Job 21:1-34
21 Job wee sị:
2 “Geenụ ntị nke ọma n’ihe m na-ekwu,Ka ọ bụrụ otú unu ga-esi kasie m obi.
3 Nweerenụ m ndidi ka m kwuo okwu.
M kwuchaa, unu nweziri ike ịkwa m emo.+
4 Ọ̀ bụ mmadụ ka m na-ekpesara?
Ọ bụrụ na ọ bụ mmadụ, ọ̀ bụ na ike inwe ndidi agaghị agwụ m?
5 Lewenụ m anya, ka akpata oyi wụọkwa unu n’ahụ́.
Kpuchienụ aka n’ọnụ.
6 M chewe banyere ya, obi anaghị ezu m ike,Ahụ́ m niile na-amakwa jijiji.
7 Gịnị mere ndị ajọ omume ji adị ndụ,+Kaa nká, baakwa ọgaranya?*+
8 Ha na-ahụ ka ụmụ ha na-eto ghọọ mmadụ,Ha na-ahụkwa ụmụ ụmụ ha.
9 Udo na-adị n’ụlọ ha. Ụjọ anaghị atụ ha,+Chineke anaghịkwa ata ha ahụhụ.
10 Oké ehi ha na-agba nne ehi n’enweghị nsogbu ọ bụla.
Nne ehi ha na-amụ ụmụ, ime anaghịkwa apụ ha.
11 Ụmụaka ha ndị nwoke na-agbagharị n’èzí otú ewu na atụrụ si agbagharị,Ụmụ ha na-awụgharịkwa.
12 Ha na-eji obere ịgbà na ụbọ akwara agụ egwú,Na-aṅụrịkwa ọṅụ mgbe ha na-anụ ụda ọjà.+
13 Ha na-enwe obi ụtọ n’oge niile ha dị ndụ,Ha na-anwụkwa n’udo,* e lie ha n’ili.*
14 Ma ha na-asị ezi Chineke, ‘Hapụ anyị aka!
Anyị achọghị ịma ihe i nyere n’iwu.*+
15 Ònye bụ Onye Pụrụ Ime Ihe Niile nke mere anyị ga-eji fee ya?*+
Olee uru anyị ga-erite ma anyị na ya dịrị ná mma?’+
16 Ma ama m na ọ bụghị ha na-eme ka ihe na-agaziri ha.+
Anaghị m eche echiche otú ndị ajọ omume si eche.+
17 Ugboro ole ka e menyụrụla ọkụ* ndị ajọ omume?+
Ugboro ole ka ọdachi na-abịara ha?
Ugboro ole ka Chineke jitụrụla iwe bibie ha?
18 È nwere mgbe ha na-adị ka ahịhịa ọka* ifufe na-ebugharị,Ma ọ̀ bụ ka mkpo ọka oké ifufe na-ebupụ?
19 Ọ bụrụ na mmadụ emee ihe ọjọọ, Chineke ga-ata ụmụ ya ahụhụ ihe o mere.
Ma ka Chineke kwụọ ya ụgwọ ihe o mere ka ọ hụ ya.+
20 Ka o jiri anya ya hụ otú a ga-esi laa ya n’iyi,Ka ọ bụrụkwa ya ka Onye Pụrụ Ime Ihe Niile ga-ewesa iwe ya.*+
21 N’ihi na ọ bụrụ na ọ nwụchuo ọnwụ,È nwere ihe na-eme n’ụlọ ya ka gbasara ya?+
22 È nwere onye ga-akụziri Chineke ihe,+Ebe ọ bụ Chineke na-ekpe ndị kacha elu ikpe?+
23 Otu onye na-anwụ mgbe ike ndụ ka juru ya ahụ́,+Mgbe ọ na-enweghị ihe ọ bụla na-echegbu ya nakwa mgbe obi ruru ya ala,+
24 Mgbe apata ụkwụ ya bụ abụba abụba,Mgbe ọkpụkpụ ya ka gbasikwara ike.*
25 Ma onye ọzọ na-atagide ahụhụ nwụọ,N’enweghị mgbe o kporiri ndụ.
26 Ha abụọ ga-alaghachi n’ájá,+Ikpuru ga-ekpuchikwa ha abụọ.+
27 Lee, ama m ihe unu na-eche,Marakwa atụmatụ unu chọrọ iji mesie m ike.+
28 N’ihi na unu na-asị, ‘Oleezi ụlọ onye ahụ a ma ama?
Oleekwa ụlọikwuu onye ajọ omume bibu?’+
29 Ọ̀ bụ na unu ajụbeghị ndị na-aga ebe dị iche iche ase?
Ọ̀ bụ na unu anaghị echebara ihe ndị ha chọpụtara echiche nke ọma,
30 Na a na-ahapụ onye ọjọọ ndụ n’ụbọchị ọdachi,
Napụtakwa ya n’ụbọchị oké iwe?
31 Ònye ga-ajụ ya ajụjụ maka ihe ọ na-eme?
Ònyekwa ga-akwụ ya ụgwọ ihe o mere?
32 Mgbe a na-ebuga ya n’ebe a ga-eli ya,A ga-eche ili ya nche.
33 Ájá ndị e ji kpochie ya ga-atọ ya ụtọ,+Mmadụ niile na-esorokwa ya n’azụ*+
Ka imirikitiimi ndị bu ya ụzọ.
34 Gịnịzi mere unu ji jiri okwu na-enweghị isi na-akasi m obi?+
Ihe niile unu na-aza m bụ ụgha.”
Ihe E Dere n'Ala Ala Peeji
^ Ma ọ bụ “bụrụkwa ndị ukwu.”
^ Ma ọ bụ “n’otu ntabi anya,” ya bụ, ha na-anwụ n’ataghị ahụhụ.
^ Ma ọ bụ “na Shiol.” Gụọ Nkọwa Okwu.
^ Na Hibru, “ịmata ụzọ gị.”
^ Na Hibru, “jeere ya ozi.”
^ Ma ọ bụ “oriọna.”
^ Ọka a nwere ike ịbụ ọka wit ma ọ bụ ọka bali.
^ Na Hibru, “ga-aṅụ ọnụma Onye Pụrụ Ime Ihe Niile.”
^ Na Hibru, “Mgbe ụmị ọkpụkpụ ya ka dị mmiri mmiri.”
^ Na Hibru, “Ọ ga-adọkpụrụkwa mmadụ niile ka ha soro ya.”
