Otu ụbọchị, otu onye ọbịa jụrụ nwatakịrị ahụ, sị, “Ọ̀ bụ na ị maghị na mkpụrụ ego ọlaedo ahụ ka mkpụrụ ego ọlaọcha ahụ okpukpu abụọ?” Nwatakịrị ahụ chịtụrụ ọchị, sị, “Ama m.” Onye ọbịa ahụ ajụọ ya, sị, “Gịnịzi mere i ji ewere nke ọlaọcha? I were nke ọlaedo, ego ị ga-enweta ga-aka nke ọlaọcha ahụ okpukpu abụọ.” Nwatakịrị ahụ sịrị: “Ma, m were nke ọlaedo ahụ, ndị mmadụ agaghịzi na-egwusa m egwuregwu a. Ị̀ makwa mkpụrụ ego ọlaọcha ole m nwetarala?” Nwatakịrị a a kọrọ akụkọ ya kpara àgwà ga-abara ndị dimkpa uru, ya bụ, inwe ezi amamihe.

Baịbụl kwuru, sị: “Chekwaa ezi amamihe na ikike iche echiche. Mgbe ahụ, ị ga na-eje ije n’ụzọ gị n’obi iru ala, ọbụna ụkwụ gị agaghị akpọ n’ihe ọ bụla.” (Ilu 3:21, 23) N’ihi ya, anyị mata ihe bụ́ “ezi amamihe” na otú anyị ga-esi jiri ya na-eme ihe bara uru, obi ga-eru anyị ala. Ọ ga-eme ka anyị ghara ịkwụsị ife Chineke, mee ka “ụkwụ” sie anyị ike.

Inwe ezi amamihe dị iche n’ịmụta ihe na inwe nghọta. Mmadụ nwere ike ịmụta ihe a kụziiri ya ma buru ya n’isi. Onye nwere nghọta na-amata otú otu ihe si gbasa ihe ọzọ. Onye nwere amamihe na-eji ihe ọ mụtara na ihe ọ ghọtara mee ihe ga-abara ya uru.

Dị ka ihe atụ, mmadụ nwere ike iji obere oge gụọ akwụkwọ Gịnị Ka Baịbụl Na-akụziri Anyị? ma ghọta ya. O nwere ike na-azata ajụjụ mgbe a na-amụrụ ya ihe. O nwekwara ike na-abịa ọmụmụ ihe, na-azadị ajụjụ nke ọma. Ihe ndị a niile nwere ike igosi na ọ na-eme nke ọma. Ma ọ̀ pụtara na o nwere amamihe? Mba. O nwere ike ịbụ na ụbụrụ na-aghọ ya nkọ. Ma, ọ bụrụ na ọ na-eme ihe ọ na-amụta, jiri ihe ọ mụtara na ihe ọ ghọtara na-eme ihe bara uru, ọ pụtara na o nwere amamihe. Ọ bụrụ na ihe ndị ọ na-eme ana-aga nke ọma, na-egosikwa na ọ na-ebu ụzọ chebara ihe ọ chọrọ ime echiche, ọ ga-edo anya na o nwere ezi amamihe.

Jizọs nyere ihe atụ na Matiu 7:24-27 gbasara ụmụ nwoke abụọ. Onye nke ọ bụla rụrụ ụlọ nke ya. Jizọs kwuru na otu n’ime ha nwere “uche.” Nwoke ahụ chetara echi, rụọ ụlọ ya n’elu nkume. Ihe ahụ o mere gosiri na ọ ma ihe nwere ike ime n’ọdịnihu. Ọ bụ ya mere o ji mee ihe ga-abara ya uru. O cheghị na ịrụ ụlọ ya n’elu ájá ga-eme ka ọ ghara imefu nnukwu ego ma ọ bụ mee ka ọ rụọ ya ngwa ngwa. O nwere amamihe ma cheta ahụhụ ọ ga-emecha taa ma ọ rụọ ya n’elu ájá. N’ihi ya, e nweghị ihe oké mmiri ozuzo na oké ifufe mere ụlọ ya. Ma, ajụjụ bụ, Ebe ezi amamihe bara ezigbo uru, olee otú anyị ga-esi nwee ya ma chekwaa ya?

Nke mbụ, cheta na Maịka 6:9 kwuru na ‘onye nwere ezi amamihe ga-atụ egwu aha Chineke.’ Ịtụ egwu aha Jehova pụtara na anyị ga na-asọpụrụ ya, na-akwanyere ma aha ya ma iwu ya ezigbo ùgwù. Ị chọọ ịna-asọpụrụ mmadụ, ị ga-ebu ụzọ mata otú onye ahụ si eche echiche. Ị ga-enwezi ike ịtụkwasị onye ahụ obi, mụta ihe n’aka ya, na-emekwa ihe o mere ka ihe na-agara ya nke ọma. Ọ bụrụ na anyị ana-eche otú omume anyị ga-esi kpaa adịm ná mma anyị na Jehova aka, ọ bụrụkwa na anyị eburu iwu ya n’obi mgbe anyị na-ekpebi ihe anyị ga-eme, ọ pụtara na anyị nwere ezi amamihe.

Nke abụọ, Ilu 18:1 kwuru, sị: “Onye na-akpa iche ga-achọ ihe na-agụ naanị onwe ya; ọ bụ ezi amamihe niile ka ọ ga-agbaso mgba.” Ọ bụrụ na anyị akpacharaghị anya, anyị nwere ike hapụ Jehova na ọgbakọ ya. Ọ bụrụ na anyị achọghị ịna-akpapụ iche, anyị na ndị na-atụ egwu aha Jehova na ndị na-erubere iwu ya isi kwesịrị ịna-akpachi anya. Anyị kwesịrị ịna-aga ọmụmụ ihe n’Ụlọ Nzukọ Alaeze ka anyị soro ọgbakọ Ndị Kraịst na-akpachi anya. Obi anyị na uche anyị kwesịrị ịdị n’ihe a na-amụ n’ọmụmụ ihe, anyị ana-agbakwa mbọ ka ihe a na-ekwu ruo anyị n’obi.

Ọ bụrụkwa na anyị na-ekpe ekpere gwa Jehova otú obi dị anyị, anyị na ya ga na-adịkwu ná mma. (Ilu 3:5, 6) Obi anyị dịrị n’ihe anyị na-agụ ma na Baịbụl ma n’akwụkwọ nzukọ Jehova na-ebipụtara anyị, anyị ga-amata ihe omume anyị ga-emecha  kpata, anyị emeekwa ihe anyị kwesịrị ime. Anyị kwesịkwara ịnabata ndụmọdụ ụmụnna ma nke a na-akọ na-enye anyị. (Ilu 19:20) Anyị mee otú ahụ, anyị ga na-enwekwu ezi amamihe, kama ịjụ ya.

Ezi amamihe nwere ike ichebe ezinụlọ. Dị ka ihe atụ, Baịbụl gwara onye bụ́ nwunye ka ọ “na-akwanyere di ya ùgwù nke ukwuu.” (Efe. 5:33) Olee otú di ga-esi mee ka nwunye ya na-akwanyere ya ezigbo ùgwù? Ọ manye nwunye ya amanye, nwunye ya nwere ike ịkwanyere ya ùgwù mgbe ahụ, na-asọpụrụ ya mgbe ọ nọ ya ka ha ghara ise okwu. Ma, ọ̀ ga-achọ irubere ya isi mgbe ọ na-anọghị ya? O nwere ike ọ gaghị achọ. O kwesịrị ịchọpụta ihe ga-eme ka nwunye ya na-akwanyere ya ùgwù mgbe niile. Ọ bụrụ na ọ na-akpa àgwà ndị so ná mkpụrụ nke mmụọ nsọ, ma ịhụ nwunye ya n’anya ma ịdị obiọma, nwunye ya ga na-akwanyere ya ezigbo ùgwù. Ma, nwunye bụ́ Onye Kraịst kwesịrị ịna-akwanyere di ya ùgwù, ma di ya ọ̀ na-akpa àgwà ọma ma ọ bụ na ọ naghị akpa.—Gal. 5:22, 23.

Baịbụl kwukwara na di kwesịrị ịhụ nwunye ya n’anya. (Efe. 5:28, 33) Nwunye nwere ike iche na ọ ga-akacha mma izochi ihe ndị na-adịghị mma di ya kwesịrị ịma n’ihi na ọ chọrọ ka di ya hụ ya n’anya. Ma, ọ̀ na-egosi na o nwere ezi amamihe? Di ya mechaa chọpụta ihe ndi ahụ o zochiri, gịnị ga-eme? Ọ̀ ga-ahụkwu ya n’anya? O nwere ike isiri di ya ike. Kama, nwaanyị wepụta oge dabara adaba, wetuo obi kọwaara di ya ihe ndị ahụ na-adịghị mma, obi nwere ike ịtọ ya ụtọ na nwunye ya gwara ya eziokwu. Ọ ga-ahụkwu ya n’anya.

Ụmụ kwesịrị ịna-erubere papa ha na mama ha isi. Ndị nne na nna kwesịkwara ịna-azụ ụmụ ha otú Jehova chọrọ. (Efe. 6:1, 4) Ọ̀ pụtara na ha ga-edepụtara ụmụ ha ihe niile ha kwesịrị ịna-eme na ihe ha na-ekwesịghị ịna-eme? Ihe ha ga-eme abụghị naanị ịgwa ụmụ ha ihe ha chọrọ ka ha na-eme ma ọ bụ ịta ha ahụhụ ma ha mejọọ ihe. Nne ma ọ bụ nna nwere ezi amamihe na-enyere nwa ya aka ịghọta ihe mere o ji kwesị irube isi.

Dị ka ihe atụ, ka e were ya na nwatakịrị kparịrị papa ya ma ọ bụ mama ya. Ịgwa ya okwu ọjọọ ma ọ bụ iji iwe taa ya ahụhụ nwere ike imenye ya ihere ma ọ bụ mee ka ọ gbachi nkịtị. Ma o nwere ike buru iwe n’obi, gharazie ịna-abịa papa ya na mama ya nso.

Nne na nna ndị nwere ezi amamihe ga-ebu ụzọ chee otú ha kwesịrị isi dọọ ụmụ ha aka ná ntị nakwa uru ọ ga-abara ụmụ ha n’ọdịnihu. Ha ekwesịghị iji iwe mee nwa ha ihe ozugbo maka na o mechuru ha ihu. Mgbe naanị ha na ya nọ, ha nwere ike wetuo obi gwa ya na Jehova chọrọ ka ọ na-erubere ha isi ka o nwee ike ịdị ndụ ebighị ebi. Mgbe nwa ahụ na-eme ihe gosiri na ọ na-asọpụrụ ndị mụrụ ya, ọ ga-aghọta na ọ bụ Jehova ka ọ na-asọpụrụ. (Efe. 6:2, 3) Iji aka a na-azụ nwatakịrị nwere ike iru ya n’obi, ya amata na papa ya na mama ya hụrụ ya n’anya, ya ana-akwanyekwuru ha ùgwù. Ọ ga-enwezi ike ịgwa ha ka ha nyere ya aka ma o mechaa nwee ihe ya na ya na-alụ.

Ụfọdụ ndị nne na nna anaghị adọ nwa ha aka ná ntị n’ihi na ha achọghị ịkpasu ya iwe. Ma, gịnị ga-eme ma nwa ahụ too? Ọ̀ ga na-atụ egwu Jehova ma ghọta na ime ihe Chineke kwuru na-aba uru? Ọ̀ ga-eji obi ya niile na-efe Jehova, ka ọ̀ ga-ahapụ ọgbakọ Jehova?—Ilu 13:1; 29:21.

Ezigbo onye na-akpụ ihe na-ebu ụzọ chee otú ọ chọrọ ka ihe ọ na-akpụ dịrị. Ọ naghị eme ya were ụrọ, ya akpụwa ya n’echeghị echiche, buru n’obi na ọ ga-akpụta ya. Nne na nna ndị nwere ezi amamihe na-ewepụta oge na-amụ ihe Jehova kwuru, na-emekwa ya, sí otú ahụ na-atụ egwu aha ya. Ha na-enwe ezi amamihe ma jiri ya na-eme ka okwukwe ezinụlọ ha sie ike. Ha anaghị ahapụ Jehova na nzukọ ya.

Ihe ndị anyị na-ekpebi kwa ụbọchị nwere ike ịbara anyị uru ma ọ bụ ghọ anyị ahịa n’ọdịnihu. Kama imewe ihe ọkụ ọkụ n’echeghị ya eche, buru ụzọ chebara ya echiche. Chebara nsogbu ọ ga-akpata echiche. Rịọ Jehova ka o duzie gị, jirikwa amamihe o nyere gị mee ihe bara uru. Anyị mee otú ahụ, o gosiri na anyị na-echekwa ezi amamihe. Anyị ga-enwetakwa ndụ.—Ilu 3:21, 22.