Jeremaya 2:1-37
2 Jehova gwara m, sị:
2 “Gaa gwa ndị bi na Jeruselem, sị, ‘Jehova kwuru, sị:
“Ana m echeta nnọọ otú unu si jiri obi unu niile na-efe m* kemgbe unu bụ ụmụaka,+Otú unu si hụ m n’anya mgbe m kwere unu nkwa na m ga-alụ unu+Nakwa otú unu si na-eso m n’ala ịkpa,N’ala a na-akụghị mkpụrụ ọ bụla.+
3 Ndị Izrel dị nsọ n’anya Jehova.+ Ha bụ mkpụrụ mbụ mịịrị ya.”’
‘A ga-ama onye ọ bụla ga-anwa ibibi ha ikpe.
Ọdachi ga-adakwasịkwa ya.’ Ọ bụ Jehova kwuru ihe a.”+
4 Ezinụlọ Jekọb na ezinụlọ niile dị n’Izrel,Nụrụnụ ihe Jehova kwuru.
5 Jehova kwuru, sị:
“Gịnị ka nna nna unu hà sị na m mere+Nke mere ha ji nọrọ m n’ebe dị anya,Na-esokwa arụsị ndị na-abaghị uru,+ hanwa aghọọkwa ndị na-abaghị uru?+
6 Ha asịghị, ‘Ka anyị chọwa Jehova,*Onye si n’ala Ijipt kpọpụta anyị,+Onye duuru anyị gafee ala ịkpa,Gafee ọzara+ na olulu dị iche iche,Gafee ala mmiri na-anaghị ezokarị+ na ala oké ọchịchịrị,Gafee ala mmadụ na-agafetụbeghị,Nke mmadụ na-ebitụbeghịkwa.’
7 M kpọbatakwara unu n’ala a kụrụ mkpụrụ osisi,Ka unu rie ihe o mepụtara na ihe ọma ndị dị na ya.+
Ma unu batara merụọ ala m.
Unu mekwara ka ihe m ketara bụrụ ihe rụrụ arụ.+
8 Ndị nchụàjà asịghị, ‘Ka anyị chọwa Jehova.’*+
Ndị na-akụziri ndị ọzọ Iwu m amaghị m.
Ndị ọzụzụ atụrụ nupụkwaara m isi.+
Ndị amụma buru amụma n’aha Bel,+Sorokwa ndị na-agaghị abara ha uru ọ bụla.
9 Jehova kwuru, sị, ‘Ọ bụ ya mere m ga-eji na-agwa unu ihe unu mejọrọ,+Na-agwakwa ụmụ ụmụ unu ihe ha mejọrọ.’
10 ‘Ma, gaanụ n’ala ndị dị n’ụsọ osimiri* nke ndị Kitim+ lee ihe unu ga-ahụ.
Zigakwanụ ozi na Kida+ ma cheenụ echiche nke ọma,Ka unu mata ma ụdị ihe a ò metụla.
11 Ò nweela mba ji ihe ndị na-abụghị chi gbanwere chi ha?
Ma, ndị m ejirila ihe na-enweghị ike ịbara ha uru gbanwere mụnwa bụ́ Chineke dị ebube.+
12 Eluigwe, kporopụ anya na-ele ihe a,Ka ezigbo ụjọ ji gị meekwa ka akpata oyi wụọ gị.’ Ọ bụ Jehova kwuru ihe a.
13 ‘N’ihi na ndị m mere ihe abụọ dị njọ:
Ha ahapụla mụnwa, bụ́ isi iyi nke mmiri na-enye ndụ.+
Ha gwukwaara onwe ha oluluNdi gbawara agbawa na-agaghị echedoli mmiri.’
14 ‘Izrel ọ̀ bụ onye na-eje ozi ka ọ̀ bụ ohu a mụrụ n’ezinụlọ?
Gịnịzi mere e ji na-ebukọrọ ihe ya?
15 E nwere ọdụm ndị ji maka ya na-agbọ ụja.+
Ha na-agbọsi ụja ike.
Ha mere ka ala ya bụrụ ihe na-awụ akpata oyi.
Ha agbaala obodo ya niile ọkụ, nke mere na e nweghịzi onye bi na ha.
16 Ndị Nọf*+ na ndị Tapanis+ na-akwọcha gị isi.*
17 Ọ́ bụghị gị mere onwe gị ihe a,Ebe ọ bụ na ị hapụrụ Jehova bụ́ Chineke gị+N’oge o du gị na-eje n’ụzọ?
18 Gịnị mere i ji aga n’ụzọ e si aga Ijipt+Ka ị ṅụọ mmiri Shaịhọ?*
Gịnịkwa mere i ji aga n’ụzọ e si aga Asiria+Ka ị ṅụọ mmiri Osimiri Yufretis?
19 I kwesịrị ịmụta ihe n’ihe ọjọọ ndị i mere.
A ga-adọ gị aka ná ntị maka isi i nupụrụ.
Marakwa na i meela ihe ọjọọ na ihe na-agbawa obi,+N’ihi na ị hapụrụ mụnwa, bụ́ Jehova Chineke gị.
Ị tụghịkwa m ụjọ.’+ Ọ bụ Ọkaakaa Onyenwe anyị, bụ́ Jehova nke ụsụụ ndị agha, kwuru ihe a.
20 ‘N’ihi na o teela m kụriri yok gị,+Dọbiekwa agbụ e kere gị.
Ma ị sịrị na ị gaghị efe m.
N’ugwu ọ bụla nakwa n’okpuru nnukwu osisi ọ bụla na-ama pokopoko+Ka ị na-edina jaghee ụkwụ gị, na-agba akwụna.+
21 M kụrụ gị ka ezigbo mkpụrụ vaịn na-acha uhie uhie,+ nke na-emebighị emebi.
Oleezi otú i si gbanwee n’ihu m, ghọzie alaka mebiri emebi nke osisi vaịn ọhịa?’+
22 ‘I weregodị akanwụ na ncha hiri nne saa ahụ́,Ị ka ga-abụ onye na-adịghị ọcha n’anya m n’ihi mmehie gị.’+ Ọ bụ Ọkaakaa Onyenwe anyị Jehova kwuru ihe a.
23 Gịnị mere ị ga-eji sị, ‘Emerụghị m onwe m,Anaghịkwa m eso Bel’?
Cheta otú i si bie ndụ na ndagwurugwu.
Chetakwa ihe i mere.
Ị dị ka nne kamel dị garagara,Nke na-agbagharị n’enweghị ebe ọ na-aga.
24 Ị dịkwa ka jakị ọhịa nke ala ịkpa maara ahụ́,Nke na-esigharị imi na-achọ oké ga-agba ya.
Ònye ga-achụghachili ya azụ mgbe ọ chọrọ ka oké gbaa ya?
Ike ekwesịghị ịgwụ ndị na-achọ ya.
Mgbe oge* ya ruru, ha ga-achọta ya.
25 Kwụsị ịgba ọsọ, ma ọ́ bụghị ya, ị ga-agba ụkwụ ọtọ,Akpịrị ga-akpọkwa gị nkụ.
Ma ị sịrị, ‘Ọ baghị uru!+
Kama ahụrụ m ndị mba ọzọ* n’anya,+Ọ bụkwa ha ka m ga-eso.’+
26 Dị ka ihere si eme onye ohi mgbe e jidere ya,Otú ahụ ka ihere merela ndị Izrel,Ma ha ma ndị eze ha ma ndị isi ha,Ma ndị nchụàjà ha ma ndị amụma ha.+
27 Ha na-asị osisi, ‘Ị bụ nna m,’+Sịkwa nkume, ‘Ọ bụ gị mụrụ m.’
Ma, ha na-agbakụta m azụ. Ha echeghị m ihu.+
Mgbe ọdachi dakwasịrị ha, ha ga-asị,‘Bịa zọpụta anyị!’+
28 Juda, olee ebe chi ndị i meere onwe gị nọ?+
Ha bịa nyere gị aka ma ọ bụrụ na ha ga-azọpụtali gị n’oge ọdachi dakwasịrị gị.
N’ihi na chi gị dị ọtụtụ otú ahụ obodo gị dị ọtụtụ.+
29 Jehova kwuru, sị, ‘Gịnị mere unu ji na-esesa m okwu?
Gịnị mere unu niile ji nupụrụ m isi?’+
30 E nweghị uru ihe m tiri ụmụ gị bara.+
Ha anabataghị aka ná ntị m dọrọ ha.+
Mma agha unu bibiri ndị amụma unu+Otú ọdụm si ebibi ihe.
31 Ọgbọ a, chebaranụ okwu Jehova echiche.
Àbụzi m ala ịkpa n’anya ndị Izrel,Ka àbụzi m ala gbara oké ọchịchịrị n’anya ha?
Gịnị mere ndị a bụ́ ndị m ji sị, ‘Anyị tụsaara ahụ́ na-agagharị,Anyị agaghịkwa abịakwute gị ọzọ’?+
32 Nwa agbọghọ na-amaghị nwoke ọ̀ ga-echefuli ihe o ji achọ mma?
Nwaanyị a na-alụ ọhụrụ ọ̀ ga-echefu ákwà ọ na-eke n’obi?
Ma, ọ dịla ezigbo anya ndị m chefuru m.+
33 Nwaanyị, gịnị mere i ji agbasi mbọ ike ka ụmụ nwoke hụ gị n’anya?
Ị zụọla onwe gị ịna-eme ihe ọjọọ.+
34 Ọbara ndị* ogbenye aka ha dị ọcha gbasara n’uwe mwụda gị.+
Ahụghị m ka ndị aka ha dị ọcha na-abanye n’ụlọ gị n’ike,Ma, ọbara ha gbasachara n’uwe gị niile.+
35 Ma ị sịrị, ‘Aka m dị ọcha.
N’eziokwu, iwe Chineke na-ewesa m adajụọla.’
Ugbu a, m ga-ata gị ahụhụN’ihi na ị sịrị, ‘Emehieghị m.’
36 Gịnị mere i ji were na ụzọ gị na-akwụghị ọtọ bụ obere ihe?
Ihere Ijipt ga-emekwa gị,+Otú ahụ ihere Asiria mere gị.+
37 Ihe a ga-eme ka i buru aka n’isi,+N’ihi na Jehova ajụla ndị ị tụkwasịrị obi.
Ha agaghị eme ka ihe gaziere gị.”
Ihe E Dere n'Ala Ala Peeji
^ Ma ọ bụ “na-egosi m ịhụnanya pụrụ iche.”
^ Na Hibru, “Olee ebe Jehova nọ?”
^ Na Hibru, “Olee ebe Jehova nọ?”
^ Ma ọ bụ “n’agwaetiti.”
^ Ma ọ bụ “Memfis.”
^ Ma ọ bụ “na-eri opu isi gị.”
^ Ya bụ, otu n’ime iyi ndị na-asọba n’Osimiri Naịl.
^ Na Hibru, “ọnwa.”
^ Ma ọ bụ “chi ndị mba ọzọ.”
^ Ma ọ bụ “Mkpụrụ obi ndị.”
