Gịnị Ka Nnụnụ Pụrụ Ịkụziri Onye Mkpọrọ?

SITE N’AKA ONYE NTA AKỤKỌ TETA! NA SOUTH AFRICA

DỊ KA e dere na Sunday Tribune nke Durban, South Africa, nnụnụ na-ekere òkè n’ịgbanwe obi ndị mkpọrọ nọ n’Ụlọ Mkpọrọ Pollsmoor. Mmadụ 14 a mara ikpe na-ekere òkè ugbu a n’ihe omume metụtara ilekọta icheoku n’ọnụ ụlọ mkpọrọ ha.

Olee otú ihe omume ahụ si aga? Onye mkpọrọ nke ọ bụla na-ekere òkè nwere ihe na-abụ àkwá aka mere n’ọnụ ụlọ mkpọrọ ya. A na-enye onye mkpọrọ ahụ otu nwa nnụnụ a bụrụ ọhụrụ ilekọta, bụ́ onye na-enye nwa nnụnụ ahụ nri n’ọnụ kwa otu awa ma ọ bụ abụọ, ehihie na abalị, ruo ihe dị ka izu ise. Mgbe ahụ a na-etinye nnụnụ ahụ n’ime ụlọ nnụnụ, bụ́ nke a na-edebekwa n’ime ọnụ ụlọ mkpọrọ ahụ. Mgbe nnụnụ ahụ toro, a na-eresị ya ọha na eze. Ụfọdụ ndị mkpọrọ na-enwe oké mmasị ná nnụnụ ha nke na ha na-ebe ákwá mgbe a na-ewepụ ha.

A na-ahụ ọbụna ka ụfọdụ ndị omekome obi tara mmiri na-aghọ ndị nwere obi ọmịiko ma na-eme nwayọọ nwayọọ mgbe ha gwasịrị nnụnụ ndị ahụ okwu ma lekọta ha kwa ụbọchị. Otu onye mkpọrọ kwuru, sị: “Ana m azụ nnụnụ ndị ahụ, ma ha azụwokwa m.” Onye ọzọ kwuru na nnụnụ ndị ahụ kụziiri ya inwe ndidi na njide onwe onye. Otu onye ohi a mara ikpe kwuru na ilekọta nnụnụ mere ka ya ghọta na ịbụ nne ma ọ bụ nna “bụ nnukwu ibu ọrụ”—ihe ọ na-emeghịrị ụmụ ya mgbe a na-atụbeghị ya mkpọrọ.

Ilekọta nnụnụ ndị a nwere abamuru ọzọ nye ndị mkpọrọ. “Site na nkà ha mụtara n’ebe a,” ka Wikus Gresse, bụ́ onye chepụtara ihe omume ahụ, na-ekwu, “ndị na-azụ nnụnụ ma ọ bụ ndị na-agwọ ụmụ anụmanụ ọrịa pụrụ inye ha ọrụ ma ha pụọ.”