Job 9:1-35
9 Job kwuru, sị:
2 “N’eziokwu, ama m na ọ bụ otú a ka ọ dị.
Ma, olee otú ọ ga-esi bụrụ mmadụ efu ka aka ya dị ọcha n’okwu ya na Chineke?+
3 Ọ bụrụ na mmadụ achọọ ka ya na Chineke rụọ ụka,*+Onye ahụ agaghị azali otu ajụjụ n’ime otu puku ajụjụ Chineke ga-ajụ.
4 Ọ ma ihe, ike ya dịkwa ukwuu.+
Ònye ga-ama ya aka, a ghara imerụ onye ahụ ahụ́?+
5 Ọ na-ebupụ* ugwu, ma mmadụ anaghị ama.
Ọ na-eji iwe ya akwatu ha.
6 Ọ na-eme ka ụwa maa jijiji n’ebe ọ dị,Nke na-eme ka ogidi ndị ji ya maa jijiji.+
7 Ọ na-enye anyanwụ iwu ka ọ ghara ịcha,Na-ekpuchikwa ìhè kpakpando dị iche iche.+
8 Ọ bụ yanwa na-agbasa eluigwe ka ákwà,+Na-agakwa ije n’elu ebili mmiri nke oké osimiri.+
9 O kere ìgwè kpakpando Ash,* ìgwè kpakpando Kisịl,* na ìgwè kpakpando Kaịma,*+Keekwa ìgwè kpakpando ndị dị na mbara igwe ebe ndịda.*
10 Ọ na-eme nnukwu ihe ndị a na-enweghị ike ịchọpụta achọpụta,+Ihe ndị dị ebube a na-enweghị ike ịgụ ọnụ.+
11 Ọ na-agafe n’akụkụ m, ma anaghị m ahụ ya.
Ọ na-agafe m, ma anaghị m ama.
12 Ọ bụrụ na ọ napụwa mmadụ ihe, è nwere onye ga-egbochi ya?
Ònye ga-asịli ya, ‘Gịnị ka ị na-eme?’+
13 Chineke agaghị eme ka iwe ya dajụọ.+
Ndị na-enyedịrị Rehab*+ aka ga-adara ya n’ala.
14 N’ihi ya, mgbe m na-asa ya okwu,M ga-elezi anya họrọ okwu m ga-agwa ya.
15 Ọ bụrụgodị na aka m dị ọcha, agaghị m asa ya okwu.+
Naanị arịrịọ ka m ga na-arịọ onye na-ekpe m ikpe* ka o meere m ebere.
16 Ọ bụrụ na mụ akpọọ ya, ọ̀ ga-aza m?
Ekwetaghị m na ọ ga-ege m ntị,
17 N’ihi na o ji oké ifufe na-emerụsị m ahụ́,Na-emekwa ka ọnyá na-apụtakwu m n’ahụ́ n’agbanyeghị na e nweghị ihe m mere.+
18 Ọ naghị ekwe ka m kuru ume.
Ọ na-eme ka nsogbu zuo m ahụ́.
19 A bịa n’ịdị ike, ọ bụ yanwa dị ike.+
A bịa n’ikpe ikpe ziri ezi, ọ ga-asị: ‘Ònye ka m ga-aza ajụjụ?’*
20 Ọ bụrụ na ọ bụ mụnwa bụ onye aka ya dị ọcha, ọnụ m ga-ama m ikpe.
Ọ bụrụgodị na e nweghị ihe a ga-eji taa m ụta,* ọ ga-asị na ikpe mara m.*
21 Ọ bụrụgodị na e nweghị ihe a ga-eji taa m ụta,* obi akaghị m.
Ndụ m agwụla m ike.*
22 E nweghị ihe dị iche. Ọ bụ ya mere m ji asị,‘Ọ na-ebibi ma onye aka ya dị ọcha ma onye ajọ omume.’
23 Ọ bụrụ na idei mmiri egbuo ndị mmadụ na mberede,Ọ ga-achị ndị aka ha dị ọcha ọchị na ha enweghị ike ịzọ onwe ha ndụ.
24 E nyefeela ụwa n’aka ndị ọjọọ.+
Ọ na-ekpuchi anya* ndị ikpe e nwere n’ụwa.
Ọ bụrụ na ọ bụghị ya na-eme ya, ọ̀ bụzi onye?
25 Ndụ m na-efezi ọsọ karịa onye na-agba ọsọ.+
O ji ọsọ na-agafe, ma e nweghị ihe ọma m na-ahụ.
26 Ọ na-agbafere ka ụgbọ epeepe e ji ahịhịa amị rụọ,Ka ugo nke na-efedata ka o buru ihe ọ ga-eri.
27 Ọ bụrụ na mụ asị, ‘M ga-akwụsị ikwu ihe na-enye m nsogbu n’obi,M ga-akwụsị ịgbarụ ihu m, nwewezie obi ụtọ,’
28 Ụjọ ka ga na-atụ m n’ihi mgbu ahụ́ niile na-egbu m,+Amakwa m na ị gaghị ewere m ka onye aka ya dị ọcha.
29 A ga-ewere m ka onye ikpe mara.*
Gịnịzi mere m ga-eji na-adọlị n’efu?+
30 Ọ bụrụ na mụ ejiri mmiri si na snoo na-agbaze agbaze saa ahụ́,Jirikwa ncha* kwọọ aka m,+
31 Ị ga-asụnyezi m n’olulu apịtị,Nke ga-emedị ka uwe m kpọọ m asị.
32 N’ihi na ọ bụghị mmadụ otú m bụ nke na m ga-asa ya okwu,Nke na mụ na ya ga-aga ikpe.+
33 E nweghị onye ga-ebiri mụ na ya ikpe,Onye nwere ike ịbụrụ anyị onyeikpe.*
34 Ọ bụrụ na ọ ga-akwụsị ịpịa m ihe,*Kwụsịkwa imenye m ụjọ,+
35 M ga-agwa ya okwu n’atụghị egwu,N’ihi na anaghị m eji ụjọ ekwu okwu.
Ihe E Dere n'Ala Ala Peeji
^ Ma ọ bụ “achọọ ịkpọpụ Chineke ụlọikpe.”
^ Ma ọ bụ “na-ewepụ.”
^ Na Hibru, “ime ime ụlọ ndị dị n’ebe ndịda.”
^ O nwere ike ịbụ kpakpando Pledis ndị dị n’ìgwè kpakpando a na-akpọ Tọrọs.
^ O nwere ike ịbụ ìgwè kpakpando a na-akpọ Ọrayọn.
^ O nwere ike ịbụ ìgwè kpakpando a na-akpọ Nnukwu Anụ Bea (Ọsa Mejọ).
^ O nwere ike ịbụ na Rehab a bụ nnukwu anụ mmiri.
^ O nwere ike ịbụ, “onye mụ na ya nwere ikpe.”
^ Na Hibru, “Ònye ga-akpọ m ikpe?”
^ Ma ọ bụ “Ọ bụrụgodị na m kwụsiri ike n’ebe ọ nọ.”
^ Na Hibru, “na m gbagọrọ agbagọ.”
^ Ma ọ bụ “Ọ bụrụgodị na m kwụsiri ike n’ebe ọ nọ.”
^ Ma ọ bụ “M kpọọla ndụ m asị.”
^ Na Hibru, “ihu.”
^ Na Hibru, “ka onye ajọ omume.”
^ Ma ọ bụ “akanwụ.”
^ Na Hibru, “ibikwasị anyị abụọ aka.”
^ Na Hibru, “ga-ewepụ ụtarị ya n’ahụ́ m.”