NA-ECHENỤ NCHE!
Tigbuo Zọgbuo A Na-eme n’Ihi Ndọrọ Ndọrọ Ọchịchị—Gịnị Ka Baịbụl Kwuru?
A na-emezi tigbuo zọgbuo n’ihi ndọrọ ndọrọ ọchịchị n’ebe niile n’ụwa, ihe a emeekwala ka ndị mmadụ chịrị obi n’aka.
Na Meziko, e gburu mmadụ iri atọ na itoolu ndị so azọ ọchịchị ná ntụliaka nke afọ 2023 na 2024. Nke a bụkwa mbụ a na-egburu mmadụ ole a. Ogbugbu e gburu ndị a nakwa tigbuo zọgbuo ndị ọzọ a na-eme n’ihi ndọrọ ndọrọ ọchịchị tụrụ ndị mmadụ n’anya, meekwa ka uche ha pụọ ná ntụliaka e mere n’oge ahụ.
Na nso nso a, e nweela ọtụtụ tigbuo zọgbuo e mere n’oge a n’ihi ndọrọ ndọrọ ọchịchị na Yurop, ma mgbagbu a nwara ịgbagbu osote onyeisi ala Slovakịa n’abalị iri na ise n’ọnwa Mee afọ 2024.
Ụjọ ejidela ndị Amerịka n’ihi mgbagbu a nwara ịgbagbu Donald Trump, bụ́ onye bụbu onyeisi ala ha, n’abalị iri na atọ n’ọnwa Julaị afọ 2024.
Gịnị mere e ji enwe ọtụtụ tigbuo zọgbuo n’ihi ndọrọ ndọrọ ọchịchị? È nwere mgbe ọ ga-akwụsị? Gịnị ka Baịbụl kwuru?
Mgbe a ga-akwụsị tigbuo zọgbuo ndọrọ ndọrọ ọchịchị na-akpata
Baịbụl buru amụma na n’oge anyị a, nke ọ kpọrọ “oge ikpeazụ,” ọtụtụ ndị ga na-akpa àgwà ndị na-akpata tigbuo zọgbuo na esemokwu.
“Oge ikpeazụ ga-adị oké egwu, taakwa akpụ. N’ihi na ndị mmadụ ga-abụ . . . ndị na-anaghị ekele onye meere ha ihe, ndị na-agharịpụ ndị ọzọ, . . . ndị na-anaghị achọ ka ha na ndị ọzọ kwekọrịta n’ihe ọ bụla, . . . ndị tigbuo zọgbuo, . . . ndị na-eme ndị enyi ha ihe ọjọọ, ndị isi ike, ndị onwe ha na-ebu isi.”—2 Timoti 3:1-4.
Baịbụl bukwara amụma na n’oge a, a ga-enwe ọgba aghara ndị dị ka inupụrụ ndị ọchịchị isi na tigbuo zọgbuo n’ihi ndọrọ ndọrọ ọchịchị. (Luk 21:9) Ma tigbuo zọgbuo na esemokwu ndị a agaghị adị ruo mgbe ebighị ebi.
Mgbe a ga-akwụsị tigbuo zọgbuo ndọrọ ndọrọ ọchịchị na-akpata
Baịbụl kwuru na Chineke ga-eji Alaeze ya nke dị n’eluigwe dochie ọchịchị ụmụ mmadụ.
“Chineke nke eluigwe ga-eme ka otu alaeze . . . malite ịchị. Alaeze ahụ ga-egwepịa alaeze ndị a niile, mee ka ha ghara ịdịkwa, ma naanị ya ga-adịru mgbe ebighị ebi.”—Daniel 2:44.
Alaeze Chineke ga-eme ka ndị mmadụ dịrị n’otu n’eziokwu, udo adịkwa ebe niile n’ụwa.
Ọ bụ Jizọs Kraịst ga-achị n’Alaeze ahụ. A kpọrọ ya “Onyeisi Udo,” ọ ga-emekwa ka udo ghara ịkwụsị ịdị.—Aịzaya 9:6, 7.
Ndị Alaeze ahụ na-achị ugbu a na-amụta otú ha na ibe ha ga-esi na-adị n’udo. Ọ bụ ya mere Baịbụl ji kwuo, sị: “Ha ga-akpụgharị mma agha ha ka ha bụrụ mma ogè, kpụgharịakwa ube ha ka ha bụrụ mma e ji akwa osisi. Mba agaghị eweli mma agha lụso mba ọzọ agha. Ha agaghịkwa amụ otú e si alụ agha.”—Aịzaya 2:3, 4.
Ị chọọ ịmatakwu banyere ihe a, gụọ isiokwu bụ́ “Gịnị Ka Alaeze Chineke Ga-eme?” leekwa vidio bụ́ Gịnị Bụ Alaeze Chineke?
Isiokwu A Nwekwara Ike Ịmasị Gị
ỤLỌ NCHE
Olee Ihe Ndị Alaeze Chineke Ga-eme?
Jizọs ma na ọ bụ naanị Alaeze Chineke ga-akwụsị nsogbu ndị e nwere n’ụwa. Olee ihe ndị Alaeze Chineke merela ga-eme ka obi sie anyị ike na ọ ga-akwụsị nsogbu ndị e nwere n’ụwa?
NA-ECHENỤ NCHE!
Ndị Mmadụ Anaghịzi Atụkwasị Ndị Ndọrọ Ndọrọ Ọchịchị Obi—Gịnị Ka Baịbụl Kwuru?
Baịbụl gwara anyị ka anyị leruo anya iji mara onye anyị kwesịrị ịtụkwasị obi, gwakwa anyị naanị otu ihe e ji n’aka ga-eme ka ọdịnihu ka mma.
NA-ECHENỤ NCHE!
Gịnị Mere Ndọrọ Ndọrọ Ọchịchị Ji Eme Ka Ọtụtụ Ndị Ghara Ịdị n’Otu?—Gịnị Ka Baịbụl Kwuru
N’ebe niile n’ụwa, ndị mmadụ adịghị n’otu maka na ha nọ n’òtù ndọrọ ndọrọ ọchịchị dị iche iche. Baịbụl kwuru onye ọchịchị ga-emeli ka ndị mmadụ dịrị n’otu.
ỤLỌ NCHE
Ònye Ka Chineke Họọrọ Ịchị Ụwa?
ISIOKWU NDỊ ỌZỌ
Olileanya E Ji n’Aka na Ihe Ga-adị Mma n’Ọdịnihu
Gịnị mere ihe ndị Baịbụl kwuru na ha ga-eme ji dị iche n’ihe ụmụ mmadụ kwuru na ha ga-eme?
