Echiche nke Bible

Ònye Bụ Setan? Ọ̀ Dị Adị n’Ezie?

ỤFỌDỤ ndị ọkà mmụta nke oge anyị a na-ekwu na Setan abụghị onye dị adị. Ha na-ekwu na ọ bụ onye ụmụ mmadụ na-eche nanị n’echiche. Ọ bụghị taa ka a malitere ịrụ ụka a. Otu onye na-ede uri na narị afọ nke iri na itoolu bụ́ Charles-Pierre Baudelaire kwuru, sị: “Otu aghụghọ kasịnụ Setan ji eme ihe bụ ime ka anyị kwenye na ya adịghị adị.”

Setan ọ̀ bụ onye dị adị n’ezie? Ya bụrụ na ọ dị adị, ebee ka o si bịa? Ọ̀ bụ ya bụ ike a na-adịghị ahụ anya nke na-akpata nsogbu ndị jupụtara n’ụwa taa? Olee otú ị pụrụ isi zere mmetụta ọjọọ ọ na-enwe n’ahụ́ ụmụ mmadụ?

Ihe Bible Na-ekwu

Bible kọwara Setan dị ka onye dị adị n’ezie nke bi n’ógbè ndị bụ́ mmụọ. (Job 1:6) Ọ gwakwara anyị banyere otú obi si taa ya mmiri nakwa omume ọjọọ ya dị iche iche. (Job 1:13-19; 2:7, 8; 2 Timoti 2:26) N’ime Bible, e dedịrị banyere mkparịta ụka Setan na Chineke nwere nakwa nke ya na Jizọs nwere.—Job 1:7-12; Matiu 4:1-11.

Ebee ka ajọ onye a si bịa? Ogologo oge tupu e kee mmadụ, Chineke kere Ọkpara ya “e buru ụzọ mụọ,” bụ́ onye e mesịrị mara dị ka Jizọs. (Ndị Kọlọsi 1:15) Ka oge na-aga, e kere ndị ọzọ bụ́kwa “ụmụ Chineke,” ndị a na-akpọ ndị mmụọ ozi. (Job 38:4-7) Ha nile zuru okè, bụrụkwa ndị ezi omume. Otú ọ dị, otu n’ime ndị mmụọ ozi ahụ mesịrị ghọọ Setan.

 Setan abụghị aha e nyere ya mgbe e kere ya. Ọ bụ aha e nyere ya n’ihi omume ya. Ihe aha ahụ pụtara bụ “Onye Mmegide; Onye Iro; Onye Ebubo.” Ihe mere e ji nye ya aha ahụ bụ n’ihi na ọ họọrọ imegide Chineke.

Nwa mmụọ a malitere dịwa mpako ma mawa Chineke aka. Ọ chọrọ ka ndị ọzọ fewe ya ofufe. Oge Ọkpara Chineke e buru ụzọ mụọ, bụ́ Jizọs, nọ n’ụwa, Setan nwadịrị ime ka Jizọs ‘kpọọrọ ya isiala.’—Matiu 4:9.

Setan ‘eguzosighị ike n’eziokwu.’ (Jọn 8:44) O mere ka e chee na Chineke bụ onye ụgha, ebe nke bụ́ eziokwu bụ na ọ bụ ya onwe ya bụ onye ụgha. Ọ gwara Iv na ọ pụrụ ịdị ka Chineke, ebe ọ bụ ya onwe ya na-achọ ịdị ka Chineke. O jikwa ụzọ aghụghọ ya nweta ihe ọ na-achọ. O mere ka Iv were na ya onwe ya bụ́ Ekwensu ka Chineke elu. Ebe ọ bụ na Iv rubeere Setan isi, ọ pụtara na o kwetara ka Setan bụrụ chi ya.—Jenesis 3:1-7.

N’ihi ime ka e nupụrụ Chineke isi, mmụọ ozi a a tụkwasịburu obi mere onwe ya Setan—nke pụtara na ọ bụ onye iro na onye na-emegide Chineke na mmadụ. E nyekwuru ajọ onye a aha bụ́ “Ekwensu,” nke pụtara “Onye Nkwutọ.” Onye a gbara onye mbụ ná mmehie mesịrị nweta ndị mmụọ ozi ndị ọzọ iso ya nupụrụ Chineke isi. (Jenesis 6:1, 2; 1 Pita 3:19, 20) Ndị mmụọ ozi a emeghị ka ọnọdụ ụmụ mmadụ kakwuo mma. ‘Ụwa bịara jupụta n’ihe ike’ n’ihi otú ndị mmụọ ozi a si bịa ṅomie Setan site n’ịchọ nanị ọdịmma nke onwe ha.—Jenesis 6:11; Matiu 12:24.

Olee Otú Ike Setan Na-akpa Haruru?

Onye omempụ nwere ike kpaa arụ ya n’ụdị ọ ga-abụ, a chọwa onye kpara arụ ahụ, a gaghị achọta ya. Ma, ndị uwe ojii bịa, ha na-aghọta na ebe ọ bụ na a kpara arụ, a ga-enwerịrị onye kpara arụ ahụ. Setan, bụ́ “ogbu mmadụ,” na-agba mbọ ịhụ na a mataghị ụdị onye ọ bụ. (Jọn 8:44; Ndị Hibru 2:14) Mgbe Setan na-agwa Iv okwu, o ji agwọ mee ihe n’ụdị a na-agaghị amata na ọ bụ ya na-ekwu okwu. Ọ ka na-agba mbọ izochi ụdị onye ọ bụ taa. O meela “ka uche ndị na-ekweghị ekwe kpuo ìsì” ka ndị mmadụ wee ghara ịma otú ike ọ na-akpa haruru.—2 Ndị Kọrịnt 4:4.

Otú ọ dị, Jizọs kwuru na ọ bụ Setan bụ omempụ mebiri ụwa a anyị bi n’ime ya. Ọ kpọrọ ya “onye na-achị ụwa a.” (Jọn 12:31; 16:11) Jọn onyeozi dere, sị: “Ụwa dum dị n’ike aka nke ajọ onye ahụ.” (1 Jọn 5:19) Setan “na-eduhie ụwa dum mmadụ bi” site n’ime ka ha na-enwe “ọchịchọ nke anụ ahụ́ na ọchịchọ nke anya na oké ngosi nke ihe mmadụ ji ebi ndụ.” (1 Jọn 2:16; Mkpughe 12:9) Ọ bụ ya bụ onye ụmụ mmadụ n’ozuzu ha na-erubere isi.

Dị nnọọ ka ọ dị n’ebe Iv nọ, ndị nile na-erubere Setan isi na-eme ka ọ bụrụ chi ha, dị ka a pụrụ isi kwuo ya. N’ihi ya, Setan bụ “chi nke usoro ihe a.” (2 Ndị Kọrịnt 4:4) Ihe ndị e ji mara ọchịchị ya gụnyere omume ihu abụọ na ụgha; agha, mmekpọ ọnụ na mbibi; mpụ, anyaukwu na nrụrụ aka.

Otú Ị Pụrụ Isi Zere Ịbụ Onye Ọ Ga-anwata

Bible na-adọ aka ná ntị, sị: “Nọgidenụ na-enwe uche ziri ezi, na-echenụ nche.” N’ihi gịnị? N’ihi na “Onye mmegide unu, bụ́ Ekwensu, na-ejegharị dị ka ọdụm na-ebigbọ ebigbọ, na-achọ onye ọ ga-eripịa.” (1 Pita 5:8) Ọ bụ ezie na akụkụ Akwụkwọ Nsọ a na-akpali iche echiche, ọ bụ ihe na-emesikwu obi ike ịmara na ọ bụ nanị ndị na-anọgideghị na-enwe uche ziri ezi—ndị na-anọgideghị na-eche nche—bụ ndị ‘Setan ga-aghọgbu.’—2 Ndị Kọrịnt 2:11.

Ọ dị oké mkpa ka anyị kweta na Setan dị adị n’ezie, ma kwere ka Chineke mee ka ‘anyị guzosie ike’ ma ‘siekwa ike.’ Anyị ga-esi otú ahụ ‘guzogide Setan’ ma nọrọ n’akụkụ Chineke.—1 Pita 5:9, 10.

Ì CHETỤWO ECHICHE BANYERE NKE A?

▪ Ebee ka Setan si bịa?—Job 38:4-7; Jọn 8:44.

▪ Olee otú ike Setan na-akpa n’ụwa haruru?—Jọn 12:31; 1 Jọn 5:19; Mkpughe 12:9.

▪ Olee ihe anyị pụrụ ime iji chebe onwe anyị pụọ n’aghụghọ Setan?—1 Pita 5:8-10.

[Foto ndị dị na peeji nke 24]

Setan ọ̀ bụ ike a na-adịghị ahụ anya nke na-akpata nsogbu ndị dị n’ụwa anyị a?