Job 18:1-21
18 Bildad+ onye Shua kwuru, sị:
2 “Olee mgbe unu* ga-akwụsị ụdị okwu a unu na-ekwu?
Gositụnụ na unu na-aghọta ihe ka anyị nwee ike ikwu okwu.
3 Gịnị mere unu ga-eji were anyị ka anụmanụ,+Na-elekwa anyị anya ka ndị iberiibe?*
4 Ọ bụrụgodị na iwe ị na-ewe emee ka ị dọrie onwe gị,*À ga-agbapụrụ gị n’ụwa,Ka oké nkume ọ̀ ga-esi n’ebe ọ dị pụọ?
5 N’eziokwu, a ga-emenyụ ọkụ onye ajọ omume,Ire ọkụ ya agaghịkwa enwu.+
6 Ọkụ nke na-enwu n’ụlọikwuu ya ga-agba ọchịchịrị,A ga-afụnyụkwa ọkụ* o konyere n’ụlọikwuu ya.
7 A ga-eme ka otú o si azọsi ụkwụ ike n’ala belata,Atụmatụ ya ga-emekwa ka ọ daa.+
8 N’ihi na ụkwụ ya ga-eduba ya n’ụgbụ.
Ọ ga-agara banye na ya.
9 Ọnyà ga-ama ya n’ikiri ụkwụ.
Ọnyà ga-ejide ya.+
10 E zoro ụdọ n’ala ka e jiri ya jide ya,E sikwara ọnyà n’ebe o si agafe.
11 Ihe niile gbara ya gburugburu na-emenye ya ụjọ,+Ụjọ na-emekwa ka ọ nọrọ n’ọsọ mgbe niile.
12 Ike na-agwụ ya,
Ọdachi+ ga-emekwa ka ọ na-adagharị.*
13 Ọrịa na-eri akpụkpọ ahụ́ ya.
Ọrịa kacha njọ na-erichapụ aka ya na ụkwụ ya.
14 A ga-esi n’ụlọikwuu ya, bụ́ ebe obi ruru ya ala, kpụpụta ya+Kpọgara ya eze kacha emenye mmadụ ụjọ.*
15 Ndị ọbịa* ga-ebi n’ụlọikwuu ya.
A ga-eji ọkụ* bibie ụlọ ya.+
16 Mgbọrọgwụ ya ga-akpọ nkụ n’ime ala,Alaka ya ga-akpọnwụkwa.
17 A gaghị na-echeta ya n’ụwa,A gaghịkwa ama aha ya* n’okporo ámá.
18 A ga-esi n’ìhè chụba ya n’ọchịchịrị,A ga-achụpụkwa ya n’ụwa.
19 Ọ gaghị enwe ụmụ na ụmụ ụmụ n’ebe ndị obodo ya bi,E nweghịkwa onye ga-afọrọ ya ndụ n’ebe o bi.*
20 N’ụbọchị ọdachi ga-adakwasị ya, akpata oyi ga-awụ ndị nọ n’Ebe Ọdịda Anyanwụ,Egwu ga-ejidekwa ndị nọ n’Ebe Ọwụwa Anyanwụ.
21 Ọ bụ ihe na-eme ụlọikwuu onye na-eme ihe ọjọọ,Ọ bụkwa ihe na-eme ụlọ onye na-amaghị Chineke.”
Ihe E Dere n'Ala Ala Peeji
^ Ọ ga-abụ Job, ndị dị ka ya, ma ọ bụ ndị na-emetara ya ebere.
^ O nwere ike ịbụ, “ndị na-adịghị ọcha.”
^ Ma ọ bụ “mkpụrụ obi gị.”
^ Ma ọ bụ “oriọna.”
^ Ma ọ bụ “na-ete ụkwụ.”
^ Ya bụ, a ga-eme ka ọ nwụọ ọnwụ ike.
^ Na Hibru, “Ihe na-abụghị nke ya.”
^ Ma ọ bụ “sọlfọ na-ere ọkụ.”
^ Na Hibru, “Ọ gaghị enwe aha.”
^ Ma ọ bụ “n’ebe o bi ka mbịarambịa.”