Gịnị Mere Ọtụtụ Ndị Anaghịzi Akwanyere Ndị Ezinụlọ Ha Ùgwù?

KPỌWA

IHE MERE MMADỤ ỊKWANYERE NDỊ EZINỤLỌ YA ÙGWÙ JI DỊ MKPA

Ọ bụrụ na anyị ana-akwanyere ndị ezinụlọ anyị ùgwù, ọ ga-eme ka obi ruo onye ọ bụla nọ n’ezinụlọ ala, ma di ma nwunye ma ụmụ.

Akwụkwọ bụ́ The Seven Principles for Making Marriage Work kwuru na ọ bụrụ na di na nwunye na-akwanyere ibe ha ùgwù, ha ga na-egosi ibe ha ịhụnanya, “ọ bụghị naanị ná nnukwu ihe, kama n’ụmụ obere ihe ha na-emere ibe ha kwa ụbọchị.”
Nchọpụta e mere gosiri na ụmụaka ndị mụtara ịkwanyere ndị ọzọ ùgwù na-aka enwe obi ụtọ, ha na ndị mụrụ ha na-aka adị ná mma, uche na-akakwa akpakọ ha ọnụ.

IHE I NWERE IKE IME

Gị na ndị ezinụlọ unu kpebie otú unu ga na-esi akwanyere ibe unu ùgwù. Ihe mbụ unu ga-eme bụ ijide n’aka na onye ọ bụla nọ n’ezinụlọ unu ghọtara ihe ịkwanyere ndị ọzọ ùgwù pụtara. Ihe nke abụọ unu ga-eme bụ ide àgwà ndị onye ọ bụla nọ n’ezinụlọ unu kwesịrị ịkpa na ndị nke ọ na-ekwesịghị ịkpa. Nke atọ abụrụzie unu niile ịkparịta ya ka ụmụ unu nakwa ununwa mara ihe unu ga na-eme iji na-akwanyere ibe unu ùgwù.

“Atụmatụ onye na-arụsi ọrụ ike ga-eme ka ihe gaziere ya.”—Ilu 21:5.

Ka ndị ọzọ si n’aka gị na-amụta ihe. Ị̀ na-akatọ ndị ezinụlọ gị maka ihe ndị ha na-anaghị emeta, na-akwa ha emo ma ha kwuo uche ha, ma ọ bụ leghara ha anya ma ọ bụkwanụ nara ha okwu n’ọnụ mgbe ha na-agwa gị okwu?

Ihe Ndị Ga-enyere Gị Aka: Gbalịa ka i were ịkwanyere di gị ma ọ bụ nwunye gị na ụmụ unu ùgwù ka ụgwọ i ji ha, ọ bụghị ka ihe ha ga-enweta n’aka gị naanị mgbe ha na-eme nke ọma.

“Na-ebunụ ụzọ asọpụrụ ndị ọzọ.” —Ndị Rom 12:10.

Ọ bụrụgodị na i kwetaghị ihe onye nke ọzọ kwuru, kwanyere ya ùgwù. Ị gwawa onye nke ọzọ ihe dị gị n’obi, ekwula ihe ndị dị ka “mgbe niile, ị na-eme” ma ọ bụ “o nweghị mgbe ị na-eme.” Ịgwa onye ezinụlọ gị ụdị okwu a ga-akpasu ya iwe, o nwekwara ike ime ka obere nghọtahie bụrụzie nnukwu esemokwu.

“Mmadụ na-akwụsị iwe iwe ma e wetuo obi zaa ya okwu, ma okwu ọjọọ na-akpasu iwe.”—Ilu 15:1.

IHE ANYỊ NA-EME

Ndịàmà Jehova na-agba ndị nọ n’ezinụlọ ume ka ha na-akwanyere ibe ha ùgwù. Ọtụtụ mgbe, a na-ekwu gbasara ya n’isiokwu dị iche iche, n’akwụkwọ, na broshọ, nakwa na vidio ndị anyị na-ewepụta. Onye ọ bụla nwere ike inweta ihe ndị a n’akwụghị ụgwọ ọ bụla.

MAKA NDỊ DI NA NWUNYE: Isiokwu dị iche iche a kpọrọ Ihe Ndị Ga-enyere Ezinụlọ Aka nwere ike inyere ndị di na nwunye aka . . .

ịna-ege ntị nke ọma
ịkwụsị ịgbachi ibe ha nkịtị
ịkwụsị ịbarịta mba

(Gaa na jw.org chọọ “Ihe Ndị Ga-enyere Ezinụlọ Aka”)

MAKA NDỊ NNE NA NNA: Isiokwu dị iche iche a kpọrọ Ihe Ndị Ga-enyere Ezinụlọ Aka nwere ike inyere ndị nne na nna aka ịzụ ụmụ ha ka ha . . .

na-erube isi
nye aka na-arụ ọrụ ndị a na-arụ n’ụlọ
na-asị “biko” na “i meela”

(Gaa na jw.org chọọ “Ịzụ Ụmụ” na “Ịzụ Ndị Na-eto Eto”)

I nwere ike ịgụ isiokwu bụ́ “Ajụjụ Ndị Nne na Nna Na-ajụ.” Ọ gbara n’isiokwu ndị ọzọ n’akwụkwọ bụ́ Ajụjụ Ndị Na-eto Eto Na-ajụ—Azịza Ndị Na-adị Irè, Nke 1. (Gaa na jw.org chọọ “Ajụjụ Ndị Nne na Nna Na-ajụ.”)

MAKA NDỊ NA-ETO ETO: Isiokwu dị iche iche, vidio, na ihe omume ndị na-agba n’ebe a kpọrọ Ndị Na-eto Eto na jw.org nwere ike inyere ndị na-eto eto aka . . .

ka ha na ndị mụrụ ha na ụmụnne ha na-adị ná mma
ka ha na-akwanyere ndị mụrụ ha ùgwù mgbe ha na ha na-ekwurịta gbasara iwu ndị mụrụ ha nyere ha
ka ha na-akpa àgwà otú ga-eme ka ndị mụrụ ha tụkwasị ha obi

(Gaa na jw.org chọọ “Ndị Na-eto Eto”)

A naghị ana mmadụ ego maka ịga na jw.org. E nweghị ụgwọ a na-akwụ ma ọ bụ òtù mmadụ ga-abanye na ya tupu ya agaa na ya. A naghịkwa agwa mmadụ ka o kwuo ihe ụfọdụ gbasara onwe ya tupu ya abanye na ya.

TETA!