Hosia 9:1-17
9 “Izrel, aṅụrịla ọṅụ.+
Enwela aṅụrị otú ndị dị iche iche na-enwe.
N’ihi na ịgba akwụna* emeela ka ị hapụ Chineke gị wee kpafuo.+
Ụgwọ a na-akwụ gị maka akwụna ị na-agba n’ebe niile a na-azọcha ọka* na-amasị gị.+
2 Ebe a na-azọcha ọka na ebe a na-azọchapụta mmanya agaghị emepụtara ha ihe.
Mmanya ọhụrụ ha agaghịzi adị.+
3 Ha agaghịzi ebi n’ala Jehova,+Kama, Ifrem ga-alaghachi Ijipt.
Ha ga-erikwa ihe na-adịghị ọcha n’Asiria.+
4 Ha agaghịzi na-awụpụrụ Jehova mmanya.+
Àjà ha agaghị atọ ya ụtọ.+
Ọ dị ka nri a na-eri n’oge a na-eru uju.
Ndị niile na-eri ya ga-emerụ onwe ha,N’ihi na nri ha bụ naanị maka onwe ha.*
Ọ gaghị abata n’ụlọ Jehova.
5 Olee ihe unu ga-eme n’ụbọchị a ga-ezukọta,*N’ụbọchị ememme Jehova?
6 N’ihi na ha ga-agbalaga maka na ndị iro ha ga-abịa bibie ha.+
Ijipt ga-achịkọta ha ọnụ,+ Memfis ga-elikwa ha.+
Ahịhịa akụwa* ga-eweghara ihe ha ndị bara ezigbo uru e ji ọlaọcha mee.
Osisi ogwu ga-ejupụtakwa n’ụlọikwuu ha.
7 Ụbọchị a ga-elebara ha anya ga-abịa.+
Ụbọchị a ga-akwụ ha ụgwọ ihe ha metara ga-abịa.
Ndị Izrel ga-ama ihe na-emenụ.
Onye amụma ha ga-aghọ onye nzuzu, ara agbaakwa onye na-ekwu na Chineke gwara ya okwu.
Ndị iro unu dị ọtụtụ n’ihi na mmehie unu dị ọtụtụ.”
8 E nwere mgbe onye nche+ Ifrem na-erubere Chineke m isi.+
Ma ugbu a, ụzọ niile nke ndị amụma ya+ dị ka ọnyà onye na-achụ nta nnụnụ.
Ibu iro dị n’ụlọ Chineke ya.
9 Ha na-akpa àgwà ndị jọgburu onwe ha otú ndị Gibia kpara, nke ga-eme ka e bibie ha.+
Ọ ga-echeta mmehie ha, taakwa ha ahụhụ maka mmehie ha.+
10 “Mgbe m hụrụ Izrel, ọ dị ka mgbe mmadụ hụrụ mkpụrụ vaịn n’ala ịkpa.+
Mgbe m hụrụ ndị nna nna unu, ọ dị ka mgbe mmadụ hụrụ mkpụrụ mbụ osisi fig mịrị.
Ma, ha gakwuuru Bel nke Piọ.+
Ha nyefere chi na-asọ oyi* onwe ha.+
Ha ghọkwara ndị rụrụ arụ dị ka ihe ahụ ha hụrụ n’anya.
11 Ebube Ifrem ga-efepụ dị ka nnụnụ.
Ha agaghị atụrụ ime, ha agaghịkwa amụ nwa.+
12 Ọ bụrụgodị na ha azụọ ụmụ,M ga-egbugide ha ruo mgbe ha ga-agbara aka ụmụ.+
Ha ga-ata ahụhụ mgbe m ga-ahapụ ha.+
13 Ifrem, onye a kụrụ n’ala mara mma, dị m ka Taya.+
Ugbu a, Ifrem ga-akpọpụta ụmụ ya ka e gbuo ha.”
14 Jehova, nye ha ihe ị chọrọ inye ha.
Mee ka ime ọ bụla ha tụụrụ pụọ, nyekwa ha ara tara mmiri.
15 “Ihe ọjọọ ha niile dị na Gilgal,+ n’ihi na ọ bụ ebe ahụ ka m nọ kpọ ha asị.
M ga-achụpụ ha n’ụlọ m n’ihi ajọ omume ha.+
Agaghịzi m ahụ ha n’anya.+
Ndị isi* ha niile na-eme isi ike.
16 A ga-etikpọ Ifrem.+
Mgbọrọgwụ ha ga-akpọ nkụ, ha agaghịkwa amị mkpụrụ ọ bụla.
Ọ bụrụkwa na ha amụọ ụmụ, m ga-egbu ụmụ ha ha hụrụ n’anya.”
17 Chineke m ga-ajụ ha,N’ihi na ha egeghị ya ntị.+
Ha ga-agbagakwa ọsọ ndụ ná mba dị iche iche.+
Ihe E Dere n'Ala Ala Peeji
^ Ọka a nwere ike ịbụ ọka wit ma ọ bụ ọka bali.
^ Ma ọ bụ “ịkwa iko.”
^ Ma ọ bụ “maka mkpụrụ obi ha.”
^ Ma ọ bụ “n’ụbọchị unu ji eme ememme.”
^ Ma ọ bụ “Ahịhịa ogwu.”
^ Ma ọ bụ “ihe ihere.”
^ Ma ọ bụ “Ụmụ eze.”
