Nsogbu Dị n’Ụlọ Mkpọrọ

“Iwukwu ụlọ mkpọrọ iji kwụsị mpụ yiri iwukwu ebe a na-eli ozu iji kwụsị ọrịa na-egbu egbu.”—ROBERT GANGI, ỌKÀ N’ỊGBAZI OMUME.

N’ỤWA ebe a na-ejikarị ire ụtọ ekpuchi ọnọdụ ọjọọ, anyị nwere okwu ndị ọzọ dị mma a pụrụ iji dochie anya okwu na-akụda mmụọ bụ́ “ụlọ mkpọrọ.” Anyị na-ahọrọ “ebe a na-edebe ndị e ji eji” ma ọ bụ “ogige mgbazi omume,” bụ́ ebe a na-enye “ọzụzụ n’ọrụ nkà” ma na-ejere “ọha na eze ozi.” Anyị na-eji ọbụna okwu bụ́ “onye e ji eji” eme ihe kama iji okwu na-egosi afọ ịta mmiri bụ́ “onye mkpọrọ.” Ma, leba anya n’ime, ị ga-ahụ na ụlọ mkpọrọ na-eche nsogbu ndị siri ike ihu taa, dị ka ihe na-adịwanye ukwuu ọ na-efu iji debe ndị dara iwu n’ụlọ mkpọrọ na ọdịiche na-ebuwanye ibu nke dị n’etiti nzube nke ịtụ mkpọrọ na ihe ndị ọ na-arụpụta n’ezie.

Ụfọdụ ndị ekwetaghị na ụlọ mkpọrọ na-arụpụta ihe. Ha na-ekwu na ọ bụ ezie na ọnụ ọgụgụ ndị mkpọrọ nọ n’ụwa nile arịruwo ihe karịrị nde asatọ, ọnụ ọgụgụ mpụ a na-eme n’ọtụtụ ala adalatabeghị nke ukwuu. Ọzọkwa, ọ bụ ezie na ọnụ ọgụgụ buru ibu nke ndị a tụrụ mkpọrọ bụ n’ihi mpụ ndị metụtara ọgwụ ọjọọ, nnweta a pụrụ inweta ọgwụ ọjọọ n’ebe ndị a na-eme mpụ ka na-akpata oké nchegbu.

Ka o sina dị, ọtụtụ ndị na-ele ịtụ mkpọrọ anya dị ka ntaramahụhụ ha ga-ahọrọ. Mgbe a tụrụ onye ahụ dara iwu mkpọrọ, ha na-eche na ọ bụ ihe kwesịịrị ya. Otu odeakụkọ kọwara ịnụ ọkụ n’obi e ji atụ ndị omempụ mkpọrọ dị ka “ntịwapụ nke ịtụ mkpọrọ.”

E nwere ihe anọ bụ́ isi mere e ji atụba ndị dara iwu n’ụlọ mkpọrọ: (1) iji nye ndị dara iwu ntaramahụhụ, (2) iji chebe ọha na eze, (3) iji gbochie ime mpụ n’ọdịnihu, na (4) iji mee ka ndị omempụ gbanwee, na-akụziri ha irube isi n’iwu na ịrụpụta ihe mgbe a tọhapụsịrị ha. Ka anyị lee ma ụlọ mkpọrọ hà na-emezu nzube ndị a.