Nehọm 3:1-19
3 Obodo na-egbu mmadụ* ga-ata ahụhụ.
Aghụghọ na ohi juru na ya.
O nweghị mgbe ọ na-enweghị ndị o ji mere anụ oriri.
2 A na-anụ ụda ụtarị na mkpọtụ ụkwụ ụgbọ ịnyịnya na-eme.
E nwekwara ịnyịnya na-awụ ọsọ na ụgbọ ya na-amali amali.
3 E nwere onye na-agba ịnyịnya nke nọ n’elu ịnyịnya, nweekwa mma agha nke na-egbuke egbuke na ube nke na-egbu maramara.
Ìgwè ndị e gburu egbu na ozu juru ebe niile.
E nweghị ike ịgụta ozu ndị mmadụ ọnụ.
Ha na-akpọ ụkwụ n’ozu ndị nwụrụ anwụ wee daa.
4 Nke a bụ n’ihi ajọ akwụna nwaanyị akwụna na-agba.
Ọ bụ nwaanyị mara ezigbo mma nke na-agba afa.
O ji akwụna ọ na-agba na-amata mba dị iche iche n’ọnyà, jirikwa afa ọ na-agba na-amata ezinụlọ dị iche iche n’ọnyà.
5 Jehova nke ụsụụ ndị agha kwuru, sị: “Ana m emegide gị.*+
M ga-achịli uwe mwụda gị, jiri ya wụchie gị ihu.
M ga-eme ka mba dị iche iche hụ ọtọ gị,Meekwa ka alaeze dị iche iche hụ ihere e menyere gị.
6 M ga-ekpokwasị gị ihe rụrụ arụ.
M ga-emekwa ka ị bụrụ ihe a na-asọ oyi.
M ga-emekwa ka a gbaa gị nkiri.+
7 Onye ọ bụla hụrụ gị ga-agbara gị ọsọ,+ sịkwa,‘E bibiela Ninive!
Ònye ga-emetere ya ebere?’
Ebee ka m ga-achọta ndị ga-akasi gị obi?
8 Ị̀ ka No-emọn* mma?+ Ọ bụ obodo nke dị n’akụkụ ọwa mmiri dị iche iche nke Naịl.+
Mmiri gbara ya gburugburu.
Oké osimiri bụ akụ̀ ya, oké osimiri bụkwa mgbidi ya.
9 Ọ bụ Etiopia na Ijipt mere ka ọ na-akpa ike karịrị akarị.
Pọt+ na ndị Libia nyekwaara ya* aka.+
10 Ma, a dọọrọ ya n’agha,Ya agaa na-agba ohu n’ala ọzọ.+
A kụgburu ụmụ ya n’ebe niile ụzọ gbara mkpị.*
Ha fekwara nza n’isi ndị ya a na-asọpụrụ.
A tụọkwala ndị ukwu ya niile ịga.
11 Ị ga-aṅụbigakwa mmanya ókè.+
Ị ga-aga zoo.
Ị ga-achọ ebe ị ga-agbaba ka onye iro gị ghara igbu gị.
12 Ebe gị niile a rụsiri ike dị ka osisi fig ndị mkpụrụ mbụ ha charala acha.
Ọ bụrụ na a kwaa ha aka, mkpụrụ ha ga-adanye n’ọnụ onye ga-aracha ha.
13 “Ndị agha gị dị ka ụmụ nwaanyị.
A ga-emeghere ndị iro gị ọnụ ụzọ ámá ala gị.
Ọkụ ga-erepịa ihe e ji atụchi ọnụ ụzọ ámá gị.
14 Sepụtara onwe gị mmiri maka mgbe ndị agha ga-anọchibido gị.+
Mee ka ebe gị a rụsiri ike sikwuo ike.
Banye n’apịtị, zọọkwa ájá.
Buru ihe e ji akpụ brik.
15 Ọkụ ga-erepịakwa gị ebe ahụ.
A ga-eji mma agha gbuo gị.+
Ha ga-ebibi gị dị ka ụmụ igurube si eripịa ihe.+
Gbaa mbọ ka ị dị ọtụtụ ka ụmụ igurube.
Gbaa mbọ ka ị dị ọtụtụ ka igurube.
16 I meela ka ndị ahịa gị mụbaa karịa kpakpando ndị dị n’eluigwe.
Nwa igurube na-ewe iwere, wee fepụ.
17 Ndị nche gị dị ka igurube.
Ndị agha gị dịkwa ka ìgwè igurube.
N’ụbọchị oyi, ha na-anọ ná mgbidi e ji nkume rụọ.
Ma anwụ chawa, ha efepụ.
O nweghịkwa onye ma ebe ha na-efega.
18 Eze Asiria, ndị na-azụrụ gị atụrụ na-ero ụra.
Ndị gị a ma ama nọ n’ụlọ ha.
A chụsasịala ndị gị n’ugwu.
O nweghịkwa onye na-achịkọta ha.+
19 O nweghị onye ga-enyere gị aka n’oké ọdachi dakwasịrị gị.
Ọnyá na-aba gị agaghị ala ala.
Ndị niile nụrụ akụkọ banyere ihe mere gị ga-akụ aka.+
N’ihi na ò nwere onye na-atabeghị ahụhụ maka na obi tara gị mmiri?”+
Ihe E Dere n'Ala Ala Peeji
^ Na Hibru, “na-awụfu ọbara.”
^ Ya bụ, Ninive.
^ Ya bụ, Tibs.
^ Na Hibru, “gị.”
^ Na Hibru, “n’isi okporo ámá niile.”
