1. Gịnị mere Pọl onyeozi ji gwa Ndị Kraịst bụ́ ndị Hibru n’oge ndịozi Jizọs ka ha na-agbarịta ibe ha ume “karị”?

GỊNỊ mere anyị kwesịrị iji gbalịsie ike na-agba ndị ọzọ ume? Pọl onyeozi gwara anyị ihe mere anyị kwesịrị iji mee otú ahụ n’akwụkwọ ozi o degaara Ndị Kraịst bụ́ ndị Hibru. Ọ gwara ha, sị: “Ka anyị na-echebakwara ibe anyị echiche iji kpalie ịhụnanya na ịrụ ezi ọrụ, ka anyị ghara ịhapụ nzukọ anyị, dị ka ụfọdụ ndị na-emekarị, kama ka anyị na-agbarịta ibe anyị ume, na-emekwa otú ahụ karị, ka unu na-ahụ ụbọchị ahụ ka ọ na-eru nso.” (Hib. 10:​24, 25) N’ihe na-erughị afọ ise o kwuchara ihe a, ndị Juu bụ́ Ndị Kraịst bi na Jeruselem ga-ahụ ka ‘ụbọchị Jehova’ na-abịa. Ha ghọtara na ha kwesịrị isi n’obodo ahụ gbapụ, otú ahụ Jizọs gwara ha mee. (Ọrụ 2:​19, 20; Luk 21:​20-22) Ụbọchị Jehova ahụ bịara n’afọ 70, mgbe ndị Rom bibiri Jeruselem.

2. Gịnị mere anyị kwesịrị iji nwekwuo mmasị ịgba ụmụnna anyị ume taa?

² Taa, o doro anyị anya na ‘oké ụbọchị Jehova, nke dịkwa oké egwu,’ dị nso. (Joel 2:11) Zefanaya onye amụma kwuru,  sị: “Oké ụbọchị Jehova dị nso. Ọ dị nso, o jikwa oké ọsọ na-abịa.” (Zef. 1:14) Amụma a gbasakwara anyị taa. N’ihi otú ụbọchị Jehova si dịrị nso, Pọl gwara anyị ka anyị “na-echebakwara ibe anyị echiche iji kpalie ịhụnanya na ịrụ ezi ọrụ.” (Hib. 10:24) N’ihi ya, anyị kwesịrị ịna-echebakwuru ụmụnna anyị echiche, ka anyị nwee ike ịna-agba ha ume mgbe ọ dị mkpa.

3. Gịnị ka Pọl onyeozi kwuru gbasara ịgba ndị ọzọ ume? (Lee ihe e sere ná mmalite isiokwu a.)

³ Baịbụl sịrị: “Ọ bụ nchegbu nke dị n’obi mmadụ ga-anyịgbu ya, ma, ọ bụ okwu ọma na-eme ka ọ ṅụrịa ọṅụ.” (Ilu 12:25) Ihe a na-eme anyị niile. E kwesịrị ịna-agba anyị niile ume mgbe ụfọdụ. Ihe Pọl kwuru gosiri na onye na-agba ndị ọzọ ume kwesịkwara ka a gbaa ya ume. O degaara Ndị Kraịst bi na Rom akwụkwọ ozi, sị: “Ọ na-agụsi m agụụ ike ịhụ unu, ka m wee nyetụ unu onyinye ime mmụọ, ka e wee mee ka unu guzosie ike; ma ọ bụ, kama nke ahụ, ka anyị wee gbarịta ibe anyị ume, onye ọ bụla site n’okwukwe nke ibe ya, ma nke unu ma nke m.” (Rom 1:​11, 12) N’ihi ya, e kwesịkwara ịgba Pọl ume mgbe ụfọdụ.​—⁠Gụọ Ndị Rom 15:​30-32.

4, 5. Olee ndị anyị kwesịrị ịgba ume taa? Maka gịnị?

⁴ E kwesịrị ịja ụmụnna ndị hapụrụ ihe ụfọdụ ka ha nwee ike ijekwuru Jehova ozi, mma. Ụfọdụ n’ime ha bụ ndị ọsụ ụzọ ji obi ha niile na-eje ozi. Ọtụtụ n’ime ha hapụrụ ihe ndị ha na-eme iji sụọ ụzọ. Otú ahụkwa ka ndị ozi ala ọzọ, ndị na-eje ozi na Betel, ndị nlekọta sekit na ndị nwunye ha, nakwa ndị na-arụ ọrụ n’ọfis ndị nsụgharị hapụrụ ihe ndị ha na-eme. N’ihi ya, anyị kwesịrị ịna-agba ha ume. Ndị ọzọ obi na-atọ ụtọ ma a gbaa ha ume bụ ndị chọrọ ịnọgide n’ozi oge niile, ma n’ihi otú ihe si dịrị ha, ha akwụsị.

⁵ Ụmụnna anyị ndị na-alụbeghị di ma ọ bụ nwunye n’ihi na ha chọrọ ime ihe Baịbụl kwuru, nke bụ́ ka anyị lụọ “naanị n’ime Onyenwe anyị,” bụkwa ndị ọzọ anyị kwesịrị ịgba ume. (1 Kọr. 7:39) Ndị bụ́ nwunye na-enwekwa obi ụtọ ma di ha gwa ha okwu na-agba ha ume. (Ilu 31:​28, 31) Ndị Kraịst a na-akpagbu ma ọ bụ ndị na-arịa ọrịa ma ha anọgide na-efe Jehova, kwesịkwara ka a gbaa ha ume. (2 Tesa. 1:​3-5) Jehova na Kraịst na-akasi ụmụnna ndị a niile na-efe ya, obi.​—⁠Gụọ 2 Ndị Tesalonaịka 2:​16, 17.

6. Olee ọrụ ndị okenye na-arụ, nke e kwuru gbasara ya n’Aịzaya 32:​1, 2?

⁶ Gụọ Aịzaya 32:​1, 2. Jizọs si n’aka ụmụnna ya e tere mmanụ nakwa “ndị isi,” ya bụ, ndị okenye so n’atụrụ ọzọ na-agba ndị dara mbà n’obi ume ma na-eduzi ha n’oge a ihe siri ike. Ndị okenye ndị a abụghị “ndị nwe” okwukwe anyị, kama ha bụ “ndị ọrụ ibe” anyị, ndị na-eme ka anyị na-enwe ọṅụ.​—⁠2 Kọr. 1:⁠24.

7, 8. E wezụga ịgwa mmadụ okwu iji gbaa ya ume, olee ihe ọzọ ndị okenye kwesịrị ime iji gbaa ụmụnna ha ume?

⁷ Pọl onyeozi mere ihe ndị okenye kwesịrị iṅomi. O degaara Ndị Kraịst a na-akpagbu na Tesalonaịka akwụkwọ ozi, sị: “Ebe anyị nwere ịhụnanya dị ukwuu n’ebe unu nọ, ọ masịrị anyị ọ bụghị naanị izi unu ozi ọma Chineke, kamakwa inye unu mkpụrụ obi anyị, n’ihi na unu ghọrọ ndị anyị hụrụ n’anya.”​—⁠1 Tesa. 2:⁠8.

⁸ Ihe Pọl gwara ndị okenye nọ n’Efesọs gosiri na ịgwa mmadụ okwu iji gbaa ya ume abụghị naanị ihe anyị kwesịrị ime. Ọ gwara ha, sị: “Unu aghaghị inyere ndị  na-adịghị ike aka, unu aghaghịkwa iburu okwu Onyenwe anyị Jizọs n’uche, mgbe ya onwe ya sịrị, ‘A na-enweta obi ụtọ ka ukwuu n’inye ihe karịa ka a na-enweta n’ịnara ihe.’ ” (Ọrụ 20:35) Ọ bụghị naanị na Pọl dị njikere ịgba ụmụnna ya ume, kama ọ dịkwa njikere ‘ikwe ka e jiri ya mee ihe n’ụzọ zuru ezu,’ maka ha. (2 Kọr. 12:15) Ndị okenye kwesịkwara ime ka Pọl. Ọ bụghị naanị okwu ọnụ ka ha kwesịrị iji na-agba ụmụnna ha ume, kama ha kwesịkwara igosi na ihe banyere ụmụnna ha na-emetụ ha n’obi, si otú ahụ gbaa ha ume.​—⁠1 Kọr. 14:⁠3.

9. Olee otú ndị okenye ga-esi nye ụmụnna ndụmọdụ ya agbaa ha ume?

⁹ Mgbe ụfọdụ, ndị okenye kwesịrị inye ụmụnna ha ndụmọdụ iji gbaa ha ume. Ha kwesịrị isi na Baịbụl mụta otú ha ga-esi eme ya. Mgbe a kpọlitere Jizọs n’ọnwụ, o gosiri anyị ụzọ magburu onwe ya anyị kwesịrị isi enye ndụmọdụ mgbe o zigaara ọgbakọ ndị dị n’Eshia Maịnọ ozi. O nwere ndụmọdụ ụfọdụ gbara ọkpụrụkpụ ọ ga-enye ọgbakọ ndị dị n’Efesọs, Pagamọm, na Tayataịra. Ma, tupu ya enye ha ndụmọdụ ndị ahụ, ọ jara ha mma maka ihe ọma niile ha na-eme. (Mkpu. 2:​1-5, 12, 13, 18, 19) Ọ gwara ọgbakọ dị na Leodisia, sị: “Ndị niile m hụrụ n’anya nke ukwuu ka m na-abara mba, na-adọkwa aka ná ntị. Ya mere, na-anụ ọkụ n’obi, chegharịakwa.” (Mkpu. 3:19) Ndị okenye kwesịkwara iṅomi Kraịst ma ha nyewe ndụmọdụ.

10. Olee otú anyị niile nwere ike isi gbarịta ibe anyị ume?

¹⁰ Ọ bụghị naanị ndị okenye kwesịrị ịna-agba ndị ọzọ ume. Pọl gbara Ndị Kraịst niile ume ka ha na-ekwu “okwu dị mma maka iwuli elu dị ka ọ pụrụ ịdị mkpa, ka o wee mee ka ndị na-anụ ya nweta ihe dị mma.” (Efe. 4:29) Anya kwesịrị ịna-eru anyị ala ka anyị mata mgbe ụmụnna anyị nwere mkpa. Pọl gwara Ndị Kraịst bụ́ ndị Hibru, sị: “Na-agbatịnụ aka kụdara akụda na ikpere na-adịghị  ike, na-emerenụ ụkwụ unu ụzọ kwụ ọtọ, ka e wee ghara ikwokapụ ihe dara ngwọrọ ná nkwonkwo ya, kama ka e wee gwọọ ya.” (Hib. 12:​12, 13) Anyị niile, ma ndị na-eto eto, nwere ike iji okwu ọnụ anyị gbarịta ibe anyị ume.

11. Olee ihe nyeere Nwanna Nwaanyị Marthe aka mgbe ọ dara mbà n’obi?

¹¹ Otu nwanna nwaanyị aha ya bụ Marthe * nwere mgbe ọ dara mbà n’obi. Ọ sịrị: “Mgbe m kpechara ekpere otu ụbọchị, ahụrụ m otu nwanna nwaanyị katarala ahụ́. O gosiri m na ya hụrụ m n’anya ma metere m ebere, bụ́kwanụ ihe m chọrọ mgbe ahụ. Ọ kọọrọ m ihe ndị o mere mgbe ụdị ihe a mere ya. Ihe ndị ọ gwara m mere ka m mata na ọ bụghị naanị m nwetụrụla nsogbu a.” O nwere ike ịbụ na nwanna nwaanyị ahụ amaghị na ihe ahụ ọ gwara Marthe baara ya uru.

12, 13. Olee otú anyị nwere ike isi mee ihe e kwuru ná Ndị Filipaị 2:​1-4?

¹² Pọl gwara ndị nọ n’ọgbakọ Filipaị, sị: “Ya mere, ọ bụrụ na e nwere agbamume ọ bụla n’ime Kraịst, ọ bụrụ na e nwere ngụgụ obi ọ bụla nke ịhụnanya, ọ bụrụ na e nwere mmụọ ọ bụla nke ichebara ibe unu echiche, ọ bụrụ na e nwere obi ọmịiko na obi ebere ọ bụla, meenụ ka ọṅụ m zuo ezu site n’inwe otu obi nakwa inwe otu ịhụnanya, bụrụ ndị e jikọrọ ná mkpụrụ obi, na-eburu otu echiche ahụ n’uche, ghara ime ihe ọ bụla n’ihi esemokwu ma ọ bụ n’ihi ịbụ ndị onwe ha na-ebu isi, kama n’ịdị nwayọọ n’obi na-ewere na ndị ọzọ ka unu, na-elekwasị anya, ọ bụghị naanị n’ọdịmma onwe unu, kamakwa n’ọdịmma nke ndị ọzọ.”​—⁠Fil. 2:​1-4.

¹³ Anyị niile kwesịrị ịgba mbọ na-achọ ihe ga-abara ndị ọzọ uru. Ka anyị nwee ike ịgba ụmụnna anyị ume, anyị kwesịrị iji ịhụnanya na-akasi ha obi, na-egosi ha na anyị na-echebara ha echiche, ma na-enwere ha ọmịiko.

14. Olee otu ụzọ anyị nwere ike isi gbaa mmadụ ume?

¹⁴ Anyị nụ na ndị anyị nyeere aka n’oge ndị gara aga ka na-efe Jehova, ọ na-agba anyị ume. Otú ahụ ka ọ dịkwa Jọn onyeozi. Ọ sịrị: “Ọ dịghị ihe ọzọ ga-eme ka m nwee obi ekele karịa ihe a, ya bụ, na m ga na-anụ na ụmụ m na-eje ije n’eziokwu ahụ.” (3 Jọn 4) Obi na-atọ ọtụtụ ndị ọsụ ụzọ ụtọ ma ha nụ na ụfọdụ n’ime ndị ha nyeere aka ọtụtụ afọ gara aga ha abata n’ọgbakọ ka na-efe Jehova, ma ọ bụdị na ha na-asụ ụzọ. Ichetara ọsụ ụzọ dara mbà n’obi ihe ndị o mere n’oge gara aga nke mere ya obi ụtọ, nwere ike ịgba ya ume.

15. Olee otu ụzọ anyị nwere ike isi gbaa ndị ji obi ha niile na-ejere Jehova ozi, ume?

¹⁵ Ọtụtụ ndị nlekọta sekit kwuru na ha na ndị nwunye ha letachaa ọgbakọ, ụmụnna edetara ha akwụkwọ ozi iji kelee ha, na ọ na-agba ha ume. Otú ahụ ka ọ na-adịkwa ndị okenye, ndị ozi ala ọzọ, ndị ọsụ ụzọ na ndị na-eje ozi na Betel ma a na-ekele ha maka ozi ha na-ejere Jehova.

16. Olee ihe ndị dị mfe anyị nwere ike ime iji gbaa mmadụ ume?

¹⁶ Ọ gaghị adị mma ma anyị chee na anyị agaghị agbali ndị ọzọ ume n’ihi na ọ naghị adịrị anyị mfe ịgwa mmadụ okwu. Ịgba ndị ọzọ ume esighị oké ike. I nwere ike mụmụọrọ mmadụ ọnụ ọchị ma i kelewe ya, ma ọ mụmụrụghị gị ọnụ ọchị, o nwere ike ịbụ na e nwere ihe na-enye ya nsogbu. Naanị ige ya ntị nwere ike ịgba ya ume.​—⁠Jems 1:⁠19.

17. Olee ihe gbara otu nwanna na-eto eto ume?

 ¹⁷ Obi jọrọ otu nwanna na-eto eto aha ya bụ Henri njọ mgbe ndị ikwu ya hapụrụ ọgbakọ. Papa ya, onye bụbu okenye a na-akwanyere ùgwù, sokwa hapụ ọgbakọ. Otu onye nlekọta sekit chọpụtara na obi adịchaghị ya mma, ya akpọrọ ya gaa n’ebe a na-ere kọfị. O gere ya ntị mgbe ọ na-akọrọ ya otú o si dịrị ya n’obi. Ihe a onye nlekọta a mere gbara ya ume. Henri bịaziri ghọta na ihe ọ ga-eme iji nyere ndị ezinụlọ ya aka ka ha lọghachi n’ọgbakọ bụ ịnọgide na-efe Jehova. Ihe ọzọ kasiri ya obi bụ ịgụ Abụ Ọma 46; Zefanaya 3:17; na Mak 10:​29, 30.

18. (a) Gịnị ka Eze Sọlọmọn kwuru banyere ịgba mmadụ ume? (b) Olee ihe Pọl onyeozi kwuru ka anyị mee?

¹⁸ Akụkọ Marthe na Henri na-egosi na anyị nwere ike ịgba nwanna kwesịrị ka a gbaa ya ume, ume. Eze Sọlọmọn kwuru, sị: “Leekwa nnọọ ka okwu e kwuru n’oge ya si dị mma! Ìhè nke anya na-eme ka obi ṅụrịa; akụkọ dị mma na-eme ka ọkpụkpụ maa abụba.” (Ilu 15:​23, 30) Ihe ọzọ nwere ike ịgba onye dara mbà n’obi ume bụ ịgụrụ ya ihe dị n’Ụlọ Nche ma ọ bụ na jw.org. Ihe Pọl kwuru gosiri na ịgụkọ abụ Alaeze ọnụ nwere ike ịgba mmadụ ume. Ọ sịrị: “Jirinụ abụ ọma na otuto a na-enye Chineke na abụ ime mmụọ na amara na-ezi ibe unu ihe, na-adụkwa ibe unu ọdụ *, na-abụkunụ Jehova abụ n’ime obi unu.”​—⁠Kọl. 3:16; Ọrụ 16:⁠25.

19. Olee ihe mere ịgbarịta ibe anyị ume ga-eji dị ezigbo mkpa n’ọdịnihu? Gịnịkwa ka anyị kwesịrị ịna-eme?

¹⁹ Anyị kwesịrị ịna-agbarịta ibe anyị ume, karịchaa ugbu a anyị na-ahụ ka ụbọchị Jehova “na-eru nso.” (Hib. 10:25) Obi ga-adị anyị ụtọ ma anyị mee ihe Pọl kwuru. Ọ sịrị: “Na-akasirịtanụ ibe unu obi ma na-ewulirịtanụ ibe unu elu, dị nnọọ ka unu na-eme.”​—⁠1 Tesa. 5:⁠11.