Onye Nọ N’afọ Iri Na Ụma Nke Ji Okpukpe Ya Akpa Nganga

MGBE Andrew dị afọ 13, e kenyere ya ide ihe odide ụlọ akwụkwọ nke isiokwu ya dabeere n’ihe nketa ọdịbendị. “Na mbụ,” ka ọ na-ekwu, “echere m na m ga-ede banyere nna m ochie, ma abịaziri m chee sị: ‘Cheregodị! Abụ m otu n’ime Ndịàmà Jehova. Nke a bụ ohere magburu onwe ya ikwu okwu banyere okwukwe m!’

“Enyere m ihe odide m isiokwu bụ́ ‘Gụzosie Ike,’ edebekwara m otu nnukwute bọọdụ ịma ọkwa na-egosi ajọ mkpagbu Ndịàmà Jehova chere ihu na Nazi Germany. Ihe ndị m gosiri gụnyere ihe oyiyi nke yunifọm nwere purple triangle na foto dịgasị iche iche nakwa akwụkwọ ozi ndị sitere n’ezinụlọ Kusserow. * Dị ka akwụkwọ nkesa, eji m akwụkwọ ozi dị iche iche Ndịàmà Jehova zigaara gọọmenti Germany, bụ́ ndị ji ụzọ nnọpụiche ndọrọ ndọrọ ọchịchị nakwa nguzosi ike katọọ mmeso ọjọọ e mesoro Ndịàmà Jehova. Ka ihe omume ahụ na-aga n’ihu, a na-egosikwa vidio bụ́ Jehovah’s Witnesses Stand Firm Against Nazi Assault n’akwụsịghị akwụsị. Akpọsakwara m Bible, broshuọ, na traktị dị iche iche.

“E buru ụzọ gosi ụmụ akwụkwọ na ndị nkụzi nile ihe omume anyị n’ụlọ a na-anọ eme egwuregwu n’ụlọ akwụkwọ anyị. Ná mgbede na-esonụ a kpọrọ ezinụlọ na ndị enyi ha òkù. Ọtụtụ ndị jụrụ m ajụjụ, ebe ọ bụ na ha amaghị na ndị Nazi kpagburu Ndịàmà Jehova.”

Andrew kwetara na ya aghaghị inwe obi ike iji kwuo okwu banyere okwukwe ya. “Amaara m na ụfọdụ ndị ga-akwa m emo,” ka ọ na-ekwu, “ma ọ gaara ewute m ma ọ bụrụ na emeghị m ya. Egosiri m ndị tụfuru ndụ ha iji gbachitere okwukwe ha n’ebe Jehova nọ, n’ihi ya ekpebiri m na ma ọ dịghị ihe ọzọ, apụrụ m ịnagide nkatọ ụfọdụ.”

N’ikpeazụ, Andrew nwere obi ụtọ na o jiri ohere ahụ dapụtaranụ gbaa àmà. “Esoro m ndị mmadụ nwee mkparịta ụka banyere ihe mere anyị adịghị aga agha, enyefekwara m ndị nwere mmasị Bible, akwụkwọ, na traktị dị iche iche,” ka ọ na-ekwu, na-agbakwụnye, sị: “Echeghị m na ọ dịwo mgbe m kpara nganga n’ihi ịbụ otu n’ime Ndịàmà Jehova karịa n’oge ahụ.”

[Ihe e dere n’ala ala peeji]