Maịka 2:1-13
2 “Ndị na-akpa nkata ihe ọjọọ,
Ndị na-edina n’àkwà* ha eme atụmatụ otú ha ga-esi mee ihe na-adịghị mma, ga-ata ahụhụ.
Ha na-eme ihe ahụ ha kpara nkata ya mgbe chi bọrọ,N’ihi na ha ga-emeli ya.+
2 Ha chọọ inweta ubi, ha anara ya n’ike.+
Ha chọọ inweta ụlọ, ha eweghara ya.
Ha na-egwu mmadụ wayo nara ya ụlọ ya.+
Ha na-egwukwa mmadụ wayo nara ya ala ya.
3 N’ihi ya, Jehova kwuru, sị:
‘M na-eme atụmatụ ka ọdachi dakwasị unu,+ ọdachi nke unu na-agaghị agbanahụ.*+
Unu agaghịzi adị mpako,+ n’ihi na ọ bụ oge ọdachi.+
4 N’ụbọchị ahụ, ndị mmadụ ga-eji unu na-atụ ilu.
Ha ga-ebekwara unu ákwá arịrị.+
Ha ga-asị: “A laala anyị n’iyi.+
O nyere ndị ọzọ ala anyị ketara. Ọ napụla anyị ya.+
O nyere onye na-anaghị efe Chineke ubi anyị.”
5 N’ihi ya, unu agaghị enwe onye ga-eji ụdọ na-atụ̀ ala,Onye ga-ekere ọgbakọ Jehova ala.
6 Ha na-asị, “Unu ekwusala ihe ọ bụla.
E kwesịghị ikwusa ihe ndị a.
A gaghị emenye anyị ihere.”
7 Ndị si n’ezinụlọ Jekọb, ndị mmadụ hà na-ajụ, sị:
“Jehova ọ́ naghịzi enwe ndidi?*
Ọ̀ bụ ya mere ihe ndị a?”
Okwu m ọ́ naghị eme ka ihe gaziere ndị na-eme ihe ziri ezi?
8 Ma n’oge na-adịbeghị anya, ndị m na-emezi ka ndị iro.
Ọ na-abụ, ha hụ ndị tụsaara ahụ́ na-agafe ka ndị si agha na-alọta,Ha eyipụ ha ihe ndị dị oké ọnụ* e ji chọọ uwe ha mma.
9 Ha na-achụpụ ụmụ nwaanyị ndị m n’ụlọ ha na-enwe obi ụtọ na ya.
Ha na-anapụ ụmụ ha ihe ndị m ji gọzie ha. Ha anaghịkwa enyeghachi ha ihe ndị ahụ ọzọ.
10 Bilienụ pụọ, maka na ebe a abụghị ebe a na-ezu ike.
N’ihi na ala a adịghị ọcha.+ E bibiela ya ezigbo mbibi.+
11 Ọ bụrụ na onye na-achụ ikuku, nke na-aghọkwa aghụghọ, aghaa ụgha, sị:
“M ga-agwa unu okwu banyere mmanya ma ọ bụ ihe ọ bụla ọzọ na-aba n’anya,”
Ọ bụ ụdị onye a ka ndị a na-achọ ka ọ na-agwa ha okwu.+
12 Jekọb, m ga-akpọkọta unu niile.
O nweghị ihe ga-eme ka m ghara ịkpọkọta ndị Izrel fọdụrụnụ.+
M ga-eme ka ha dịrị n’otu dị ka ìgwè atụrụ nke nọ n’ogige atụrụ,Dị ka ìgwè anụ nke nọ ebe ha na-ata ahịhịa.+
Ìgwè mmadụ ga na-eme mkpọtụ ebe ahụ.’+
13 Onye na-etipu mgbidi ga-ebutere ha ụzọ.
Ha ga-etipukwu mgbidi. Ha ga-esi n’ọnụ ụzọ ámá gafere, sikwa na ya pụọ.+
Eze ha ga-ebutere ha ụzọ,Jehova ga-abụkwa onyeisi ha.”+
Ihe E Dere n'Ala Ala Peeji
^ Ma ọ bụ “n’ihe ndina.”
^ Na Hibru, “na-agaghị ewepụ olu unu na ya.”
^ Ma ọ bụ “Mmụọ Jehova ọ́ naghịzi enwe ndidi?”
^ Ma ọ bụ “ihe ndị pụrụ iche.”
