Jeremaya 22:1-30
22 Jehova kwuru, sị: “Gaa n’ụlọ* eze Juda, kwuo ihe a m na-aga ịgwa gị.
2 Kwuo, sị, “Eze Juda, onye nọ n’ocheeze Devid, gị na ndị na-ejere gị ozi nakwa ndị gị, bụ́ ndị na-esi n’ọnụ ụzọ ámá ndị a abata, nụrụnụ ihe Jehova kwuru.
3 Jehova sịrị: “Kpeenụ ikpe ziri ezi, meekwanụ ezi omume. Napụtanụ onye a na-emegbu emegbu n’aka onye na-emegbu ya. Unu emekpala onye mbịarambịa ọ bụla ahụ́. Unu emesikwala nwa na-enweghị nna* na nwaanyị isi mkpe ike.+ Unu egbukwala* onye aka ya dị ọcha.+
4 Ọ bụrụ na unu elezie anya mee ihe a m kwuru, ndị eze, bụ́ ndị na-anọchi Devid n’ocheeze ya,+ na ndị na-ejere ha ozi, nakwa ndị obodo ha ga na-esi n’ọnụ ụzọ ámá ndị dị n’ụlọ a na-abata. Ha ga-agbara ma ụgbọ ịnyịnya ma ịnyịnya ha na-abata.”’+
5 “Jehova kwukwara, sị, ‘Ma, ọ bụrụ na unu emeghị ihe a m kwuru, eji m onwe m na-aṅụ iyi na a ga-ala ụlọ a n’iyi.’+
6 “Jehova kwuru banyere ezinụlọ eze Juda, sị:
‘N’anya m, unu dị ka GiliedNakwa ọnụ ọnụ ugwu Lebanọn.
Ma, m ga-eme ka unu bụrụ ala ịkpa.
Ọ dịghị obodo ọ bụla n’ime obodo unu niile mmadụ ga-ebi.+
7 M ga-ahọpụta ndị ga-ebibi unu.*
Onye nke ọ bụla ga-eji ngwá agha ya.+
Ha ga-egbutu osisi sida unu ndị kacha mma,Meekwa ka ha daba n’ọkụ.+
8 “‘Ọtụtụ ndị si mba dị iche iche ga na-ajụ ibe ha ma ha na-agafe obodo a, sị: “Gịnị mere Jehova ji mee obodo ukwu a ihe a?”+
9 Ha ga-azakwa ha, sị: “Ọ bụ n’ihi na ha hapụrụ ọgbụgba ndụ ha na Jehova bụ́ Chineke ha gbara gaa na-akpọrọ chi ọzọ dị iche iche isiala, na-efekwa ha.”’+
10 Unu eberela onye nwụrụ anwụ ákwá.
Unu erukwarala ya uju.
Kama, besierenụ onye a dọọrọ n’agha ákwá ike,N’ihi na ọ gaghị alọta ọzọ. Ọ gaghịkwa ahụ ala a mụrụ ya anya ọzọ.
11 “E nwere ihe Jehova kwuru banyere Shalọm,*+ bụ́ eze Juda, onye si n’ala a pụọ, onye bụ́kwa nwa Josaya, nke nọchiri Josaya+ nna ya. Ọ sịrị, ‘Ọ gaghị alọta n’ala a ọzọ.
12 N’ihi na n’obodo a dọọrọ ya n’agha laa ka ọ ga-anwụ. Ọ gaghịkwa ahụ ala a anya ọzọ.’+
13 A ga-ata mmadụ ahụhụ ma ọ bụrụ na ọ na-arụ ụlọ ya n’akwụwaghị aka ọtọ,Jiri mmegbu na-arụ ọnụ ụlọ dị iche iche n’elu ụlọ ya,Na-eme ka mmadụ ibe ya na-arụrụ ya ọrụ n’efu,Ya rụchaara ya ọrụ, ya ajụ ịkwụ ya ụgwọ,+
14 Onye na-asịkwa, ‘M ga-arụrụ onwe m nnukwute ụlọ,Nke ọnụ ụlọ ndị dị n’elu ya ga-asakwa mbara.
M ga-etinye ha windo.
M ga-eji osisi sida machie ahụ́ ya, teekwa ya ágbá na-acha uhie uhie.*
15 Ì chere na ị ga na-achị n’ihi na i ji osisi sida na-egosi na ị ka ndị ọzọ?
Nna gị riri nri, ṅụọkwa mmanya,Ma, o kpere ikpe ziri ezi, meekwa ezi omume.+
Ihe gazikwaara ya.
16 O kpechitere ma ọnụ onye nọ n’ahụhụ ma ọnụ ogbenye.
Ihe gazikwaara ha.
Jehova kwuru, sị, ‘Ihe a o mere ó gosighị na ọ ma m?
17 Anya gị na obi gị dị n’iji aghụghọ achọ ihe ga-abara naanị gị uru,
Dịrịkwa n’igbu* onye aka ya dị ọcha,Nakwa n’irigbu ndị mmadụ na ịnapụ ha ihe ha nwere.’
18 “Ọ bụ ihe a mere Jehova ji kwuo gbasara Jehoyakim+ nwa Josaya, bụ́ eze Juda, sị,‘Ha agaghị eruru ya uju, na-asị:
“Ewoo, ị dị ka nwanne m nwoke! Ewoo, ị dị ka nwanne m nwaanyị!”
Ha agaghịkwa eruru ya uju, sị:
“Ewoo, nna anyị ukwu! Ewoo, onye dị ebube!”
19 Ya nwụọ, a ga-eme ya ihe a na-eme jakị nwụrụ anwụ.+
A ga-akpụrụ ya n’ala gaa tụfuoNá mpụga ọnụ ụzọ ámá Jeruselem.’+
20 Gaa Lebanọn tie mkpu ákwá.
Besie ákwá ike na Beshan,Nọrọkwa n’Abarim tie mkpu ákwá,+N’ihi na e bibiela ndị niile gị na ha na-eme enyi.+
21 M dụrụ gị ọdụ n’oge ị na-enweghị ihe na-echegbu gị.
Ma, ị sịrị na ị gaghị ege m ntị.+
Otú a ka i si eme kemgbe ị bụ nwata.
Ị naghị ege m ntị.+
22 Ifufe ga-ebufu ndị ọzụzụ atụrụ gị niile.+
A ga-adọrọkwa ndị gị na ha na-eme enyi n’agha.
Ọdachi niile ga-adakwasị gị ga-emenye gị ihere, mechuokwa gị ihu.
23 Ọ bụ eziokwu na ọ dị ka ì bi na Lebanọn,+N’ụlọ e ji osisi sida rụọ,+Ị ga na-asụ ude mgbe ahụ́ ga na-egbu gị mgbuOtú o si egbu nwaanyị na-amụ nwa.”+
24 “Jehova kwuru, sị, ‘Ebe ọ bụ na m na-adị ndụ, ọ bụrụgodị na gịnwa bụ́ Konaya*+ nwa Jehoyakim,+ bụ́ eze Juda, bụ mgbaaka e ji aka ihe akara m gba n’aka nri, m ga-agbapụ gị n’ebe ahụ.
25 M ga-enyefe gị n’aka ndị na-achọ igbu gị* nakwa n’aka ndị ị na-atụ egwu nakwa n’aka Nebukadneza* bụ́ eze Babịlọn nakwa n’aka ndị Kaldia.+
26 M ga-achụga gị na nne mụrụ gị n’obodo ọzọ na-abụghị ebe a mụrụ unu. Unu ga-anwụkwa ebe ahụ.
27 E nweghịkwa ihe ga-eme ka unu lọghachi n’ala a na-agụ unu* agụụ ka unu nọrọ na ya.+
28 Nwoke a bụ́ Konaya ọ̀ bụ ite e ledara anya, nke a kụriri akụri,Ka ọ̀ bụ ite na-enweghị onye chọrọ ya?
Gịnị mere a ga-eji chụpụ ya na ụmụ ya,Chụga ha n’obodo ha na-amaghị?’+
29 Ndị bi n’ụwa, nụrụnụ ihe Jehova kwuru.
30 Jehova kwuru, sị:
‘Deenụ n’akwụkwọ na nwoke a amụtaghị nwa.
Deekwanụ na ihe agaghị agaziri ya n’oge* niile ọ dị ndụ,N’ihi na e nweghị otu n’ime ụmụ yaGa-anọ n’ocheeze Devid chịa ọzọ na Juda.’”+
Ihe E Dere n'Ala Ala Peeji
^ Ma ọ bụ “n’obí.”
^ Ma ọ bụ “nwa na-enweghị nne na nna.”
^ Na Hibru, “awụfukwala ọbara.”
^ Na Hibru, “ga-edo ndị ga-ebibi gị nsọ.”
^ A na-akpọkwa ya Jehoahaz.
^ Ma ọ bụ “ọbara ọbara.”
^ Na Hibru, “n’ịwụfu ọbara.”
^ A na-akpọkwa ya Jehoyakin na Jekonaya.
^ Ma ọ bụ “mkpụrụ obi gị.”
^ Na Hibru, “Nebukadreza.” Ọ bụ otú ọzọ e si ede aha a.
^ Ma ọ bụ “mkpụrụ obi unu.”
^ Ma ọ bụ “n’ụbọchị.”
