Hosia 13:1-16
13 “N’oge gara aga, ọ na-abụ Ifrem na-ekwu okwu, ndị mmadụ ana-ama jijiji.
Ọ bụ onye a ma ama n’Izrel.+
Ma, ikpe mara ya n’ihi na ọ na-efe Bel.+ O wee nwụọ.
2 Ugbu a, ha na-emekwu mmehie,Jirikwa ọlaọcha ha na-akpụ arụsị.+
Ha na-eleru anya ala akpụ arụsị dị iche iche, nke bụ́ aka ọrụ ndị omenkà.
Ha na-asị, ‘Ka ndị na-achụ àjà susuo ụmụ ehi ọnụ.’+
3 N’ihi ya, ha ga-adị ka ígwé ojii ụtụtụ,Dịkwa ka igirigi nke na-ekusa ngwa ngwa.
Ha ga-adị ka mkpo ọka nke oké ifufe si ebe a na-azọcha ọka na-ebupụ,Dịkwa ka anwụrụ ọkụ nke si n’oghere dị n’uko ụlọ na-ekupụsị.
4 Ma, abụ m Jehova Chineke gị malite n’Ijipt.+
O nweghị Chi ọzọ ị ma ma e wezụga m.
O nweghịkwa onye nzọpụta ọzọ ma e wezụga m.+
5 Ọ bụ m lekọtara gị n’ala ịkpa,+ ya bụ, n’ala mmiri na-anaghị ezo.
6 Ha rijuru afọ n’ihi na ha nwejuru nri enweju.+
Ha rijuru afọ wee dị mpako.*
Ọ bụ ya mere ha ji chefuo m.+
7 M ga-abịakwute ha ka ọdụm.+
M ga-ezo n’akụkụ ụzọ na-eche ha ka agụ owuru.
8 M ga-abịakwute ha ka anụ ọhịa bea nke na-achọ ụmụ ya.
M ga-adọwakwa obi ha.
M ga-eri ha ebe ahụ otú ọdụm si eri anụ.
Anụ ọhịa ga-adọrisị ha.
9 Izrel, ọ ga-ebibi gị,N’ihi na ọ bụ m, bụ́ onye na-enyere gị aka, ka i nupụụrụ isi.
10 Oleezi ebe eze gị nọ, ka o wee napụta gị n’obodo gị niile?+
Oleekwa ebe ndị na-achị* gị nọ, ndị i kwuru gbasara ha, sị,‘Nye m eze na ndị isi’?*+
11 Eji m iwe nye gị eze.+
M ga-ejikwa iwe wepụ ya.+
12 E kechiela mmehie Ifrem ihe.*
E dowela mmehie ya.
13 Ahụ́ ga na-egbu ya mgbu otú o si egbu nwaanyị ime na-eme.
Ọ bụkwa nwa na-amaghị ihe.
Mgbe oge ruru ka a mụọ ya, ọ gaghị anọzi anọzi.
14 M ga-anapụta ha n’aka ili.*
M ga-anapụta ha n’aka ọnwụ.+
Ọnwụ, olee ebe ihe i ji agba mmadụ dị?+
Ili, olee ebe ike ahụ i ji ala ndị mmadụ n’iyi dị?+
Agaghị m emetere gị ebere.
15 Ọ bụrụgodị na ọ ga-amị mkpụrụ ka ahịhịa amị,Ifufe si ebe ọwụwa anyanwụ, bụ́ ifufe Jehova, ga-abịa.
Ọ ga-esi n’ọzara bịa, mịkpọọ olulu mmiri ya, mịkọrọkwa mmiri dị n’isi iyi ya.
Onye ahụ ga-akwakọrọ akụ̀ ya niile bara ezigbo uru.+
16 A ga-ama Sameria ikpe,+ n’ihi na ọ na-enupụrụ Chineke ya isi.+
A ga-eji mma agha gbuo ha.+
A ga-akụgbu ụmụ ha,Bọwaakwa ụmụ nwaanyị ha dị ime afọ.”
Ihe E Dere n'Ala Ala Peeji
^ Na Hibru, “obi ha wee fụlie ha elu.”
^ Ma ọ bụ “ụmụ eze.”
^ Na Hibru, “ndị ikpe.”
^ Ma ọ bụ “E chekwaala mmehie Ifrem.”
^ Ma ọ bụ “Shiol.” Gụọ Nkọwa Okwu.