1-2. (a) Olee ihe na-enyere anyị aka idi nsogbu ndị na-abịara anyị kwa ụbọchị? Kọwaa. (b) Gịnị ka anyị ga-eleba anya na ha n’isiokwu a?

È NWEELA mgbe i chetara otu nsogbu i diri, gị asị: “Ama m na ọ bụrụ n’ike aka m, agaaraghị m edili nsogbu ahụ?” Ọtụtụ n’ime anyị ekwuola otú ahụ. Ọ ga-abụ na i kwuru ya mgbe i chetara otú i si die ezigbo ọrịa rịara gị ma ọ bụ ọnwụ onye nke gị. I cheta ihe merenụ, obi gị na-agwa gị na naanị ihe mere i ji die ya bụ na mmụọ nsọ Jehova nyere gị “ike karịrị ike nkịtị.”—2 Kọr. 4:7-9.

² Ọ bụ mmụọ nsọ ga-enyekwara anyị aka idi nsogbu ndị juru n’ụwa Ekwensu a. (1 Jọn 5:19) Ihe ọzọkwa bụ na anyị na-alụso “ìgwè ndị mmụọ ọjọọ” ọgụ. (Efe. 6:12) Ka anyị leba anya n’ụzọ abụọ mmụọ nsọ si enyere anyị aka idi nsogbu ndị a. Anyị ga-elebakwa anya n’ihe ndị anyị nwere ike ime ka mmụọ nsọ nyere anyị aka.

3. Olee otu ụzọ mmụọ nsọ Jehova si enyere anyị aka idi nsogbu?

³ Mmụọ nsọ Jehova na-enye anyị ike anyị ga-eji mee ihe niile anyị kwesịrị ime n’agbanyeghị nsogbu. Pọl onyeozi kwuru na ihe mere o ji nwee ike ịna-efe Jehova n’agbanyeghị nsogbu ndị bịaara ya bụ na “ike nke Kraịst” nyeere ya aka. (2 Kọr. 12:9) Mgbe Pọl na-aga ozi ala ọzọ nke abụọ ya, ọ nọ na-ekwusasi ozi ọma ike, na-arụkwa ọrụ o ji akpa afọ ya. O biri na Kọrịnt n’ụlọ Akwịla na Prisila. Ha bụ ndị na-akpa ákwà ụlọikwuu. Ebe ọ bụ na Pọl na-akpakwa ákwà ụlọikwuu, o so ha na-arụ ọrụ ahụ ụbọchị ụfọdụ. (Ọrụ 18:1-4) Mmụọ nsọ nyere Pọl ike ịna-arụ ya ma na-ekwusa ozi ọma.

4. Ná 2 Ndị Kọrịnt 12:7b-9, olee nsogbu Pọl kwuru na ya nwere?

⁴ Gụọ 2 Ndị Kọrịnt 12:7b-9. N’amaokwu a, gịnị ka Pọl  bu n’obi kwuo na ya nwere “ogwu n’anụ ahụ́”? Ọ bụrụ na e nwere ogwu dị gị n’ahụ́, ọ ga na-afụ gị ezigbo ụfụ. N’ihi ya, ihe okwu Pọl pụtara bụ na o nwere ihe na-enye ya nsogbu. Ọ kpọrọ nsogbu ahụ “mmụọ ozi Setan” nke nọ ‘na-ama ya ụra,’ ma ọ bụ na-eti ya ihe. O nwere ike ọ bụghị Ekwensu ma ọ bụ ndị mmụọ ọjọọ ya kpataara Pọl nsogbu ahụ yiri ogwu n’ahụ́ ya. Ma, mgbe ha hụrụ “ogwu” ahụ dị Pọl n’ahụ́, o nwere ike ịbụ na ha gbalịrị ime ka ọ bamikwuo ya n’ahụ́, ka ọ fụsie ya ụfụ ike. Gịnị ka Pọl mere?

5. Olee otú Jehova si za ekpere Pọl?

⁵ Na mbụ, Pọl chọrọ ka e wepụrụ ya “ogwu” ahụ. O kwuru, sị: “Ugboro atọ ka m rịọsiri Onyenwe anyị [Jehova] arịrịọ ike ka ihe a si n’ebe m nọ pụọ.” Ma, n’agbanyeghị ekpere niile Pọl kpere, ogwu ahụ apụghị. Ọ̀ pụtara na Jehova azaghị ekpere ya? Mba. Ọ zara ya. Jehova ewepụghị nsogbu ahụ. Ma, o nyere ya ike ọ ga-eji edi ya. Jehova sịrị ya: “A na-eme ka ike m zuo okè n’adịghị ike.” (2 Kọr. 12:8, 9) Chineke nyeere Pọl aka ịna-enwe obi ụtọ, obi eruokwa ya ala.—Fil. 4:4-7.

6. (a) Olee otú Jehova nwere ike isi za ekpere anyị? (b) Olee ihe e kwuru n’amaokwu Baịbụl ndị dị na paragraf a na-eme ka obi sie gị ike?

⁶ Ò nwetụla mgbe ị rịọrọ Jehova ka o wepụrụ gị nsogbu gị na ya na-alụ otú ahụ Pọl mere? O nwere ike ịbụ na ị rịọrọ ya ọtụtụ ugboro, ma o wepụghị ya, kama, ihe ana-akadị njọ. Ò mere ka i chewe ma ọ̀ ga-abụ na Jehova na-ewere gị iwe? Ya bụrụ otú ahụ, cheta Pọl. Jehova zara ekpere ya. Ọ ga-azakwa nke gị. O nwere ike ọ gaghị ewepụrụ gị nsogbu ahụ. Ma, ọ ga-eji mmụọ nsọ ya nye gị ike ị ga-eji edi ya. (Ọma 61:3, 4) Nsogbu nwere ike ‘ịkwada’ gị, ma, Jehova agaghị agbahapụ gị.—2 Kọr. 4:8, 9; Fil. 4:13.

7-8. (a) Olee otú mmụọ nsọ si yie ifufe? (b) Olee otú Pita si kọwaa otú mmụọ nsọ si arụ ọrụ?

⁷ Olee ụzọ ọzọ mmụọ nsọ si enyere anyị aka? Anyị nwere ike iji mmụọ nsọ tụnyere ifufe. Ifufe nwere ike inyere ụgbọ mmiri aka iru ebe ọ na-aga ọ bụrụgodị na ebili mmiri na-enye ya nsogbu. Otú ahụkwa ka mmụọ nsọ si enyere anyị aka ịna-efe Jehova n’agbanyeghị nsogbu ndị na-abịara anyị ruo mgbe anyị ga-abanye n’ụwa ọhụrụ.

⁸ Ebe ọ bụ na Pita onyeozi bụ onye na-akụ azụ̀, ọ ma ihe gbasara ịkwọ ụgbọ mmiri. O nwere ike ịbụ ya mere o ji jiri okwu dị ka ò nwere ihe jikọrọ ya na ịkwọ ụgbọ mmiri kọwaa otú mmụọ nsọ si arụ ọrụ. O kwuru, sị: “Ọ dịghị mgbe e si n’uche mmadụ buo amụma ọ bụla, kama ndị mmadụ kwuru ihe Chineke mere ka ha kwuo mgbe mmụọ nsọ na-edu ha.” Okwu Grik e si sụgharịta “na-edu” pụtara “bu na-aga.”—2 Pita 1:21.

9. Gịnị ka okwu ahụ bụ́ “bu na-aga” na-eme ka mmadụ chewe?

⁹ Gịnị ka okwu ahụ bụ́ “bu na-aga” na-eme ka mmadụ chewe? Luk onye dere akwụkwọ Ọrụ Ndịozi jikwa okwu yiri ya kọwaa ụgbọ mmiri ifufe ‘bu na-aga.’ (Ọrụ 27:15) N’ihi ya, otu ọkà mmụta Baịbụl kwuru na mgbe Pita dere na mmụọ nsọ ‘duru’ ndị dere Baịbụl, okwu o ji kọwaa ya bụ okwu ga-eme ka ndị mmadụ chewe gbasara ịkwọ ụgbọ mmiri. Ihe Pita na-ekwu bụ na otú ahụ ifufe si ebu ụgbọ mmiri ruo ebe ọ na-aga ka mmụọ nsọ si duo ndị so dee Baịbụl. Otu ọkà mmụta ahụ kwuru na e nwere ike ikwu na ndị ahụ so dee Baịbụl “mepere ákwà ụgbọ mmiri ha,” ya bụ, na ha dị njikere ịrụ ọrụ mmụọ nsọ gwara ha rụọ. Jehova mere ihe o kwesịrị  ime. O nyere ha mmụọ nsọ, nke rụụrụ ha ihe ifufe na-arụrụ ụgbọ mmiri. Ndị so dee Baịbụl mekwara ihe ha kwesịrị ime. Ha mere ihe mmụọ nsọ gwara ha mee.

10-11. Olee ihe abụọ anyị kwesịrị ime ka mmụọ nsọ nwee ike inyere anyị aka? Nye ihe atụ.

¹⁰ N’eziokwu, Jehova anaghịzi eji mmụọ nsọ ya eme ka ndị mmadụ dee Baịbụl n’oge anyị a. Ma, ọ ka na-eji mmụọ nsọ ya eduzi ndị ya. Jehova ka na-eme ihe o kwesịrị ime. Olee ihe anyị ga-eme ka mmụọ nsọ ya nwee ike ịna-edu anyị? Anyị kwesịrị ịgbalị na-eme ihe anyị kwesịrị ime. Olee otú anyị ga-esi eme ya?

¹¹ Chegodị gbasara ihe atụ a. Ọ bụrụ na onye na-akwọ ụgbọ mmiri chọrọ ka ifufe buru ụgbọ ya na-aga, e nwere ihe abụọ ọ ga-eme. Nke mbụ bụ na ọ ga-adọsa ụgbọ ya n’ebe ifufe ahụ na-efe. A sị ka e kwuwe, ụgbọ mmiri ahụ agaghị akwọpụ ma ọ bụrụ na ọ dị n’ọdụ ụgbọ mmiri dị ezigbo anya n’ebe ifufe ahụ na-efe. Nke abụọ bụ na o kwesịrị imeghecha ákwà ụgbọ mmiri ahụ. O doro anya na ọ bụrụgodị na ifufe na-efe, ọ bụ naanị mgbe ifufe juru n’ákwà ụgbọ mmiri ahụ ka ọ ga-akwọpụ njem. Otú ahụ ka ọ dịkwa anyịnwa. Ọ bụ naanị mmụọ nsọ ga-eme ka anyị ghara ịkwụsị ife Jehova. Ka mmụọ nsọ nwee ike inyere anyị aka, e nwere ihe abụọ anyị ga-eme. Nke mbụ bụ na anyị ga na-eme ihe mmụọ nsọ Chineke chọrọ ka anyị na-eme. Nke abụọ abụrụ na anyị kwesịrị iji ike anyị niile na-eme ihe ndị ahụ. (Ọma 119:32) Ọ bụrụ na anyị ana-eme ihe ndị a, mmụọ nsọ ga-enye anyị ike anyị ga-eji na-efe Jehova ruo mgbe anyị ga-aba n’ụwa ọhụrụ.

12. Gịnị ka anyị ga-elebazi anya na ya?

¹² Anyị ekwuola ụzọ abụọ mmụọ nsọ si enyere anyị aka. Mmụọ nsọ na-enye anyị ike ma na-enyere anyị aka idi nsogbu ndị na-abịara anyị. Ọ na-eduzi anyị, na-enyekwara anyị aka ịrụ ọrụ Jehova  nyere anyị nke ga-eme ka anyị nweta ndụ ebighị ebi. Ka anyị lebazie anya n’ihe anọ anyị kwesịrị ịna-eme ka mmụọ nsọ nwee ike ịna-enyere anyị aka.

13. Dị ka e kwuru na 2 Timoti 3:16, 17, olee ihe Baịbụl nwere ike imere anyị, oleekwanụ ihe anyịnwa kwesịrị ime?

¹³ Nke mbụ, na-amụ Okwu Chineke. (Gụọ 2 Timoti 3:16, 17.) Okwu Grik e si sụgharịta “si n’ike mmụọ nsọ Chineke” pụtara “ume Chineke kunyere.” Chineke ji mmụọ nsọ ya tinye echiche ya n’obi ndị so dee Baịbụl. Ọ bụrụ na anyị ana-agụ Baịbụl ma na-echebara ihe anyị gụrụ echiche, ihe ndị Chineke chọrọ ka anyị mee ga na-abanye anyị n’obi. Ihe ndị ahụ ga-eme ka anyị gbanwee ndụ anyị mewe ihe Chineke chọrọ. (Hib. 4:12) Ka mmụọ nsọ baara anyị uru, anyị kwesịrị iwepụta oge na-amụ Baịbụl mgbe niile ma na-echebara ihe anyị mụrụ echiche. Anyị mee otú ahụ, Okwu Chineke ga na-edu anyị n’ihe niile anyị na-ekwu na n’ihe niile anyị na-eme.

14. (a) Olee ihe mere anyị nwere ike iji kwuo na mmụọ nsọ na-adị n’ọmụmụ ihe anyị? (b) Olee ihe anyị ga-eme tupu anyị agawa ọmụmụ ihe ka mmụọ nsọ nwee ike inyere anyị aka?

¹⁴ Nke abụọ, soro ụmụnna gị na-efe Chineke. (Ọma 22:22) E nwere ike ikwu na ọmụmụ ihe anyị bụ “ebe ifufe ahụ na-efe.” Mmụọ nsọ na-adị n’ọmụmụ ihe anyị. (Mkpu. 2:29) Gịnị mere anyị nwere ike iji kwuo otú ahụ? Ọ bụ n’ihi na anyị na ụmụnna anyị nọkọọ ife Jehova, anyị na-ekpe ekpere rịọ ya ka o nye anyị mmụọ nsọ. Anyị na-abụ abụ ndị si na Baịbụl, na-egekwa okwu ụmụnna nwoke e ji mmụọ nsọ họpụta na-eji Baịbụl agwa anyị. Ọ bụkwa otu mmụọ nsọ ahụ na-enyere ụmụnna nwaanyị aka ịkwadebe ihe omume ha ma mee ya. Ka mmụọ nsọ nwee ike inyere anyị aka, tupu anyị agawa ọmụmụ ihe, anyị kwesịrị ịkwadebe ihe a ga-amụ ka anyị nwee ike ịza ajụjụ. Anyị mee otú ahụ, e nwere ike ikwu na anyị mepere ákwà ụgbọ mmiri anyị, ya bụ, na anyị jikeere ejikere bịa.

15. Olee otú mmụọ nsọ si enyere anyị aka n’ozi ọma?

¹⁵ Nke atọ, na-ekwusa ozi ọma. Ọ bụrụ na anyị ejiri Baịbụl na-ezi ozi ọma ma na-akụzi ihe, anyị na-ekwe ka mmụọ nsọ na-enyere anyị aka n’ozi ọma anyị. (Rom 15:18, 19) Ka mmụọ nsọ nwee ike ịna-enyere anyị aka, anyị kwesịrị ịna-aga ozi ọma mgbe niile, jirikwa Baịbụl na-ezi ozi ọma mgbe ọ bụla o kwere omume. Otu ụzọ anyị ga-esi na-emekwu nke ọma n’ozi ọma bụ ịna-eme ihe dị n’ebe e dere Ihe Gị na Mmadụ Nwere Ike Ikwurịta nke dị n’Usoro Ihe Omume Ozi Anyị na Otú Anyị Si Ebi Ndụ.

16. Olee ụzọ kacha mfe anyị ga-esi nweta mmụọ nsọ?

¹⁶ Nke anọ, na-ekpe ekpere. (Mat. 7:7-11; Luk 11:13) Ụzọ kacha mfe anyị ga-esi nweta mmụọ nsọ bụ ịrịọ Jehova n’ekpere ka o nye anyị ya. O nweghị ihe ọ bụla nwere ike igbochi ekpere anyị iru Jehova ntị ma ọ bụ mee ka mmụọ nsọ Chineke na-enye anyị ghara irute n’ebe anyị nọ. Setan ma ọ bụ mkpọrọ a tụrụ anyị agaghị emeli ya. (Jems 1:17) Olee otú anyị kwesịrị isi na-ekpe ekpere ka mmụọ nsọ nwee ike inyere anyị aka? Iji zaa ajụjụ a, ka anyị jiri ihe atụ dị naanị n’Oziọma Luk mụọ gbasara ekpere. *

17. Gịnị ka ihe atụ ahụ Jizọs mere e dere na Luk 11:5-9, 13 na-akụziri anyị gbasara ekpere?

¹⁷ Gụọ Luk 11:5-9, 13. N’ihe atụ Jizọs mere, o gosiri otú anyị kwesịrị isi na-arịọ Chineke ka o nye anyị mmụọ nsọ. N’ihe atụ ahụ, otu nwoke nwetara ihe ọ na-arịọ n’ihi na “ọ nọgidesiri ike na-arịọ.” Ụjọ atụghị ya ịgakwuru enyi ya ka o nyere ya aka n’agbanyeghị na ọ bụ n’etiti abalị. (Luk 11:8) * Gịnị ka Jizọs ji ihe atụ a na-akụziri anyị gbasara ekpere? Ọ sịrị: “Na-arịọnụ, a ga-enye unu; na-achọnụ, unu ga-achọta; na-akụnụ aka, a ga-emeghere unu.” Gịnị ka ihe a na-akụziri anyị? Iji nweta mmụọ nsọ, anyị ekwesịghị ịkwụsị ịrịọ Jehova ka o nye anyị ya.

18. Dị ka anyị hụrụ n’ihe atụ Jizọs mere, gịnị mere obi ji kwesị isi anyị ike na Jehova ga-enye anyị mmụọ nsọ ya?

¹⁸ Ihe atụ Jizọs ahụ na-akụzikwara anyị ihe mere Jehova ga-eji enye anyị mmụọ nsọ. Nwoke ahụ Jizọs ji mee ihe atụ chọrọ ilekọta onye ọbịa ya nke ọma. Ọ bụ ya mere o ji na-agbalị inye onye ọbịa ahụ bịara n’ụlọ ya n’ime abalị nri n’agbanyeghị na o nweghị ihe ọ bụla. Jizọs kwuru na ihe mere onye agbata obi ya ahụ ji nye ya achịcha bụ n’ihi na ọ nọgidere na-arịọ ya. Gịnị ka Jizọs ji ihe a na-akụziri anyị? Ebe ọ bụ na mmadụ na-ezughị okè meere onye agbata obi ya ihe n’ihi na ọ nọgidere na-arịọ ya, obi kwesịrị isi anyị ike na Nna anyị nke eluigwe ga-enye ndị niile nọgidere na-arịọ ya mmụọ nsọ. N’ihi ya, ka obi sie anyị ike na Jehova ga-enye anyị mmụọ nsọ ma anyị rịọ ya ka o nye anyị ya.—Ọma 10:17; 66:19.

19. Gịnị mere obi kwesịrị iji sie anyị ike na anyị ga-emeri?

¹⁹ Obi kwesịrị isi anyị ike na anyị ga-emeri n’agbanyeghị nsogbu niile Ekwensu na-akpatara anyị. N’ihi gịnị? Ọ bụ n’ihi na e nwere ụzọ abụọ mmụọ nsọ si na-enyere anyị aka. Nke mbụ bụ na ọ na-enye anyị ike iji die nsogbu ndị na-abịara anyị. Nke abụọ abụrụ na ọ bụ ike Chineke ji enyere anyị aka ịnọsi ike n’ozi ya ruo mgbe anyị ga-aba n’ụwa ọhụrụ. Ka anyị kpebisie ike na anyị ga na-eme ihe ndị ga-eme ka mmụọ nsọ nwee ike ịna-enyere anyị aka.