Job 17:1-16
17 “Obi agbawaala m. Anwụọla m anwụọ.
Ili na-echere m.+
2 Ndị na-akwa mmadụ emo gbara m gburugburu,+Anya m na-elekwa otú ha si enupụ isi.
3 Biko, kwe m nkwa na ị ga-akwado m.
È nwere onye ọzọ ga-enyere m aka?+
4 N’ihi na i meela ka ha ghara ịna-aghọta ihe.+
Ọ bụ ya mere na ị naghị ebuli ha elu.
5 Ha nwere ike ịgwa ndị enyi ha ka ha na ha kee ihe ndị ha nwere,Ma agụụ ana-eme ka ụmụ ha ghara ịhụcha ụzọ.
6 O meela ka m bụrụ onye ndị mmadụ ji eme ihe ọchị,*+Mụ abụrụzie onye ha na-agbụ asọ mmiri n’ihu.+
7 Uju m na-eru emeela ka anya m na-ahụzi inyoghi inyoghi.+
Aka m abụọ na ụkwụ m abụọ adịghịzi otú ha dịbu.
8 Ndị ezi omume kporopụrụ anya na-ele ihe a na-emenụ,Obi na-ajọkwa onye aka ya dị ọcha njọ n’ihi ndị na-anaghị asọpụrụ Chineke.*
9 Onye ezi omume anaghị akwụsị ime ezi omume.+
Onye aka ya dị ọcha na-esikwu ike.+
10 Ma, unu niile nwere ike ịbịa malitekwa ịrụ ụka,N’ihi na ahụbeghị m onye ma ihe n’ime unu.+
11 Ndụ m agwụla agwụ.+
A kụghasịala ihe ndị dị m n’obi m chọrọ ime.+
12 Ha na-agbanwe abalị ka ọ bụrụ ehihie,Na-asị, ‘Ebe ọ bụ na ọchịchịrị agbaala, chi abọwala.’
13 Ọ bụrụ na mụ echere, m ga-agazi biri n’ili.*+
M ga-agbasa ihe ndina m* n’ọchịchịrị.+
14 M ga-eji oké olu gwa olulu,*+ sị, ‘Ị bụ nna m!’
Gwakwa ikpuru, sị, ‘Ị bụ nne m na nwanne m nwaanyị!’
15 Oleezi ebe olileanya m dị?+
Ònye chere na m nwere olileanya?
16 Ọ* ga-agbada banye n’ọnụ ụzọ ili,* bụ́ nke e mechiri emechi,Mgbe anyị niile ga-agbadakọta n’ájá.”+
Ihe E Dere n'Ala Ala Peeji
^ Na Hibru, “ji atụ ilu.”
^ Ma ọ bụ “ndị kwụsịrị ife Chineke fewe chi ọzọ.”
^ Ma ọ bụ “na Shiol.” Gụọ Nkọwa Okwu.
^ Ma ọ bụ “àkwà m.”
^ Ma ọ bụ “ili.”
^ Ya bụ, olileanya m.
^ Ma ọ bụ “Shiol.” Gụọ Nkọwa Okwu.