Jeremaya 4:1-31
4 Jehova kwuru, sị, “Izrel, ọ bụrụ na ị lọghachi,Ọ bụrụ na ị lọghachikwute m,Ọ bụrụkwa na i wepụ arụsị gị dị iche iche na-asọ oyi n’ihu m,A gaghịzi enwe ihe na-achụgharị gị.+
2 Ọ bụrụkwa na ị na-ekwu eziokwu, na-ekpe ikpe ziri ezi, na-emekwa ezi omume ma na-aṅụ iyi, sị,‘Eji m Jehova, bụ́ Chineke dị ndụ, ṅụọ iyi,’Mgbe ahụ, ọ* ga-agọzi mba dị iche iche.
Ha ga-ejikwa ya na-anya isi.”+
3 N’ihi na Jehova gwara ndị Juda na ndị bi na Jeruselem, sị:
“Kọọnụ ihe n’ala unu na-akọbeghị ihe.
Kwụsịkwanụ ịkụ mkpụrụ ebe ogwu dị.+
4 Ndị Juda na ndị bi na Jeruselem,Debenụ onwe unu ọcha n’anya mụnwa bụ́ Jehova,Debekwanụ obi unu ọcha,*+Ka iwe m ghara ịdị ọkụMa ree unu, n’enweghị onye ga-emenyụ ya,N’ihi àgwà ọjọọ unu.”+
5 Kọsaanụ ihe a na Juda, kwusaakwanụ ya na Jeruselem.
Tienụ mkpu, fụọkwanụ opi n’ala a niile.+
Tienụ ezigbo mkpu, sị: “Zukọtanụ,Ka anyị gbaga n’obodo ndị a rụsiri ike.+
6 Gwunyenụ ihe ga-egosi ụzọ e si aga Zayọn.
Chọtanụ ebe unu ga-agbaba. Unu eguzola otu ebe,”N’ihi na m ga-esi n’ebe ugwu mee ka e nwee ọdachi,+ nke ga-ebibi ọtụtụ ihe.
7 Onye na-ebibi mba dị iche iche apụtala+Dị ka ọdụm si n’ọhịa ọ nọ pụta.+
O sila n’obodo ya pụta ka o mee ka ala gị bụrụ ihe na-awụ akpata oyi.
Obodo gị niile ga-aghọ ikpo nkume. E nweghịkwa onye ga-ebi na ha.+
8 N’ihi ya, yirinụ ákwà iru uju,+Ruwenụ uju,* bewekwanụ ákwá,N’ihi na ezigbo iwe Jehova na-ewesa anyị adajụbeghị.
9 Jehova kwuru, sị,“N’ụbọchị ahụ, obi ga-awụnye eze na ndị isi n’afọ.+
Ụjọ ga-atụ ndị nchụàjà, ihe na-emenụ ejukwa ndị amụma anya.”+
10 M kwuziri, sị: “Ewoo, Ọkaakaa Onyenwe anyị Jehova! N’eziokwu, ị ghọgbuola ndị Juda na ndị bi na Jeruselem.+ Ọ fọrọ obere ka e jiri mma agha gbuo anyị,* ma, ị na-agwa anyị, sị, ‘Udo ga-adịrị unu.’”+
11 N’oge ahụ, a ga-agwa ndị Juda, gwakwa ndị bi na Jeruselem, sị:
“E nwere ifufe na-ekpo ọkụ nke si n’ugwu ndị dị n’ọzaraFere na-aga ebe ndị m* nọ.
O feghị na-abịa ka ọ fụchaa ihe ma ọ bụ ka o mee ka ihe dị ọcha.
12 Ọ bụ m mere ka ifufe ahụ nke na-efesi ike si ebe ndị ahụ fere na-abịa.
Ugbu a, m ga-agwa ndị m ihe m kpebiri ime ha.
13 Ndị iro unu ga-abịa otú mmiri rujuru n’ígwé si ebido izo.
Ụgbọ ịnyịnya ha dịkwa ka oké ifufe.+
Ịnyịnya ha na-efe ọsọ karịa ugo.+
Anyị efuola, n’ihi na a ga-ebibi anyị!
14 Jeruselem, sachapụ ihe ọjọọ n’obi gị, ka a zọpụta gị.+
Olee mgbe ị ga-akwụsị ịna-eche ihe ọjọọ n’obi gị?
15 E nwere onye na-akọ gbasara ọdachi ga-eme na Dan,+Na-akọkwa gbasara ọdachi ga-eme n’Ifrem.
16 Gwanụ mba dị iche iche gbasara ya.
Kọsaanụ ya na Jeruselem.”
“Ndị nche* si n’ala dị anya na-abịa.
Ha ga-etikwa mkpu agha iji lụso obodo ndị dị na Juda agha.
17 Ha agbaala Jeruselem gburugburu otú ndị na-eche ubi nche si agba ubi ha na-eche nche gburugburu,+N’ihi na ndị bi na ya enupụrụla m isi.”+ Ọ bụ Jehova kwuru ihe a.
18 “A ga-ata gị ahụhụ maka otú i si akpa àgwà na ihe ndị ị na-eme.+
Ọdachi nke ga-adakwasị gị ga-adị egwu,N’ihi na isi ị na-enupụrụ m si gị n’ala ala obi.”
19 Efuola m.* Efuola m!
Obi na-egbusi m mgbu ike.
Obi na-akụ m kpum kpum.
Enweghị m ike ịgbachi nkịtị,N’ihi na anụla m* ụda opi,Ya bụ, ụda opi agha.*+
20 A na-akọ akụkọ ọdachi ndị na-eme, otu mechaa, ibe ya esochie,N’ihi na e bibiela ala a niile.
E bibiela ụlọikwuu m na mberede.
E bibiekwala ákwà ụlọikwuu m n’otu ntabi anya.+
21 Olee mgbe m ga-akwụsị ịhụ ihe na-egosi ụzọ e si aga Zayọn,Kwụsịkwa ịnụ ụda opi?+
22 “N’ihi na ndị m dị nzuzu.+
Ha amaghị m.
Ha bụ ụmụ na-amaghị ihe. Ha anaghịkwa aghọta ihe.
Ụbụrụ na-aghọ ha nkọ* ma a bịa n’ime ihe ọjọọ,Ma, ha amaghị otú e si eme ihe ọma.”
23 Mgbe m lere anya n’ala ha, ọ tọgbọ chakoo, bụrụkwa ebe e bibiri ebibi.+
Mgbe m lekwara anya n’eluigwe, ìhè ya adịghịzi.+
24 Mgbe m lere anya n’ugwu dị iche iche, ha nọ na-ama jijiji.
Ugwu nta dị iche iche nọkwa na-ama jijiji.+
25 Elere m anya, ma, e nweghị onye m hụrụ.
Nnụnụ niile efepụchaakwala.+
26 Ahụkwara m na ebe a kụrụ mkpụrụ osisi aghọọla ala ịkpa.
E bibiekwala obodo ndị dị n’ala a.+
Ọ bụ Jehova bibiri haN’ihi ezigbo iwe ji ya.
27 Jehova kwuru, sị: “Ala ahụ niile ga-aghọ ikpo nkume,+Ma agaghị m ebibi ya kpamkpam.
28 N’ihi ya, ala ahụ ga-eru uju.+
Eluigwe ga-agbakwa ọchịchịrị.+
Ọ bụ n’ihi na ekwuola m ya. Ekpebiela m ya.
Agaghị m agbanwe obi m.* Agaghịkwa m ahapụ ime ya.+
29 Ndị obodo ahụ niile na-agba ọsọ+N’ihi mkpọtụ ndị na-agba ịnyịnya na ndị na-agba ụta na-eme.
Ha na-agbaba n’ọhịa dị iche iche,Ha na-agbagokwa n’elu nnukwu nkume dị iche iche.+
Ha agbapụla n’obodo niile.
E nweghịkwa onye bi na ha.”
30 Ugbu a e bibiri ihe niile i nwere, gịnị ka ị ga-eme?
Ị na-eyibu ákwà dị oké ọnụ.
Ị na-ejibu ihe e ji achọ mma e ji ọlaedo mee achọ onwe gị mma.
Ị na-etebu uri anya ka anya gị maa ezigbo mma.
Ma, ọ bụ n’efu ka ị nọ na-achọ onwe gị mma,+N’ihi na ndị ọ na-agụ agụụ ka gị na ha kwaa iko ajụla gị.
Ha na-achọzi igbu gị.*+
31 N’ihi na m nụrụ olu yiri nke nwaanyị ahụ́ na-egbu mgbu,Ya bụ, mkpu ákwá nke na-ada ka nke nwaanyị na-amụ nwa mbụ ya.
Ọ bụ olu Zayọn,* onye ọ na-esiri ike ikute ume.
Ọ gbasara ọbụ aka ya, na-asị:+
“Efuola m, maka na ike agwụla m* n’ihi ndị na-egbu mmadụ!”
Ihe E Dere n'Ala Ala Peeji
^ Ya bụ, Jehova.
^ Na Hibru, “Bienụ onwe unu úgwù maka Jehova, biekwanụ obi unu úgwù.”
^ Ma ọ bụ “Tiwenụ aka n’obi.”
^ Ma ọ bụ “mkpụrụ obi anyị.”
^ Na Hibru, “ada bụ́ ndị m.”
^ Ya bụ, ndị na-eleru obodo anya ka ha mara mgbe ha ga-aga lụso ya agha.
^ Na Hibru, “Eriri afọ m.”
^ Ma ọ bụ “mkpụrụ obi m anụla.”
^ O nwere ike ịbụ, “ndị na-eti mkpu agha.”
^ Ma ọ bụ “Ha ma ihe.”
^ Ma ọ bụ “akwa mmakwaara.”
^ Ma ọ bụ “mkpụrụ obi gị.”
^ Na Hibru, “ada bụ́ Zayọn.”
^ Ma ọ bụ “mkpụrụ obi m.”