Mbara Ala Anyị—Gịnị Bụ Ọdịnihu Ya?

“Kemgbe ọtụtụ puku afọ, ndị mmadụ atụwo ọdachi ndị na-emere onwe ha bụ́ ndị karịrị ike mmadụ ụjọ, dị ka iju mmiri na oké ọkọchị, ugbu a, ha adabala n’ọnọdụ ka njọ: ọdachi ndị na-emere onwe ha bụ́ ndị ndị mmadụ ji aka ha akpata,” ka akwụkwọ akụkọ bụ́ Globe and Mail nke Canada na-ekwu. Ngalaba Na-ahụ Maka Gburugburu Ebe Obibi nke Òtù Mba Ndị Dị n’Otu (UNEP) bipụtara akụkọ zuru ezu nke na-agba ume ime ihe ugbu a oge ka dị iji kwụsị imebi gburugburu ebe obibi n’ụzọ dị oké njọ. Nnukwu onyeisi oche nke òtù a, bụ́ Klaus Toepfer, na-ekwu, sị: “Anyị nwere ihe ọmụma zuru ezu ugbu a iji mata otú ihe ndị anyị na-eme ma ọ bụ ihe ndị anyị na-adịghị eme pụrụ isi metụta mbara ala a pụrụ iche nke na-acha anụnụ anụnụ nakwa ndị bi na ya ka ọ na-erule afọ 2032.”

E nwewo ụfọdụ ọganihu n’ichebe gburugburu ebe obibi kemgbe e hiwere òtù ahụ n’afọ 1972. Dị ka a kọrọ n’akwụkwọ akụkọ bụ́ The Toronto Star, “ikuku na mmiri dị n’osimiri ndị e nwere na Europe nakwa n’Ebe Ugwu America akawo mma, iwu ndị machibidoro ịgba kemikal n’ikuku emewo ka o kwe omume idozi ihe ụfọdụ mebirinụ n’ikuku ozone.” Ọzọkwa, usoro ndị e ji echekwa oké ọhịa, dị ka ndị e nwere na Canada, Finland, Norway, na United States, “na-ahụ na a ga-ebelata mmetụta ịwa osisi n’ụzọ gabigara oké na-enwe.” Ka o sina dị, akụkọ ahụ si n’aka òtù UNEP na-akọ na ọ bụrụ na ọ dịghị ihe e mere iji belata uto akụ̀ na ụba, ọ bụrụkwa na akụkụ ka ukwuu nke ụwa anọgide na-aghọ obodo ukwu, nke a ga-emetụta anụmanụ na ụdị ihe dị iche iche dị ndụ n’ụzọ dị njọ. Akwụkwọ akụkọ ahụ bụ́ Globe kwuru, sị: “E metọwo ihe dị ka ọkara nke osimiri dị n’ụwa ma ọ bụ mee ka ha talata n’ụzọ dị nnọọ njọ. Mba 80 bụ́ ndị pasent 40 nke ndị bi n’ụwa bi na ha na-enwe nsogbu nke oké ụkọ mmiri.”

Toepfer kweere na “ime ihe kwesịrị ekwesị pụrụ ịrụpụta ezi ihe.” Ọ na-agbakwụnye, sị: “Ihe dị anyị mkpa bụ usoro ihe omume doro anya . . . ime ihe ndị a hụrụ anya . . . nakwa karịsịa, nkwupụta doro anya.” Ma gịnị bụ olileanya e nwere ma ọ bụrụ na ndị ndú ụwa enweghị mmasị n’ime ihe iji chebe ọdịmma nke mbara ala?

Jide n’aka na ọ dị onye merela “nkwupụta doro anya” na onye ga-eme “ihe kwesịrị ekwesị”—Jehova Chineke. N’ezie, o kwupụtawo n’ụzọ doro anya na ya ga-eme ihe iji ‘bibie ndị na-ebibi ụwa.’ (Mkpughe 11:18) Ọzọkwa, Chineke na-emesi anyị obi ike na a ga-eme ka njikọ nke ihe ndị dị ndụ n’ụwa na gburugburu ebe obibi ha dịghachi mma. Ala ihe na-adịghị ga-agbawa okooko ọhịa. (Aịsaịa 35:1) A ga-enwe ihe oriri n’ụba. A gaghịkwa emetọ osimiri ọzọ. (Abụ Ọma 72:16; 98:8) Chineke kwere nkwa ịgọzi ihe nile dị ndụ nọ n’ụwa.—Abụ Ọma 96:11, 12.

[Ebe E Si Nweta Foto Dị na peeji 13]

Foto NASA