Olee Ihe Ịbụ Onyeisi n’Alụmdi na Nwunye Pụtara?
Echiche Baịbụl
Olee Ihe Ịbụ Onyeisi n’Alụmdi na Nwunye Pụtara?
N’ỌTỤTỤ ala, ndị na-alụ di na nwunye ọhụrụ na-ekwerịta onwe ha nkwa n’oge ememme alụmdi na nwunye ha, bụ́ mgbe nke nwaanyị na-ekwe nkwa irubere di ya isi. N’agbanyeghị nke ahụ, ọtụtụ ụmụ nwaanyị anaghị achọ iji ntị anụ na ha ga-anọ n’okpuru di ha. Tụlee ihe Baịbụl na-akụzi banyere okwu a. Ị ga-ahụ na amamihe dị n’ihe Baịbụl kwuru banyere ya, nakwa na ọ dị irè.
Otú Chineke Si Kọwaa Ịbụisi
Ụzọ bụ́ isi Baịbụl si kọwaa ịbụisi dị ná Ndị Efesọs 5:22-24, bụ́ ebe kwuru, sị: “Ka ndị bụ́ nwunye na-edo onwe ha n’okpuru ndị di ha dị ka n’okpuru Onyenwe anyị, n’ihi na di bụ isi nke nwunye ya dị ka Kraịst bụkwa isi nke ọgbakọ ahụ . . . N’eziokwu, dị ka ọgbakọ ahụ si na-edo onwe ya n’okpuru Kraịst, ka ndị bụ́ nwunye sikwa otú ahụ na-edo onwe ha n’okpuru di ha n’ihe niile.” Ebe ọ bụ na di bụ “isi nke nwunye ya,” ọ bụ ya ga na-edu ndú n’ezinụlọ, nwunye ya ana-agbaso ya ma na-erubere ya isi dị ka onyeisi.—Ndị Efesọs 5:33.
Ọ bụghị di ka ikike niile dị n’aka n’ihi na di n’onwe ya nọ n’okpuru Chineke na Kraịst. O nweghị ikike ịgwa nwunye ya ka o mee ihe megidere iwu Chineke ma ọ bụ ihe megidere akọnuche nwunye ya bụ́ nke e ji Baịbụl zụọ. Ma, Chineke nyere ya ọrụ ime mkpebi ndị gbara ọkpụrụkpụ n’ezinụlọ, n’emebighị iwu Baịbụl.—Ndị Rom 7:2; 1 Ndị Kọrịnt 11:3.
Baịbụl nyere di iwu ka ọ ghara idu ndú n’ụzọ ga-abara naanị ya onwe ya uru, kama nke ahụ, ka o buru ụzọ na-eche banyere ọdịmma nwunye ya karịa nke ya. Ndị Efesọs 5:25 kwuru, sị: “Ndị bụ́ di, na-ahụnụ nwunye unu n’anya, dị nnọọ ka Kraịst hụkwara ọgbakọ ahụ n’anya ma nyefee onwe ya maka ya.” Di nke na-agbaso ihe nlereanya magburu onwe ya Kraịst setịpụrụ n’igosi ịhụnanya anaghị edu ndú n’ụzọ ga-abara naanị ya onwe ya uru.
Ọzọkwa, Baịbụl gwara nwoke ka ya na nwunye ya na-ebi “dị ka ihe ọmụma si dị.” (1 Pita 3:7) Nke a abụghị naanị ịmata ọdịiche dị n’ọdịdị ụmụ nwoke na ụmụ nwaanyị na otú echiche nwoke si dị iche na nke nwaanyị. O kwesịrị ịmata mkpa nwunye ya.
“Ọ Bụ Onye Inyeaka Gị”
Na a sịrị ka nwaanyị na-edo onwe ya n’okpuru di ya ọ̀ pụtara na ọ gaghị enwe ọnụ okwu n’ezinụlọ? Tụlee ihe banyere Sera, bụ́ onye Baịbụl kpọrọ aha dị ka ihe atụ n’irubere di ya, bụ́ Ebreham, isi. (1 Pita 3:5, 6) O doro onwe ya n’okpuru di ya n’ihe niile, ma site n’ịhapụ ebe obibi ha ruru ha ahụ́ ala ma n’ịkwadebe nri na mberede. (Jenesis 12:5-9; 18:6) Ma, mgbe otu ihe dị mkpa dapụtara, ugboro ugboro, o kwuru ihe dị iche n’ihe Ebreham chere. Nke a mere mgbe ọ chọrọ ka Ebreham chụpụ ohu ya nwaanyị, bụ́ Hega, na nwa mbụ ya, bụ́ Ishmel, n’ezinụlọ ha. Chineke abaraghị Sera mba, kama nke ahụ, ọ gwara Ebreham ka o “gee ntị n’olu ya.” Ma, Sera nọgidere na-edo onwe ya n’okpuru Ebreham site n’ichere ka o mee ihe kama ịchọ iji aka ya chụpụ Hega na Ishmel.—Jenesis 21:8-14.
Ihe nlereanya Sera gosiri na ọ bụghị mgbe niile ka nwaanyị ga na-ekwenyere echiche di ya, kama nke ahụ, o kwesịrị ịbụ “nwaanyị [ma ọ bụ “onye inyeaka”]” di ya, onye a na-akwanyere ùgwù. (Malakaị 2:14) Ebe ọ bụ na nwaanyị bụ onye inyeaka di ya, ọ na-enye di ya ndụmọdụ ndị bara uru, e nyekwara ya ikike ụfọdụ n’ezinụlọ, mgbe mgbe, ọ na-eme mkpebi banyere ọtụtụ ihe ndị a na-eme n’ụlọ na ihe ụfọdụ metụtara ego. N’ezie, ebe di bụ onyeisi ezinụlọ, ọ bụ ya ka ọ dị n’aka ime mkpebi ikpeazụ.—Ilu 31:10-31; 1 Timoti 5:14.
Ịkwanyere Onye Hiwere Ya Ùgwù
Ọ bụ Jehova Chineke kere nwoke na nwaanyị, o hiwekwara alụmdi na nwunye ka ọ bụrụ ihe dị nsọ ga-adị n’etiti ha abụọ. (Jenesis 2:18-24) O kwukwara ihe ga-abụ ọrụ di na nke nwunye bụ́ nke ga-akasị wetara ha ọṅụ.—Diuterọnọmi 24:5; Ilu 5:18.
Ebe ọ bụ Jehova hiwere alụmdi na nwunye, o nwere ikike iwepụta ụkpụrụ ndị a ga-agbaso na ya. Di na nwunye ndị na-arụ ọrụ Chineke nyere ha ma na-akwanyere ndokwa Chineke mere maka ịbụisi n’alụmdi na nwunye ùgwù, ọ bụghị naanị n’ihi na ọ bara uru, kamakwa n’ihi na ha na-akwanyere ịbụisi Chineke ùgwù, na-eme ihe na-atọ Chineke ụtọ ma na-enweta enyemaka Ya.
Ì CHETỤLA NKE A N’ECHICHE?
▪ Olee onye setịpụrụ ihe nlereanya zuru okè ma a bịa n’ịbụisi?—Ndị Efesọs 5:25.
▪ Chineke ọ̀ kpaara ikike onye bụ́ di nwere ókè?—1 Ndị Kọrịnt 11:3.
▪ Olee ihe mere e ji hiwe alụmdi na nwunye na ndokwa ịbụisi?—Ilu 5:18.
[Foto dị na peeji nke 16]
Ọ bụrụ na di agbasoo ihe nlereanya Kraịst n’idu ndú, ọ na-eme ka ma ya ma nwunye ya nwee ọṅụ na afọ ojuju