu ugwu mee ka ebube ya nwuo ka ìhè.+
Ọtụtụ iri puku ndị mmụọ ozi* sokwa ya.+
Ndị agha ya nọkwa ya n’aka nri.+
3 Ọ hụrụ ndị ya n’anya.+
Ndị nsọ ha niile nọ n’aka gị.+
Ha nọ ọdụ n’ụkwụ gị.+
Ha malitere ige ntị n’okwu gị.+
4 (Mosis nyere anyị iwu,+Nke bụ́ ihe ọgbakọ Jekọb ketara.)+
5 Chineke wee bụrụ eze na Jeshurọn,*+Mgbe ndị isi ndị Izrel gbakọtara,+
Ha na ebo niile e nwere n’Izrel.+
6 Ka Ruben dị ndụ ma ghara ịnwụ,+Ka ụmụ nwoke si n’ebo ya ghara ịfọ ole na ole.”+
7 Ọ gọzikwara Juda, sị:+
“Jehova, biko, nụrụ olu Juda.+
Kpọrọ ya kpọghachitere ndị ya.
O jirila ike ya lụọ ọgụ maka ihe bụ́ nke ya,Biko, nyere ya aka lụso ndị iro ya ọgụ.”+
8 O kwuru banyere Livaị, sị:+
“Tọmịm gị* na Yurim+ gị bụ nke onye na-erubere gị isi,+Onye ị nwalere na Masa.+
Gị na ya malitere ịgba mgba na mmiri Meriba,+
9 Onye sịrị nne ya na nna ya, ‘E nweghị ihe m ji unu kpọrọ.’
Ọ kwadoghịdị ụmụnne ya.+
O leghaara ụmụ ya anya.
N’ihi na ha rubeere okwu gị isi,Ha mekwara ihe ndị e kwuru n’ọgbụgba ndụ gị na ha.+
10 Ka ha kụziere Jekọb ihe i kpebiri,+Kụziekwara Izrel Iwu gị.+
Ka ha mụnyere gị insens ọkụ ka ị nụrụ ísì ya+Ma chụọkwa onyinye a na-esucha ọkụ n’àjà n’ebe ịchụàjà gị.+
11 Jehova, biko, gọzie ya nye ya ike.
Ka ihe ọ na-eme meekwa gị obi ụtọ.
Kụjie ụkwụ* ndị na-alụso ya ọgụ,Ka ndị kpọrọ ya asị ghara ibili ọzọ.”
12 O kwuru banyere Benjamin, sị:+
“Ka onye Jehova hụrụ n’anya biri n’akụkụ ya, obi eruo ya ala.
Ọ ga-ebi n’agbata ubu ya abụọ,Ka ọ na-echebe ya ụbọchị niile.”
13 O kwuru banyere Josef, sị:+
“Ka Jehova gọzie ala ya.+
Ka o jiri ihe ndị dị mma dị n’eluigweNa igirigi na mmiri si n’ala agbapụta gọzie ala ya,+
14 Na ihe ọma dị iche iche anyanwụ na-eme ka ha puo,Na ihe ọma ndị na-amị n’ọnwa n’ọnwa,+
15 Na ihe kacha mma ndị si n’ugwu ndị dịwara kemgbe oge ochie,*+Na ihe ọma ndị si n’obere ugwu ndị na-adịte aka,
16 Na ihe ọma ndị dị n’ụwa na ihe ndị juru na ya.+
Ka Onye ahụ nke pụtara n’osisi ogwu+ kwadokwa ya.
Ka ha dịrị n’isi Josef,N’opu isi onye e si n’ụmụnne ya họrọ.+
17 Ebube ya dị ka nke oké ehi e bu ụzọ mụọ,Mpi ya bụkwa mpi atụ́.
Ọ ga-eji ha nuru* ndị dị iche iche,Nuru ha niile ruo na nsọtụ ụwa.
Ha bụ nke iri puku kwuru iri puku ndị agha Ifrem,+Ha bụkwa nke puku kwuru puku ndị agha Manase.”
18 O kwuru banyere Zebulọn, sị:+
“Zebulọn, ṅụrịa ọṅụ n’ahịa ị na-azụ,*Ịsaka, ṅụrịakwa ọṅụ n’ụlọikwuu gị.+
19 Ha ga-akpọ ndị dị iche iche ka ha bịa n’ugwu.
N’ebe ahụ, ha ga-eji ezigbo obi chụọ àjà.
N’ihi na ha ga-enweta akụ̀ dị ukwuu n’oké osimiri dị iche iche,Nwetakwa akụ̀ zoro ezo ndị juru n’ájá.”
20 O kwuru banyere Gad, sị:+
“A ga-agọzi onye na-eme ka Gad nwetakwuo ala.+
Ọ makpu n’ebe ahụ ka ọdụm.
Ọ dị njikere ịdọpụ ogwe aka ndị iro ya, dọpụkwa opu isi ha.
21 Ọ ga-ahọrọ òkè nke mbụ,+N’ihi na ọ bụ òkè onye na-enye iwu doweere ya.+
Ndị isi nke ndị ya ga-ezukọta.
Ọ ga-emere Jehova ihe dị mma,Meekwa ihe o kpebiri gbasara Izrel.”
22 O kwuru banyere Dan, sị:+
“Dan bụ nwa ọdụm.+
Ọ ga-esi na Beshan mapụta.”+
23 O kwuru banyere Naftalaị, sị:+
“Naftalaị ga-enwe obi ụtọ na Jehova meere ya amara,Gọziekwa ya n’ụba.
Weghara ala dị n’ebe ọdịda anyanwụ nakwa n’ebe ndịda.”
24 O kwuru banyere Asha, sị:+
“A ga-eji ụmụ gọzie Asha.
Ka ihe ya masị ụmụnne ya,Ka ọ zọnyekwa ụkwụ* ya na mmanụ.
25 Ígwè na ọla kọpa bụ ihe i ji akpọchi ọnụ ụzọ ámá gị.+
Obi ga-erukwa gị ala n’oge niile ị dị ndụ.
26 E nweghị onye dị ka ezi Chineke+ nke Jeshurọn,+Onye si n’eluigwe enyere gị aka,Onye nọkwa n’elu ígwé ojii n’ebube.+
27 Chineke bụ ebe mgbaba kemgbe oge ochie.+
O ji ogwe aka ya na-adịru mgbe ebighị ebi na-akwado gị.+
Ọ ga-achụpụrụ gị onye iro gị.+
Ọ ga-asịkwa, ‘Bibie ha!’+
28 Obi ga-eru Izrel ala n’ebe o bi.
Isi iyi Jekọb ga na-asọ n’enweghị ihe na-enye ya nsogbuN’ala nke na-emepụta ọka* na mmanya ọhụrụ,+Nke igirigi ga-esi na mbara igwe ya na-ada.+
29 Ndị Izrel, obi dị unu ụtọ.+
Ònye dị ka unu,+Unu ndị Jehova na-azọpụta,+Onye bụ́ ọta na-echebe unu+Na mma agha unu nke dị ebube?
Ndị iro unu ga-atụ egwu n’ihu unu,+Unu ga-azọkwa ha ụkwụ n’azụ.”
Ihe E Dere n'Ala Ala Peeji
^ Ma ọ bụ “Ọtụtụ iri puku ndị nsọ.”
^ Jeshurọn pụtara “Onye Ezi Omume.” Ọ bụ aha a na-etu Izrel.
^ “Gị” na “ị” dị n’amaokwu a nọchiri anya Chineke.
^ Ma ọ bụ “úkwù.”
^ O nwere ike ịbụ, “n’ugwu ndị dị n’ebe ọwụwa anyanwụ.”
^ Ma ọ bụ “sọọ.”
^ Na Hibru, “n’ọpụpụ gị.”
^ Ma ọ bụ “saa ụkwụ.”
^ Ọka a nwere ike ịbụ ọka wit ma ọ bụ ọka bali.