Ndị Na-eto Eto Na-ajụ, Sị

Olee otú m ga-esi die ọnwụ papa m ma ọ bụ mama m?

“Mgbe mama m nwụrụ, ọ bịara dị m ka nke m na-eme n’ụwa a agwụla. Ọ bụ mama m mere ezinụlọ anyị ji dịrị n’otu.”—Chinasa. *

ỌNWỤ nne ma ọ bụ nna so n’ihe ndị na-akacha ewute mmadụ ná ndụ. Ọ bụghị naanị na obi ga-agbawa gị maka ihe merenụ, kamakwa, o yikarịrị ka ndụ gị agaghịzi adị otú ị tụrụ anya na ọ ga-adị.

O nwere ike ị na-atụ anya na mama gị ma ọ bụ papa gị ị hụrụ n’anya ga-anọ ya mgbe ị gụchara akwụkwọ, ma ọ bụ mgbe i nwetara ọrụ, ma ọ bụkwanụ soro gị ṅụrịa n’ụbọchị agbamakwụkwọ gị. Ma ugbu a, ihe agaghị adịzi otú ahụ i si chee ya. Ihe a merenụ agwụla gị ike, ị nọzi ná mwute, ma ọ bụdị na-ewe iwe. Olee otú ị ga-esi die obi mgbawa niile a ị na-enwe n’ihi ọnwụ mama gị ma ọ bụ papa gị?

‘Otú A M Si Eru Uju Ò Nwere Ihe O Mere?’

Mgbe mbụ ọ ga-edo gị anya na mama gị ma ọ bụ papa gị anwụọla, ọtụtụ ihe ndị ị na-echetụbeghị mbụ nwere ike ịbatawa gị n’obi. Nnamdị, onye dị afọ iri na atọ mgbe obi nkụchi gburu papa ya, sịrị: “N’abalị anyị chọpụtara na ọ nwụọla, naanị ihe anyị nwere ike ime bụ ibe ákwá na ịmakụ ibe anyị.” Nkechi, onye dị afọ iri mgbe ọrịa kansa gburu papa ya, sịrị: “O nweghị ihe m maara m ga-eme eme. N’ihi ya, anọ m na-ele anya shii. Ákwá ekweghị m obube.”

Onye ọ bụla nwere otú o si eru uju nke ya ma mmadụ nwụọ. Baịbụl kwudịrị na “onye ọ bụla” nwere “ihe na-egbu ya mgbu na ihe na-afụ ya ụfụ.” (2 Ihe E Mere 6:29) Buru ihe a Baịbụl kwuru n’uche ma chetụgodị otú obi dị gị mgbe mama gị ma ọ bụ papa gị nwụrụ. N’okpuru ebe a, kọwaa (1) otú obi dị gị n’oge mbụ ị chọpụtara na mama gị ma ọ bụ papa gị anwụọla na (2) otú obi dị gị ugbu a. *

(1) ․․․․․

(2) ․․․․․

 O nwere ike ihe ị zara na-egosi na, ma ọ dịghị ihe ọzọ, uju ị na-eru akwụsịlatala. O nweghị ihe nke a mere. Ọ pụtaghị na i chefuola mama gị ma ọ bụ papa gị ahụ. Ihe ị zara nwekwara ike na-egosi na ọnwụ ahụ ka dị gị n’obi otú ọ dị gị n’oge ahụ o mere, ma ọ bụdị ya abụrụ na ọ kala njọ. O nwere ike otú i si eru uju na-eme ka mmiri dị n’oké osimiri, mgbe ụfọdụ ya ejiri nwayọọ nwayọọ na-aga, n’oge ọzọ ya “enupụta” mgbe a na-atụghị anya ya. A sịgodị na ọ na-eme gị otú ahụ ka ọtụtụ afọ gaferela mama gị ma ọ bụ papa gị nwụrụ, cheta na o nweghị ihe nke a mere. Ihe bụ́ isiokwu bụ, Olee otú i nwere ike isi kwụsị iru uju a ị na-eru, n’agbanyeghị otú i si na-eru ya?

Ihe Ndị Ga-enyere Gị Aka Idi Ya

Ákwá gụọ gị, bee ya! Ibe ákwá na-enye aka ebelata otú ọnwụ si afụ mmadụ ụfụ n’obi. Ma, o nwere ike ịdị gị otú ọ dị Ifeọma, onye dị afọ iri na itoolu mgbe mama ya nwụrụ. Ọ sịrị, “Echere m na m bewe ezigbo ákwá, ọ ga-eyizi ka enweghị m okwukwe.” Ma chegodị echiche: Jizọs Kraịst bụ nwoke zuru okè, onye nwere okwukwe siri ike na Chineke. Ma “anya mmiri gbara” ya mgbe ezigbo enyi ya bụ́ Lazarọs nwụrụ. (Jọn 11:35) N’ihi ya, atụla ụjọ ibe ákwá. Na i bere ákwá apụtaghị na i nweghị okwukwe! Ifeọma sịrị: “Emechara m bee ákwá. Ebere m ezigbo ákwá. Ebere m ákwá ụbọchị ọ bụla.” *

Kọọrọ onye ọzọ otú obi gị si ama gị ikpe. Chinasa, onye dị afọ iri na atọ mgbe mama ya nwụrụ, sịrị: “N’abalị ọ bụla tupu mụ alakpuo, ana m aga n’ebe mama m na-arahụ gaa susuo ya ọnụ, sị ya ‘ka chi bọọ.’ O nwere otu abalị m na-emeghị ya, mgbe chi ya bọrọ, ya abụrụ na mama m anwụọla. Ama m na ekwesịghị m ịtawa onwe m ụta, ma obi m mawara m ikpe n’ihi na agaghị m hụ ya n’abalị ikpeazụ ahụ, nakwa n’ihi ihe ndị ọzọ mere ka chi ya bọrọ. Tupu papa m emewe njem, ọ gwara mụ na nwanne m nwaanyị ka anyị hụ na anyị na-aga ele otú mama anyị mere. Ma n’ụbọchị ahụ, anyị alakpughị n’oge. N’ụtụtụ ya, mgbe m gara ịhụ mama m n’ebe ọ na-arahụ, achọpụtara m na ọ naghịzi eku ume. Obi gbawara m nnọọ, n’ihi na ahụ́ dị ya tupu papa m apụwa!”

Dị ka ọ dị Chinasa, o nwere ike obi gị na-amatụ gị ikpe n’ihi na i meghị ihe ụfọdụ i kwesịrị ime. Naanị ihe i nwedịrị ike na-echeta bụ ihe ndị ị gaara eme ma a sị na ị maara. ‘A sị na m maara, m gaara agwa papa m ka ọ gaa ụlọ ọgwụ.’ ‘A sị na m maara, m gaara aga hụ mama m n’oge.’ Ọ bụrụ na ụdị ihe a na-echegbu gị, cheta na: O nweghị ihe o mere ma ị kwaa ụta maka ihe ndị ị na-emeghị. Nke bụ́ eziokwu bụ na ị gaara eme ihe dị iche ma a sị na ị maara ihe ga-emenụ. Ma ị maghịnụ. N’ihi ya, i kwesịghị ịtawa onwe gị ụta. Ọ bụghị gị mere mama gị ma ọ bụ papa gị ji nwụọ! *

Mee ka ndị ọzọ mara otú ọ dị gị n’obi. Ilu 12:25 sịrị: “Okwu ọma na-eme ka [mmadụ] ṅụrịa  ọṅụ.” Izochiri ndị ọzọ otú obi dị gị nwere ike ime ka o siere gị ike idi ọnwụ ahụ. Ma, ịkọrọ onye ị tụkwasịrị obi otú obi dị gị, ga-eme ka i nwee ike ịnụ “okwu ọma” nke ga-agba gị ume mgbe ọ kacha dịrị gị mkpa. N’ihi ya, gbalịa mee otu ma ọ bụ abụọ n’ime aro ndị a na-esonụ.

Kọọrọ mama gị ma ọ bụ papa gị nke dị ndụ. Ọ bụ eziokwu na ihe adịrịghị mama gị ma ọ bụ papa gị nke dị ndụ mfe n’oge a, ma o doro anya na ọ ka chọkwara inyere gị aka. N’ihi ya, kọọrọ ya otú obi dị gị. O doro anya na ụdị mkparịta ụka ahụ ga-eme ka uju ị na-eru belata, ọ ga-emekwa ka gị na ya dịrịkwuo ná mma.

Iji nyere gị aka ịmalite mkparịta ụka, gbalịa mee ihe a: Dee ihe abụọ ma ọ bụ atọ ị gaara achọ ịma banyere papa gị ma ọ bụ mama gị ahụ nwụrụ anwụ, jụzie onye nke dị ndụ ka ọ kọọrọ gị otu n’ime ihe ndị ahụ ị chọrọ ịma. *

․․․․․

Kọọrọ ezigbo ndị enyi gị. Baịbụl kwuru na ezi enyi bụ nwanne “a mụrụ maka oge nsogbu.” (Ilu 17:17) Ifeọma sịrị: “Onye ị na-atụghịdị anya na ọ ga-enyere gị aka nwere ike ịbụ onye ga-enyere gị aka. N’ihi ya, atụla ụjọ ịkọrọ ndị ọzọ otú obi dị gị.” N’eziokwu, ihe unu ga-ekwu nwere ike ịnyị unu arọ n’ọnụ n’ihi na unu amaghị ihe unu ga-agwa ibe unu agwa. Ma e mechaa, ịkọrọ ndị ọzọ otú obi dị gị ga-abara gị uru. Chiemerie, onye dị naanị afọ itoolu mgbe obi nkụchi gburu papa ya, chetara ihe mere ya n’oge ahụ ma kwuo, sị: “Ekweghị m ka onye ọ bụla mara otú obi dị m. Ọ gaara akara m mma ma a sị na m kọọrọ ya onye ọzọ. Ọ gaara enyere m aka idi ya.”

Kọọrọ Chineke. O yiri ka obi ọ ga-aka ruo gị  ala ma ọ bụrụ na ị ‘wụpụ obi gị dị ka mmiri’ n’ihu Jehova Chineke n’ekpere. (Abụ Ọma 62:8) Ekpere abụghị ihe ị na-eme naanị ka obi gị dajụọ. Kama, ọ bụ ịrịọ ‘Chineke nke nkasi obi niile, onye na-akasi anyị obi ná mkpagbu anyị niile’ arịrịọ.—2 Ndị Kọrịnt 1:3, 4.

Otu ụzọ Chineke si akasi anyị obi bụ site ná mmụọ nsọ ya. Mmụọ nsọ ya nwere ike inye gị “ike karịrị ike nkịtị,” ka i nwee ike die ọnwụ ahụ. (2 Ndị Kọrịnt 4:7) Chineke na-enyekwa anyị “nkasi obi sitere n’Akwụkwọ Nsọ.” (Ndị Rom 15:4) N’ihi ya, rịọ Chineke ka o nye gị mmụọ ya, wepụtakwa oge gụọ okwu agbamume ndị dị n’Okwu ya bụ́ Baịbụl. (2 Ndị Tesalonaịka 2:16, 17) Ọ ga-adị mma ma i depụta amaokwu Akwụkwọ Nsọ ndị kacha kasie gị obi ma debe ya ebe aka gị ga-eru ya ngwa ngwa. *

Àga M Akwụsịli Iru Uju Ya?

Mmadụ anaghị akwụsị iru uju n’otu ntabi anya. Chinyere, onye mama ya nwụrụ mgbe ọ dị afọ iri na isii, sịrị: “Mmadụ anaghị ekpebi mgbe ọ ga-akwụsị iru uju. A na-enwe ụbọchị ndị m ga-ebegide ákwá ruo mgbe ụra buuru m. N’oge ndị ọzọ, m na-agbalị ka m ghara ichewe banyere ọnwụ mama m, kama, banyere ihe ndị Jehova kwere nkwa imere mụ na mama m ma ụwa ghọọ Paradaịs.”

Baịbụl gwara anyị na n’ime Paradaịs ahụ Chinyere kwuru okwu ya, “ọnwụ agaghị adị ọzọ, iru uju ma ọ bụ mkpu ákwá ma ọ bụ ihe mgbu agaghịkwa adị ọzọ.” (Mkpughe 21:3, 4) Gịnwa nwekwara ike ịchọpụta na ịtụgharị uche n’ụdị nkwa ndị a ga-enyere gị aka idi ọnwụ mama gị ma ọ bụ papa gị.

Ị gaa n’adres Ịntanet anyị bụ́ www.watchtower.org/ype ị ga-ahụ ihe ndị ọzọ a tụlerela n’isiokwu bụ́ “Ndị Na-eto Eto Na-ajụ, Sị”

[Ihe ndị e dere n’ala ala peeji]

IHE Ị GA-ECHEBARA ECHICHE

▪ Olee aro ndị a tụrụ n’isiokwu a ị ga-achọ ime? ․․․․․

▪ N’okpuru ebe a, dee amaokwu Akwụkwọ Nsọ ole na ole ga-akasi gị obi mgbe o yiri ka uju ị na-eru ọ̀ karịwala. ․․․․․

[Igbe dị na peeji nke 23]

Ọ DỊGHỊ NJỌ MA I BEE ÁKWÁ . . . HA BERE ÁKWÁ!

Ebreham—Jenesis 23:2.

Josef—Jenesis 50:1.

Devid—2 Samuel 1:11, 12; 18:33.

Meri, nwanne Lazarọs—Jọn 11:32, 33.

Jizọs—Jọn 11:35.

Meri Magdalin—Jọn 20:11.

[Igbe/Foto dị na peeji nke 24]

DEE YA EDEE

Idetu ihe ndị ị na-eche banyere mama gị ma ọ bụ papa gị ahụ nwụrụ anwụ nwere ike inyere gị ezigbo aka idi ọnwụ ya. E nwere ọtụtụ ihe ndị i nwere ike ide. Lee aro ole na ole ga-enyere gị aka.

▪ Dee ihe ndị na-enye gị obi ụtọ ị na-echeta banyere mama gị ma ọ bụ papa gị ahụ.

▪ Dee ihe ndị ị gaara achọ ịgwa ya ma a sị na ọ ka dị ndụ.

▪ Weregodị ya na obi na-ama nwanne gị ị tọrọ ikpe n’ihi ọnwụ mama gị ma ọ bụ papa gị. Dee ihe ndị ị ga-agwa ya iji kasie ya obi. Nke a nwere ike inyere gị aka ka obi nke gị ghara ịma gị ikpe.

[Igbe dị na peeji nke 25]

IHE NNE MA Ọ BỤ NNA NKE NỌ NDỤ GA-EBURU N’UCHE

Ọnwụ di ma ọ bụ nwunye na-agbawa obi. Ma, ugbu a bụ oge nwa gị na-eto eto chọrọ enyemaka gị. Olee otú ị ga-esi nyere ya aka idi ọnwụ ahụ ka gịnwa na-agbalị idikwa nke gị? *

Ezochila otú obi dị gị. Ọ bụ n’aka gị ka nwa gị si mụta ọtụtụ ihe ndị bara uru ọ na-eme ná ndụ. Ọ ga-esikwa n’aka gị mụta otú ọ ga-esi die ọnwụ mmadụ. N’ihi ya, echekwala na ị ga-emere nwa gị ihe ọma ma i zochiere ya otú ọnwụ ahụ si ewute gị. I mee nke a, o nwere ike ịmụtakwa izochiri gị otú obi dị ya. Ma, ọ bụrụ na i gosi otú o si ewute gị, ọ ga-amụta na mmadụ igosi otú ihe si ewute ya ka mma karịa izochi ya, mụtakwa na ọ dịghị ihe o mere ma o wute ya, ma ọ gwụ ya ike, ma ọ bụdị na-ewe ya iwe.

Gbaa nwa gị ume ka o kwuo otú obi dị ya. Gbaa nwa gị ume ka ọ gwa gị otú obi dị ya, ma amanyela ya amanye. Ọ bụrụ na ọ chọghị ịgwa gị ihe ọ bụla, gị na ya nwere ike iso gụọ isiokwu a. Kọọkwara ya ihe ndị na-atọ gị ụtọ ị na-echeta banyere di ma ọ bụ nwunye gị ahụ nwụrụ anwụ. Mee ka ọ ghọta na ọ ga-esiri gị ike idi ọnwụ ahụ. Ịhụ ka ị na-ekwu otú obi dị gị ga-emekwa ka nwa gị kwuo otú obi dị ya.

Mara ebe ike gị ruru. O doro anya na ị ga-achọ ime ihe ọ bụla i nwere ike ime iji nyere nwa gị aka n’oge nsogbu a. Ma cheta na ọ bụ nnukwu ihe mere gị. Ọ bụ di ma ọ bụ nwunye gị ị hụrụ n’anya nwụrụ. Ọ ga-enwekwa mgbe ike na-agaghị adị gị. (Ilu 24:10) N’ihi ya, o nwere ike dị mkpa na ị ga-agwa ndị ọzọ, bụ́ ndị toro eto n’ezinụlọ unu nakwa ndị enyi gị, ka ha nyere gị aka. Ịrịọ ka e nyere gị aka na-egosi na ị maara ihe. Ilu 11:2 na-ekwu, sị: “Ndị dị obi umeala nwere amamihe.”

Onye ga-akacha enyere gị aka bụ Jehova Chineke n’onwe ya, onye kwere ndị na-efe ya nkwa, sị: “Mụ onwe m, bụ́ Jehova Chineke gị, sekpụ gị n’aka nri gị. Ọ bụ m bụ Onye na-asị gị, ‘Atụla egwu. Mụ onwe m ga-enyere gị aka.’”—Aịzaya 41:13.

[Ihe e dere n’ala ala peeji]