Ị̀ gụọla Ụlọ Nche ndị e bipụtara n’afọ a nke ọma? Ngwa, lee ma ị̀ ga-azali ajụjụ ndị a:

Gịnị ka ‘ịgbanwe otú anyị si eche echiche’ pụtara? (Rom 12:2)

Ihe ọ pụtara abụghị naanị ịna-eme ihe ọma. Ọ pụtakwara na anyị ga-eleru onwe anyị anya ma gbanwee ihe ọ bụla anyị kwesịrị ịgbanwe ka ndụ anyị nwee ike ịdaba n’ihe Jehova chọrọ ka anyị na-eme.​—w23.01, peeji nke 8 na nke 9.

Gịnị ka anyị kwesịrị iburu n’obi ka anyị na-ahụ ihe ndị na-eme n’ụwa?

Ọ na-atọ anyị ụtọ ịhụ otú ihe ndị na-eme n’ụwa taa si emezu amụma Baịbụl. Ma, anyị ekwesịghị ikwuwe ihe anyị chere nwere ike ime n’ihi na o nwere ike ime ka ọgbakọ ghara ịdị n’otu. Kama, ihe anyị na ndị ọzọ na-ekwurịta kwesịrị ịbụ ihe nzukọ Jehova bipụtara. (1 Kọr. 1:10)​—w23.02, peeji nke 16.

Olee otú baptizim e mere Jizọs si dị iche na nke e mere ndị na-eso ụzọ ya?

Ebe ọ bụ na a mụrụ Jizọs ná mba e nyefere Jehova, ọ dịghị mkpa ka o nyefee Jehova onwe ya otú anyịnwa na-eme. Jizọs zuru okè, o meghịkwa mmehie. O kwesịghị ichegharị ná mmehie ya.​—w23.03, peeji nke 5.

Olee otú anyị ga-esi nyere ndị ọzọ aka ịza ajụjụ n’ọmụmụ ihe?

Anyị kwesịrị ịza ajụjụ dị nkenke. Ọ ga-enye ndị ọzọ ohere ịza ajụjụ. Anyị ekwesịghịkwa ikwu banyere ọtụtụ ihe. Ọ ga-eme ka ndị ọzọ nwee ihe ha ga-aza.​—w23.04, peeji nke 23.

Gịnị bụ “Ụzọ Dị Nsọ” e kwuru okwu ya n’Aịzaya 35:8?

N’oge ochie, ọ nọchiri anya okporo ụzọ ndị Izrel si laa obodo ha mgbe ha si Babịlọn a dọọrọ ha n’agha na-alaghachi. Oleekwanụ maka oge anyị a? Ọtụtụ narị afọ tupu afọ 1919, a kwadebere ụzọ ahụ. A malitere ịsụgharị Baịbụl na ibi ya, meekwa ihe ndị ọzọ. Ndị Chineke na-aga ije ‘n’Ụzọ Dị Nsọ,’ nke na-enyere anyị aka ịna-efe Jehova ugbu a nakwa n’ọdịnihu, mgbe Alaeze Chineke ga-eme ka ọtụtụ ihe ọma mee n’ụwa a.​—w23.05, peeji nke 15 ruo na nke 19.

Olee ụmụ nwaanyị abụọ Ilu isi 9 nyere ndụmọdụ gbasara ha?

Ilu kwuru gbasara “nwaanyị nzuzu,” onye ndị zara òkù ya na-abanye n’ime “ili,” kwuokwa gbasara “ezigbo amamihe,” nke e ji otu nwaanyị mee ihe atụ ya, onye ndị zara òkù ya ‘ga na-ebi ndụ otú na-egosi na ha na-aghọta ihe.’ Ha ga-enwetakwa ndụ. (Ilu 9:1, 6, 13, 18)​—w23.06, peeji nke 22 ruo na nke 24.

Olee otú otú Jehova si meso Lọt ihe si gosi na ọ dị umeala n’obi ma na-ele ihe anya otú kwesịrị ekwesị?

Jehova gwara Lọt ka o si Sọdọm gbaga n’ebe bụ́ ugwu ugwu. Mgbe Lọt rịọrọ Jehova ka o kwe ka ọ gbaga Zoa kama ịgbaga ebe ahụ Jehova kwuru, Jehova kwere.​—w23.07, peeji nke 21.

Olee ihe nwaanyị nwere ike ime ma ọ bụrụ na di ya na-ele ndị gba ọtọ?

O kwesịrị icheta na ọ bụghị yanwa ka ụta dịịrị. O kwesịrị ilekwasị anya n’ihe ndị ga-eme ka ya na Jehova dịrị ná mma, tụgharịa uche n’ihe Baịbụl kọrọ gbasara ụmụ nwaanyị nọ na-echegbu onwe ha, Chineke enyere ha aka. O nwere ike inyere di ya aka izere ihe ndị nwere ike itinye ya n’ọnwụnwa.​—w23.08, peeji nke 14 ruo na nke 17.

Ọ bụrụ na mmadụ ajụọ anyị ajụjụ gbasara ihe anyị kweere, olee otú nghọta ga-esi enyere anyị aka ịdị nwayọọ?

Anyị nwere ike iche gbasara otú ajụjụ ahụ nwere ike isi mee ka anyị mata ihe dị ya n’obi. Ọ ga-eme ka anyị meda obi zaghachi ya.​—w23.09, peeji nke 17.

Olee ihe anyị ga-amụta n’otú Meri si nweta ike?

Mgbe Meri matara na ya ga-abụ nne Mezaya, o kwere ka ndị ọzọ nyere ya aka. Gebriel na Elizabet si n’Akwụkwọ Nsọ gbaa ya ume. Ụmụnna anyị nwekwara ike ime ka anyị dị ike.​—w23.10, peeji nke 15.

Olee otú Jehova nwere ike isi aza ekpere anyị?

Jehova kwere nkwa na ọ ga-ege ntị n’ekpere anyị. Ọ na-echebakwara otú ekpere anyị si gbasa nzube ya echiche. (Jere. 29:12) Otú o nwere ike isi aza otu ihe ndị ohu ya rịọrọ ya nwere ike ịdị iche iche, ma ọ ga-akwado anyị mgbe niile.​—w23.11, peeji nke 21 na nke 22.

Ndị Rom 5:2 kwuru gbasara “olileanya.” Gịnịzi mere e ji kwuo gbasara ya ọzọ n’amaokwu nke 4?

Mmadụ nụ ozi ọma, o nwere ike inwe olileanya na ọ ga-ebi n’ụwa mgbe ọ ga-abụ paradaịs. Ma, ọ bụrụ na ọnwụnwa abịara ya, ya edie ya, hụkwa na ya na Chineke dị ná mma, o nwere ike ime ka olileanya ya sikwuo ike, obi esikwuokwa ya ike na ọ ga-emezu.​—w23.12, peeji nke 12 na nke 13.