Iji Nnwere Onwe Ndị Kraịst Eme Ihe n’Ụzọ Kwesịrị Ekwesị

NDỊ Kraịst e nyere ike mmụọ nsọ ide ihe, n’ịghọta nzube Chineke ji gosipụta obiọma na-erughịrị mmadụ site na Kraịst (“Otú ọ dị, ụmụnna m, a kpọrọ unu maka nnwere onwe”), dụrụ Ndị Kraịst ọdụ ugboro ugboro ichekwa nnwere onwe ha, na ịghara iji nnwere onwe ahụ mere ihe nkụgide aka ma ọ bụ ihe mgbakwasị ụkwụ maka imikpu onwe ha n’ọrụ nke anụ ahụ (Galeshia 5:13) ma ọ bụ jiri ya mere ihe mkpuchi maka ihe ọjọọ. (1 Pita 2:16) Jems kwuru banyere ‘inyonye anya n’iwu ahụ zuru okè nke dịịrị nnwere onwe’ ma mee ka ọ pụta ìhè na onye na-echefughị ihe ọ nụrụ, kama nọgide na ya dị ka onye na-eme ya eme, ga-enwe obi ụtọ.—Jems 1:25.

Pọl onyeozi nụrụ ụtọ nnwere onwe o nwetara n’aka Kraịst ma zere iji nnwere onwe ya mee ihe dị ya onwe ya mma ma ọ bụ iji ya mee ihe ruo n’ókè nke ịkpasu ndị ọzọ iwe. N’akwụkwọ ozi o degaara ọgbakọ dị na Kọrint, o gosiri na ya agaghị egbu akọ na uche nke onye ọzọ site n’ime ihe Akwụkwọ Nsọ nyere ya ohere ime ma ya abụrụ ihe onye na-enwechaghị ihe ọmụma pụrụ inyo enyo, bụ́ onye ihe Pọl mere pụrụ igbu akọ na uche ya. O hotara ihe atụ nke iri anụ a chụrụ n’àjà nye arụsị tupu e bute ya n’ahịa maka ire ya ere. Iri anụ dị otú ahụ pụrụ ime ka onye akọ na uche ya na-esighị ike katọọ Pọl banyere otú o si eji nnwere onwe ya eme ihe, ma si otú ahụ na-ekpe Pọl ikpe, bụ́ nke na-agaghị adị mma. N’ihi ya, Pọl kwuru, sị: “Gịnị mere ọ ga-eji bụrụ na akọ na uche onye ọzọ na-ekpe nnwere onwe m ikpe? Ọ bụrụ na m ji ekele na-eri, n’ihi gịnị ka a ga-eji na-ekwujọ m n’ihe ahụ nke m na-enye ekele maka ya?” Otú o sina dị, onyeozi ahụ kpebisiri ike iji nnwere onwe ya mee ihe n’ụzọ na-ewuli elu, ọ bụghị n’ụzọ na-emebi ihe.—1 Ndị Kọrint 10:23-33.