Maịka 1:1-16
1 Ihe a ka Jehova gwara Maịka*+ onye Moreshet, n’oge Jotam,+ Ehaz,+ na Hezekaya+ bụ ndị eze Juda.+ Ọ gwara ya ihe a n’ọhụụ gbasara Sameria na Jeruselem:
2 “Unu niile, geenụ ntị.
Ụwa na ihe jupụtara na ya, ṅaanụ ntị.
Jehova nọ n’ụlọ nsọ ya.
Nụrụnụ ka Ọkaakaa Onyenwe anyị Jehova na-ekwu ihe unu mere.+
3 N’ihi na Jehova si n’ebe o bi na-apụta.
Ọ ga-agbadata wee zọda ebe ndị dị elu n’ụwa.
4 Ugwu niile ga-agbaze n’okpuru ụkwụ ya.+
Ndagwurugwu niile ga-agbawasịDị ka mgbá aṅụ* ọkụ gbazere,Dị ka mmiri a wụpụrụ n’ebe kpọdara akpọda.
5 Ọ bụ maka na Jekọb nupụrụ isi mere ihe a niile ji na-eme,N’ihi mmehie ndị Izrel mere.+
Ole ndị mere Jekọb ji nupụ isi?
Ọ́ bụghị ndị bi na Sameria?+
Ole ndị mekwara e ji nwee ebe ndị dị elu na Juda?+
Ọ́ bụghị ndị bi na Jeruselem?
6 M ga-eme ka Sameria bụrụzie obodo e bibiri ebibi nke dị n’ọhịa,Ebe a na-akọ ubi vaịn.
M ga-awụba nkume ya na ndagwurugwu.
M ga-akụrikwa ntọala ya.
7 A ga-akụri arụsị ya niile a pịrị apị,+Kpọọkwa onyinye niile e ji kwụọ ya ụgwọ ọkụ.*+
M ga-ebibi arụsị ya niile.
N’ihi na o ji ihe ọ gbatara n’akwụna nweta ha.
A ga-ejikwa ha kwụọ ndị akwụna nọ ebe ọzọ ụgwọ.”
8 M ga-ebe ákwá arịrị, tiekwa mkpu ákwá n’ihi ihe a.+
M ga-agba ụkwụ efu, gbarakwa ọtọ na-ejegharị.+
M ga na-eti mkpu dị ka nkịta ọhịa,Na-erukwa uju dị ka enyí nnụnụ.
9 N’ihi na ọnyá ya enweghị ike ịla ala.+
Ọnyá ahụ erutela Juda.+
O rutela n’ọnụ ụzọ ámá ndị m, rutekwa Jeruselem.+
10 “Unu akọla ya na Gat.
Unu ebela ákwá.
Tụrụọnụ n’ájá na Bet-afra.*
11 Ndị bi na Shefia, gbaranụ ọtọ jiri ihere si n’ala unu pụọ.
Ndị bi na Zeanan apụtabeghị.
Ndị Bet-izel ga na-eti mkpu arịrị. Ha agaghịzi enyere unu aka.
12 Ndị bi na Merọt na-eche ka ha nweta ihe ọma.
Ma, Jehova emeela ka ihe ọjọọ bịa n’ọnụ ụzọ ámá Jeruselem.
13 Ndị bi na Lekish,+ kegidenụ ịnyịnya n’ụgbọ ịnyịnya.
Mmehie Zayọn mere si unu n’aka,N’ihi na ọ bụ unu mere ka Izrel nupụ isi.+
14 N’ihi ya, unu ga-enye Moreshet-gat onyinye ọ ga-eji ala.
Ụlọ ndị dị n’Akzib+ rafuru ndị eze Izrel.
15 Ndị bi na Marisha,+ m ga-ezitere unu onye ga-emeri unu.*+
Ebube Izrel ga-eru Adọlam.+
16 Meenụ onwe unu isi nkwọcha ma kpụchapụ ntutu isi unu n’ihi ụmụ unu unu hụrụ n’anya.
Meenụ ka isi nkwọcha unu dị ka nke udele,N’ihi na e si ebe unu nọ dọrọ ụmụ unu n’agha.”+
Ihe E Dere n'Ala Ala Peeji
^ Maịka bụ mkpọbiri Maịkel ma ọ bụ Mịkaya. Maịka pụtara “Ònye Dị Ka Jehova?”
^ Mgbá aṅụ bụ ihe aṅụ na-anyụpụta nke na-adị n’ụgbụgbọ mmanụ aṅụ. Ihe a na-agbaze ngwa ngwa.
^ Ma ọ bụ “Kpọọkwa ụgwọ niile a kwụrụ ya maka akwụna ọ na-agba ọkụ.”
^ Ma ọ bụ “n’ụlọ Afra.”
^ Ma ọ bụ “ga-anapụ unu ihe niile unu nwere.”
