Jeremaya 12:1-17
12 Jehova, ị bụ onye ezi omume.+ Mgbe ọ bụla m kọọrọ gị ihe na-enye m nsogbu n’obiNakwa mgbe ọ bụla m ji okwu ikpe bịakwute gị, ị na-ekpe ikpe ziri ezi.
Ma, gịnị mere ihe ji agaziri ndị ajọ omume?+
Gịnịkwa mere na e nweghị ihe na-echegbu ndị aghụghọ?
2 Ị kụrụ ha ka osisi. Ha agbanyekwala mgbọrọgwụ.
Ha etoola, mịakwa mkpụrụ.
Ha na-akpụ gị n’ọnụ mgbe niile, ma obi ha adịghị n’ebe ị nọ.+
3 Ma Jehova, ị ma m nke ọma.+ Ị na-ahụkwa m.
I nyochaala obi m wee hụ na obi m dị n’ebe ị nọ.+
Họpụta ha ka atụrụ a ga-egbu egbu.
Dowekwa ha iche maka ụbọchị a ga-egbu ha.
4 Olee mgbe ala a ga-akwụsị ịkpọ nkụ?
Olee mgbe ahịhịa ndụ dị n’ala a ga-akwụsị ịkpọnwụ?+
A laala anụ ọhịa na nnụnụ n’iyiN’ihi ihe ọjọọ ndị bi n’ala a na-eme.
N’ihi na ha na-asị: “Chineke anaghị ahụ ihe ga-eme anyị.”
5 Ọ bụrụ na ike gwụrụ gị mgbe i so ndị ji ụkwụ na-agba ọsọ,Oleezi otú ị ga-esi soro ịnyịnya gbaa ọsọ?+
Ọ bụrụgodị na obi ruru gị ala n’obodo udo dị,Olee otú obi ga-adị gị ma ị nọrọ n’oké ọhịa dị n’akụkụ Osimiri Jọdan?
6 N’eziokwu ụmụnne afọ gị, ndị otu nna ji gị na ha,Aghọọla gị aghụghọ.+
Ha na-abụ gị ọnụ.
Ọ bụrụgodị na ha agwawa gị okwu ọma,Atụkwasịkwala ha obi.
7 “Ahapụla m ụlọ m.+ Ahapụla m ndị m ketara.+
Enyefeela m ndị m* hụrụ n’anya n’aka ndị iro ha.+
8 Ndị m ketara dịzi m ka ọdụm nọ n’oké ọhịa.
Ha na-agbọ m ụja.
Ọ bụ ya mere m jizi kpọ ha asị.
9 Ndị m ketara dị m ka nnụnụ tụrụ àgwà nke na-eri anụ.
Nnụnụ dị iche iche na-eri anụ gbara ya gburugburu ka ha rie ya.+
Anụmanụ niile nọ n’ọhịa, bịanụ, zukọtanụ.
Bịanụ ka unu rie nri.+
10 Ndị na-azụrụ m atụrụ alaala ubi vaịn m n’iyi.+
Ha azọtọọla ala m.+
Ha emeela ka ọmarịcha ala m ghọọ ala ịkpa tọgbọ nkịtị.
11 Ọ ghọọla ala na-abaghị uru.
Ọ kpọọla nkụ.*
Ọ tọgbọkwa chakoo n’ihu m.+
Ala a niile aghọọla ikpo nkume,
Ma, o nweghị onye ọ na-emetụ n’obi.+
12 Ndị na-ebibi ihe esila n’ụzọ niile* dị n’ala ịkpa bịa,N’ihi na mma agha Jehova si n’otu nsọtụ ala a gburu ndị mmadụ na-aga na nsọtụ ya nke ọzọ.+
E nweghị onye obi ruru ala.
13 Ha kụrụ ọka wit, ma, ihe ha ghọtara bụ ogwu.+
Ha na-arụgbu onwe ha n’ọrụ, ma, e nweghị uru ọ na-abara ha.
Ihere ihe ha rụpụtara ga-eme ha,N’ihi na Jehova na-ewe ezigbo iwe.”
14 Mụnwa bụ́ Jehova nwere ihe m kwuru gbasara ndị agbata obi m niile bụ́ ndị ọjọọ, ndị na-etinye anya n’ala m nyere ndị Izrel bụ́ ndị m ka ha biri na ya.+ M kwuru, sị: “M ga-efopụ ha n’ala ha.+ M ga-efopụkwa ndị Juda ka ha na ha ghara ịnọ.
15 Ma, m fopụchaa ha, m ga-emere ha ebere, kpọghachikwa onye nke ọ bụla n’ala ya nakwa n’ihe o ketara.”
16 “Ọ bụrụkwa na ha agbaa mbọ mụta ihe ndị m na-eme, jirikwa aha m na-aṅụ iyi, sị, ‘Eji m Jehova, bụ́ Chineke dị ndụ, na-aṅụ iyi!’ otú ha kụziiri ndị m iji Bel na-aṅụ iyi, ha ga-adịrị ndụ otú ndị m dị ndụ.
17 Ma ọ bụrụ na ha jụ irubere m isi, m ga-efopụ ha ọzọ. M ga-efopụ ha, bibiekwa ha.” Ọ bụ Jehova kwuru ihe a.+
Ihe E Dere n'Ala Ala Peeji
^ Ma ọ bụ “mkpụrụ obi m.”
^ O nwere ike ịbụ, “Ọ na-eru uju.”
^ Ma ọ bụ “n’ụzọ niile na-adịghị mma.”
