Jeremaya 20:1-18
20 Pash-họ nwa Ịma, bụ́ onye nchụàjà na onyeisi ndị na-elekọta ọrụ n’ụlọ Jehova, nọ na-ege Jeremaya ntị mgbe ọ na-ebu ihe ndị a n’amụma.
2 Pash-họ wee tie Jeremaya onye amụma ihe ma tinye ya n’ọtọsị+ dị n’Ọnụ Ụzọ Ámá Mgbago nke Benjamin, nke dị n’ụlọ Jehova.
3 Ma n’echi ya, mgbe Pash-họ hapụrụ Jeremaya, Jeremaya gwara ya, sị:
“Aha Jehova gụrụ gị ugbu a bụ Ụjọ Dị Ebe Niile,+ ọ bụghị Pash-họ.
4 N’ihi na Jehova kwuru, sị, ‘Ihe m ga-eme gị ga-emenye gị na ndị enyi gị niile ụjọ. Ndị iro ha ga-ejikwa mma agha gbuo ha n’ihu gị.+ M ga-enyefe Juda niile n’aka eze Babịlọn. Ọ ga-adọrọkwa ha n’agha laa Babịlọn ma jiri mma agha gbuo ha.+
5 M ga-enye ndị iro ha akụnụba niile dị n’obodo a na ihe niile ha nwere na ihe niile bara ezigbo uru dị na ya nakwa akụ̀ niile ndị eze Juda nwere.+ Ha ga-akwakọrọ ha, burukwa ha laa Babịlọn.+
6 A ga-adọrọkwa gịnwa, bụ́ Pash-họ, n’agha, gị na ndị niile bi n’ụlọ gị. Ị ga-aga Babịlọn, nwụọkwa ebe ahụ. Ọ bụkwa ebe ahụ ka a ga-eli gị na ndị enyi gị niile, n’ihi na i buuru ha amụma ụgha.’”+
7 Jehova, i meela ihe tụrụ m n’anya. N’eziokwu, ọ tụrụ m n’anya.
I gosila na ị ka m ike, wee merie m.+
Abụzi m onye e ji eme ihe ọchị ụbọchị niile.
Onye ọ bụla na-akwa m emo.+
8 Mgbe ọ bụla m na-ekwu okwu, m na-eti mkpu, na-asị,“E nwere ndị tigbuo zọgbuo na ndị na-ebibi ihe.”
Okwu Jehova na-eme ka a na-akwa m emo, na-akparịkwa m ụbọchị niile.+
9 M kwuziri, sị: “Agaghị m ekwu okwu banyere ya.
Agaghịkwa m ekwu okwu n’aha ya ọzọ.”+
Ma n’ime obi m, ọ dị ka ọkụ na-ere ere nke e mechibidoro ụzọ n’ime ọkpụkpụ m.
Enweghịzi m ike ịgbachi nkịtị.
Enweghịkwa m ike imechi ọnụ.+
10 N’ihi na anụrụ m akụkọ ọjọọ ọtụtụ ndị na-akọ.
Ihe na-emenye m ụjọ gbara m gburugburu.+
Ha na-asị, “Kọsaanụ na ọ bụ onye ọjọọ, ka anyị na-akọsa ya.”
Onye ọ bụla nke na-asị ka udo dịrị m na-ele anya ka m daa.+ Ha na-asị:
“Ikekwe, ọ ga-eme ezigbo mmehie,Anyị emerie ya ma megwara ya ihe o mere anyị.”
11 Ma Jehova, bụ́ dike n’agha, nọnyeere m.+
Ọ bụ ya mere ndị na-akpagbu m ga-eji daa wee ghara imeri m.+
Ezigbo ihere ga-eme ha, n’ihi na ihe ha na-achọ ime m agaghị enwe isi.
A gaghị echefu ihere a ga-emenye ha ruo mgbe ebighị ebi.+
12 Ma gịnwa, bụ́ Jehova nke ụsụụ ndị agha, na-enyocha onye ezi omume.
Ị na-ahụ obi ndị mmadụ na ihe dị n’ime ime obi*+ ha.
Kwe ka m hụ otú ị ga-esi taa ndị iro gị ahụhụ ihe ha mere,+N’ihi na ọ bụ gị ka m hapụụrụ okwu m ka i kpeere m ikpe.+
13 Bụkuonụ Jehova abụ! Toonụ Jehova!
N’ihi na ọ napụtala onye* ọ na-enweghị ka ọ hà ya n’aka ndị na-eme ihe ọjọọ.
14 Ka a bụọ ụbọchị a mụrụ m ọnụ!
Ka a ghara ịgọzi ụbọchị nne m mụrụ m!+
15 Ka a bụọ nwoke bịara zie nna m ozi ọma ọnụ, onye bịara zie ya, sị:
“A mụọrọla gị nwa nwoke!”
Nke mere ka o nwee ezigbo aṅụrị.
16 Ka nwoke ahụ dịrị ka obodo dị iche iche Jehova kwaturu n’akwaghị mmakwaara.
Ka ọ nụ mkpu ákwá n’ụtụtụ, nụkwa mkpu agha n’etiti ehihie.
17 Gịnị mere na o gbughị m mgbe m nọ n’afọ,Ka nne m bụrụ ili m,Ka o burukwa afọ ime m mgbe niile?+
18 Gịnị mere m ji si n’afọ nne m pụtaBịa na-ahụ nsogbu na ihe na-agbawa obi,Ihere ana-emekwa m ná ndụ m niile?+
