Otu ụbọchị, otu nwanna nwaanyị na Niu Ziland lere vidio aha ya bụ ‘Na-elekọta Ibe Anyị,’ ebe e kwuru otú Jehova si enwere anyị ọmịiko na otú o si enyere anyị aka. (Aịza. 63:7-9) O kpebiri na ọ ga-eme ihe ọ mụtara ma na-enyere ndị ọzọ aka. Mgbe ọ gara ịzụrụ ihe ná mgbede ụbọchị ahụ, ọ hụrụ otu nwaanyị na-enweghị ụlọ ma gwa ya na ọ chọrọ ịzụnye ya nri. Nwaanyị ahụ kwetara. Mgbe nwanna nwaanyị ahụ wetaara ya ihe ọ zụtaara ya, o ji ohere ahụ gwa ya gbasara Jehova ma gosi ya traktị isiokwu ya bụ Ò Nwere Mgbe Nsogbu Ụwa A Ga-akwụsị?

Nwaanyị ahụ malitere ibe ákwá. Ọ gwara ya na ndị ezinụlọ ha bụ Ndịàmà Jehova nakwa na ọ pụrụ n’ọgbakọ ọtụtụ afọ gara aga. Ma, ọ dịbeghị anya ọ rịọwara Jehova ka o nyere ya aka ka ọ lọghachi n’ọgbakọ. Nwanna nwaanyị ahụ nyere ya Baịbụl, haziekwa otú ọ ga-esi na-amụrụ ya ihe. a

Anyị nwere ike ịna-enwere ndị mmadụ ọmịiko ka Jehova, ma ndị ikwu anyị ma ụmụnna anyị. Otú ọzọ anyị nwere ike isi na-enwere ndị ọzọ ọmịiko bụ ịna-achọ ohere anyị ga-eji na-ezi ha ozi ọma.