Akwụkwọ Ozi E Degaara Faịlimọn 1:1-25
1 Abụ m Pọl, onye a tụrụ mkpọrọ+ n’ihi Kraịst Jizọs. Mụ na Timoti,+ bụ́ nwanna anyị, na-edetara Faịlimọn, onye anyị hụrụ n’anya na onye ọrụ ibe anyị, akwụkwọ ozi,
2 ya na Afia, nwanna anyị nwaanyị, na Akịpọs,+ onye agha ibe anyị, nakwa ọgbakọ dị n’ụlọ+ Faịlimọn:
3 Ka Chineke Nna anyị nakwa Onyenwe anyị Jizọs Kraịst meere unu amara, meekwa ka udo dịrị unu.
4 Ana m ekele Chineke m mgbe niile m chetara gị n’ekpere m,+
5 n’ihi na m na-anụ gbasara okwukwe i nwere nakwa otú i si hụ Onyenwe anyị Jizọs na ndị nsọ niile n’anya.
6 Ekpere m bụ ka okwukwe gị na ndị ọzọ nwere mee ka ị ghọta ihe ọma niile anyị si n’aka Kraịst nweta.
7 N’ihi na m ṅụrịrị ezigbo ọṅụ mgbe m nụrụ otú i si hụ ndị ọzọ n’anya. O mekwara ka obi sie m nnọọ ike. Nwanna m, i meekwala ka obi sie ndị nsọ ike.
8 N’ihi ya, ọ bụ eziokwu na m nwere ike inye gị iwu n’aha Kraịst n’ezoghị ọnụ ka i mee ihe kwesịrị ekwesị,
9 ma, ọ ka mma ka m rịọ gị ka i mee ya n’ihi na ị hụrụ ndị ọzọ n’anya, ebe ị ma na mụnwa, bụ́ Pọl, emeela agadi, nakwa na a tụrụ m mkpọrọ ugbu a n’ihi Kraịst Jizọs.
10 Ana m arịọ gị ka i meere m otu ihe ọma gbasara Onesịmọs,+ onye m ji mere nwa+ ugbu a a tụrụ m mkpọrọ.*
11 Ọ baraghị gị uru n’oge gara aga, ma ọ baara mụ na gị uru ugbu a.
12 M na-ezilatara gị ya. Ọ bụ onye m hụrụ nnọọ n’anya.
13 M chọrọ ka mụ na ya nọrọ ebe a ka ọ na-ejere m ozi ị gaara ejere m ebe a a tụrụ m mkpọrọ n’ihi ozi ọma m na-ezisa.+
14 Ma, agaghị m eme ihe ọ bụla gbasara ya ma ọ bụrụ na i kweghị, ka ọ ghara ịbụ na m manyere gị ka i meere m ihe ọma, kama, ka ọ bụrụ na i ji obi gị niile mee ya.+
15 O nwere ike ịbụ ya mere o ji hapụtụ gị,* ka i nwee ike kpọrọghachi ya ruo mgbe ebighị ebi.
16 Ọ gaghịzi abụ naanị ohu gị,+ kama ọ ga-abụ onye karịrị ohu. Ọ ga-abụzi nwanna gị. M hụrụ ya nnọọ n’anya.+ Ma gịnwa ga-aka ahụ ya n’anya ebe ọ bụ ohu gị, bụrụkwa ohu Onyenwe anyị.
17 N’ihi ya, ọ bụrụ na m ka bụ enyi gị, nabata ya otú ị ga-esi anabata m.
18 Ọ bụrụkwa na o mere gị ihe ọjọọ ọ bụla ma ọ bụ jiri gị ụgwọ, ya dịrị m n’isi.
19 Ọ bụ mụnwa, bụ́ Pọl, ji aka m na-ede na m ga-akwụ gị ụgwọ o ji gị. Ma, gịnwa jidị m ụgwọ karịrị nke o ji gị.
20 Nwanna m, meere m ihe ọma a n’ihi Onyenwe anyị. Mee ka obi sikwuo m ike n’ihi na m na-eso ụzọ Kraịst.
21 Obi siri m ike na ị ga-eme ihe m gwara gị, ọ bụ ya mere m ji edetara gị akwụkwọ ozi a. Amakwa m na ị ga-emedị karịa ihe m gwara gị.
22 Doziekwara m ụlọ m ga-anọ ma m bịa, n’ihi na ekpere unu nwere ike ime ka a hapụ m, mụ enweekwa ike ịbịa hụ unu.+
23 Epafras,+ onye e ji mụ na ya eji n’ihi Kraịst Jizọs, na-ekele gị.
24 Mak, Arịstakọs,+ Dimas,+ na Luk,+ bụ́ ndị ọrụ ibe m, na-ekelekwa gị.
25 Ka Onyenwe anyị Jizọs Kraịst meere unu amara n’ihi àgwà ọma unu na-akpa.
