1-2. Olee ihe pụrụ iche mere n’ụbọchị Pentikọst afọ 33?

N’ỤTỤTỤ otu ụbọchị Sọnde, a nọ na-eme ememme Pentikọst na Jeruselem n’afọ 33. Ndị na-eso ụzọ Jizọs dị ihe dị ka otu narị na iri abụọ gbakọrọ “n’ọnụ ụlọ dị n’elu.” (Ọrụ 1:13-15; 2:1) Abalị ole na ole gara aga, Jizọs gwara ha ka ha nọrọ na Jeruselem n’ihi na ha ga-enweta onyinye pụrụ iche. (Ọrụ 1:4, 5) Oleezi ihe mere?

² “Na mberede, a nụrụ ụzụ si n’eluigwe dị nnọọ ka oké ifufe nke na-efesi ike.” A nụrụ ụzụ ahụ n’ebe niile n’ụlọ ahụ. A hụkwara “ihe ndị dị ka ire ọkụ” dị n’isi ndị na-eso ụzọ ahụ. “Ha niile wee jupụta na mmụọ nsọ.” (Ọrụ 2:2-4) Jehova si n’ụzọ a pụrụ iche wụkwasị ha mmụọ nsọ ya. (Ọrụ 1:8) Ọ bụ ha bụ ndị mbụ Chineke ji mmụọ nsọ tee mmanụ, * meekwa ka ha nwee olileanya iso Jizọs chịa n’eluigwe.

3. N’ụbọchị Pentikọst, gịnị mere obi ji sie Ndị Kraịst ike na e ji mmụọ nsọ tee ha mmanụ?

³ A sị na i so ná ndị ahụ na-eso ụzọ Jizọs zukọrọ n’ọnụ ụlọ ahụ dị n’elu n’ụbọchị ahụ, i mekataghị chefuo ya echefu. Ihe yiri ire ọkụ bịara dị gị n’isi, gị ebido ikwu okwu n’asụsụ dị iche iche. (Ọrụ 2:5-12) Obi ga-esi gị ezigbo  ike na e ji mmụọ nsọ tee gị mmanụ. Ma, ọ̀ bụ mmadụ niile ka e si n’ụzọ pụrụ iche jiri mmụọ nsọ tee mmanụ nakwa n’otu oge ahụ ná ndụ ha? Mba. Olee otú anyị si mara?

4. Ná ndị niile e tere mmanụ n’oge ndịozi Jizọs, ọ̀ bụ n’otu oge ná ndụ ha ka e tere ha mmanụ? Kọwaa.

⁴ Ka anyị leba anya na mgbe e nwere ike iji mmụọ nsọ tee mmadụ mmanụ. Ọ bụghị naanị Ndị Kraịst ahụ dị ihe dị ka otu narị na iri abụọ ka e tere mmanụ na Pentikọst afọ 33. N’otu ụbọchị ahụ, e mechara nye ihe dị ka puku mmadụ atọ ndị ọzọ mmụọ nsọ Jizọs kwere ná nkwa. Ọ bụ mgbe ha mere baptizim ka e tere ha mmanụ. (Ọrụ 2:37, 38, 41) Ma, n’afọ ndị na-eso ya, ọ bụghị Ndị Kraịst niile e tere mmanụ ka e tere mmanụ mgbe e mere ha baptizim. E tere ndị Sameria mmanụ mgbe e mechara ha baptizim. (Ọrụ 8:14-17) Ndị nke ha dị iche bụ Kọnịliọs na ezinụlọ ya. E tere ha mmanụ tupu e mee ha baptizim.—Ọrụ 10:44-48.

5. Dị ka e kwuru ná 2 Ndị Kọrịnt 1:21, 22, olee ihe na-eme ma e jiri mmụọ nsọ tee mmadụ mmanụ?

⁵ Ka anyị leba anya n’ihe na-eme ma e jiri mmụọ nsọ tee mmadụ mmanụ. O nwere ike isiri ụfọdụ ndị e tere mmanụ ike ná mmalite ikweta na Jehova ahọrọla ha. Ha nwere ike ịna-eche, sị: ‘Gịnị mere Chineke ji họrọ m?’ O nwere ike ọ gaghị adị ndị ọzọ otú ahụ. Otú ọ bụla ọ dị mmadụ, Pọl onyeozi kọwara ihe na-eme ndị niile e tere mmanụ. Ọ sịrị: “Mgbe unu kweresịịrị, e sikwa n’aka ya jiri mmụọ nsọ ahụ e kwere ná nkwa kaa unu akara, * bụ́ ihe àmà e bu ụzọ nye anyị tupu anyị enweta ihe nketa anyị.” (Efe. 1:13, 14) N’ihi ya, Jehova na-eji mmụọ nsọ ya eme ka o doo Ndị Kraịst ndị ahụ anya na ọ họrọla ha. Ọ bụ otú ahụ ka  mmụọ nsọ si bụrụ ‘ihe àmà,’ ya bụ, ihe na-eme ka obi sie ha ike na ha ga-adị ndụ ebighị ebi n’eluigwe, ọ bụghị n’ụwa.—Gụọ 2 Ndị Kọrịnt 1:21, 22.

6. Olee ihe Onye Kraịst e tere mmanụ ga-eme ka o nwee ike ịga eluigwe?

⁶ Onye Kraịst ghọọ onye e tere mmanụ, ọ̀ pụtara na e nweghị ihe ga-eme ka ọ ghara ịga eluigwe? Mba. Ọ ga-edo ya anya na a họrọla ya ka ọ gaa eluigwe. Ma, o kwesịrị icheta ihe Pita kwuru. Ọ sịrị: “Ụmụnna m, gbalịsienụ ike ọbụna karị ka unu mee ka òkù a kpọrọ unu na nhọrọ a họọrọ unu bụrụ ihe unu onwe unu ji n’aka; n’ihi na ọ bụrụ na unu ana-eme ihe ndị a, unu agaghị ada mgbe ọ bụla.” (2 Pita 1:10) N’ihi ya, ọ bụ eziokwu na a họrọla Onye Kraịst e tere mmanụ ịga eluigwe, naanị ihe ga-eme ka o nweta ụgwọ ọrụ ya bụ ma o jiri obi ya niile na-efe Jehova.—Fil. 3:12-14; Hib. 3:1; Mkpu. 2:10.

7. Olee otú ndị e tere mmanụ si amata na Chineke ahọrọla ha ịga eluigwe?

⁷ Ma olee otú mmadụ si amata na a họrọla ya ịga eluigwe? Ihe Pọl degaara ndị Rom “a kpọrọ ịbụ ndị nsọ” ga-eme ka azịza ajụjụ a doo anya. Ọ sịrị ha: “Unu anataghị mmụọ nke ịnọ n’ohu, nke na-akpata egwu ọzọ, kama unu natara mmụọ nke ịbụ ndị e doro dị ka ụmụ, bụ́ mmụọ nke anyị sitere na ya na-eti mkpu, sị: ‘Aba, Nna!’ Mmụọ nsọ n’onwe ya so mmụọ anyị na-agba àmà na anyị bụ ụmụ Chineke.” (Rom 1:7; 8:15, 16) Ọ pụtara na Chineke na-eji mmụọ nsọ ya eme ka o doo ndị e tere mmanụ anya na ọ họrọla ha ịga eluigwe.—1 Tesa. 2:12.

8. Olee otú 1 Jọn 2:20, 27 si gosi na ọ bụghị onye ọzọ ga-eme ka obi sie onye e tere mmanụ ike na e teela ya mmanụ?

⁸ E nwee ndị Jehova kpọrọ ịga eluigwe, ọ na-eme ka o doo ha anya na ọ họrọla ha. (Gụọ 1 Jọn 2:20, 27.) N’eziokwu, Ndị Kraịst e tere mmanụ kwesịrị iso ná ndị Jehova si n’ọgbakọ ya na-akụziri ihe. Ma ọ bụghị onye ọzọ ga-eme ka obi sie ha ike na e teela ha mmanụ. Jehova ejirila mmụọ nsọ ya, bụ́ ike kacha ike niile, mee ka o doo ha anya nke ọma na ha bụ ndị e tere mmanụ.

9. E tee mmadụ mmanụ, olee ihe Ndị Efesọs 1:18 kwuru na-agbanwe n’onye ahụ?

⁹ O nwere ike isiri ọtụtụ ndị na-efe Chineke ike taa ịghọta ihe na-eme mmadụ ma Chineke tee ya mmanụ. O kwesịghị iju anyị anya, n’ihi na e teghị hanwa mmanụ. Chineke kere mmadụ ka ọ dịrị ndụ ebighị ebi n’ụwa, ọ bụghị n’eluigwe. (Jen. 1:28; Ọma 37:29) Ma, Jehova ahọrọla ụfọdụ ịga biri n’eluigwe. N’ihi ya, o tee ha mmanụ, ọ na-agbanwe olileanya ha na otú ha si eche echiche, ha atụwazie anya ibi n’eluigwe.—Gụọ Ndị Efesọs 1:18.

10. Olee otú e si ‘amụ mmadụ ọzọ’? (Kwuokwa ihe e dere n’ala ala peeji.)

¹⁰ Ọ bụrụ na e jiri mmụọ nsọ tee Onye Kraịst mmanụ, ‘a na-amụ ya ọzọ.’ * Ihe Jizọs kwuru gosikwara na, e tee mmadụ mmanụ, o nweghị otú ọ ga-esi akọwara ya onye a na-eteghị mmanụ ka ọ ghọta otú ọ na-adị ma ‘a mụọ mmadụ ọzọ,’ ma ọ bụ ma ‘a mụọ mmadụ site na mmụọ nsọ.’—Jọn 3:3-8.

11. Kọwaa otú echiche mmadụ si agbanwe ma e tee ya mmanụ.

 ¹¹ Olee otú echiche Ndị Kraịst si agbanwe ma e tee ha mmanụ? Tupu Jehova etee ha mmanụ, ha nwere olileanya ịdị ndụ ebighị ebi n’ụwa. Ha na-atụsibu anya ike ịhụ mgbe Jehova ga-ewepụ ihe ọjọọ niile ma mee ka ụwa bụrụ Paradaịs. O nwekwara ike ịbụ na ha nọkwa na-eche otú ọ ga-adị ha mgbe ha ga-ahụ onye ezinụlọ ha ma ọ bụ enyi ha nwụrụ anwụ a kpọlitere n’ọnwụ. Ma mgbe e tere ha mmanụ, ọ bụghịzi ihe ahụ ka ha na-eche. N’ihi gịnị? Ọ bụghị n’ihi na olileanya ịdị ndụ ebighị ebi n’ụwa agwụla ha ike. Ha agbanweghị obi ha maka na obi dara ha mbà ma ọ bụ na ha atagbuola onwe ha n’ahụhụ. Ha anọkataghị kpebie na ịdị ndụ ebighị ebi n’ụwa ga na-agwụ ike. Kama, ọ bụ Chineke ji mmụọ nsọ ya gbanwee otú ha si eche echiche na ụgwọ ọrụ ha na-atụ anya ya.

12. Dị ka e kwuru na 1 Pita 1:3, 4, olee otú obi na-adị Ndị Kraịst e tere mmanụ maka olileanya ha nwere?

¹² Onye e tere mmanụ nwere ike ịna-eche na ya erughị eru ịrụ ọrụ a pụrụ iche. Ma o nwetụdịghị mgbe ọ ga-eme ya obi abụọ ma Jehova ọ̀ họọrọ ya. Obi ga na-adị ya ezigbo ụtọ, ya ana-ekelekwa Chineke ma o cheta na o nwere olileanya ịga eluigwe.—Gụọ 1 Pita 1:3, 4.

13. Olee otú obi na-adị ndị e tere mmanụ gbasara ndụ ha dị n’ụwa a?

¹³ Ma ọ̀ pụtara na ndị e tere mmanụ chọrọ ịnwụ? Pọl onyeozi zara ajụjụ a. O ji ahụ́ ha tụnyere ụlọikwuu ma kwuo, sị: “N’eziokwu, anyị ndị nọ n’ụlọikwuu a na-asụ ude, ebe ọ na-anyịgbu anyị; n’ihi na anyị chọrọ, ọ bụghị iyipụ ya, kama iyiri nke ọzọ, ka ndụ wee loda ihe ahụ nke pụrụ ịnwụ anwụ.” (2 Kọr. 5:4) Ike ịdị ndụ n’ụwa a agwụbeghị ndị e tere mmanụ, ha achọghịkwanụ ịnwụ ozugbo. Ndụ na-atọ ha ụtọ. Ha chọkwara ka ha na ndị ezinụlọ ha na ndị enyi ha na-ejere Jehova ozi kwa ụbọchị. Ma, n’agbanyeghị ihe ha na-eme, ha na-echeta ihe magburu onwe ya Chineke kwere nkwa imere ha n’ọdịnihu.—1 Kọr. 15:53; 2 Pita 1:4; 1 Jọn 3:2, 3; Mkpu. 20:6.

14. Olee ihe ndị na-anaghị egosi na Chineke ejirila mmụọ nsọ tee mmadụ mmanụ?

¹⁴ I nwere ike ịna-eche ma Jehova ò jirila mmụọ nsọ ya tee gị mmanụ. Ọ bụrụ na ọ dị gị otú ahụ, chebara ajụjụ ndị a dị mkpa echiche: Ime ihe Jehova chọrọ ọ̀ na-enu gị enu n’obi? Obi gị ọ̀ na-agwa gị na ị na-anụ ọkụ n’obi n’ikwusa ozi ọma? Ịmụ Baịbụl na ịmụta “ihe ndị miri emi nke Chineke” ọ̀ na-atọ gị ezigbo ụtọ? (1 Kọr. 2:10) Ị̀ hụla ihe dị iche iche gosiri na Jehova na-agọzi ozi ọma ị na-ekwusa? Ị̀ na-ewere ya ka ọrụ dịịrị gị inyere ndị ọzọ aka ka ha mụta gbasara Jehova? Ị̀ hụla ihe gosiri na Jehova esila n’ụzọ dị iche iche nyere gị aka? Ọ bụrụ na ị zara ee n’ajụjụ a niile, ò gosiri na Chineke ahọrọla gị ka ị gaa eluigwe? Mba. Ọ bụghị ihe o gosiri. N’ihi gịnị? N’ihi na o nwere ike ịdị ndị niile na-efe Chineke otú ahụ, ma hà bụ ndị e tere mmanụ ma ọ bụ na ha abụghị. Jehova nwekwara ike iji mmụọ nsọ ya mee ka onye ọ bụla bụ́ ohu ya mee ihe ndị a n’agbanyeghị olileanya onye ahụ nwere. Nke bụ́ eziokwu bụ na ọ bụrụ na ọ na-eme gị obi abụọ ma Chineke ò ji mmụọ nsọ ya tee gị mmanụ, ọ pụtara na e teghị gị mmanụ. Ọ naghị  eme ndị ọ họọrọ obi abụọ. Ọ na-edo ha anya na ọ họrọla ha.

15. Olee otú anyị si mara na ọ bụghị ndị niile Chineke nyere mmụọ nsọ ka ọ họọrọ ka ha gaa eluigwe?

¹⁵ Na Baịbụl, e nwere ọtụtụ ndị kwesịrị ntụkwasị obi Jehova nyere mmụọ nsọ ya, ma ha enweghị olileanya ibi n’eluigwe. Mmụọ nsọ duziri Devid. (1 Sam. 16:13) Mmụọ nsọ nyeere ya aka ịghọta ihe ndị gbara ọkpụrụkpụ banyere Jehova nakwa iso dee Baịbụl. (Mak 12:36) N’agbanyeghị ihe ndị ahụ, Pita onyeozi kwuru na “Devid arịgoghị n’eluigwe.” (Ọrụ 2:34) Jọn Onye Na-eme Baptizim ‘jupụtara na mmụọ nsọ.’ (Luk 1:13-16) Jizọs kwuru na e nwebeghị onye ka Jọn ukwuu, ma o kwuru na Jọn esoghị ná ndị ga-achị n’Alaeze eluigwe. (Mat. 11:10, 11) Jehova nyere ndị a ike mmụọ nsọ ime ihe ndị dị ịtụnanya, ma o jighị ya họrọ ha ịga eluigwe. Ọ̀ pụtara na ha ekwesịghị ntụkwasị obi ka ndị ahụ ọ họọrọ ịga chịa n’eluigwe? Mba. Ọ pụtara na Jehova ga-akpọlite ha n’ọnwụ ka ha biri na Paradaịs ga-adị n’ụwa.—Jọn 5:28, 29; Ọrụ 24:15.

16. Olee olileanya ọtụtụ n’ime ndị ohu Chineke nwere taa?

¹⁶ Ọtụtụ ndị ohu Chineke taa enweghị olileanya ịga eluigwe. Ha nwere olileanya ahụ Ebreham, Sera, Devid, Jọn Onye Na-eme Baptizim, na ọtụtụ ndị ọzọ, ma ndị nwoke ma ndị nwaanyị, dịrị ndụ n’oge ochie nwere, ya bụ, ibi n’ụwa mgbe Alaeze Chineke ga na-achị ha.—Hib. 11:10.

17. Olee ajụjụ ndị a ga-aza n’isiokwu na-esonụ?

¹⁷ Ebe ọ bụ na a ka nwere ụfọdụ ndị Chineke taa e tere mmanụ, anyị nwere ike ịna-ajụ ajụjụ ụfọdụ. (Mkpu. 12:17) Dị ka ihe atụ, olee otú ndị e tere mmanụ kwesịrị isi na-ele onwe ha anya? Onye ọgbakọ unu malite ịta achịcha e ji eme Ncheta Ọnwụ Jizọs, olee otú i kwesịrị isi na-emeso ya? Ọ bụrụ na mmadụ ole sịrị na ha bụ ndị e tere mmanụ na-ebukwu ibu, ò kwesịrị ịna-echu gị ụra? A ga-aza ajụjụ ndị a n’isiokwu na-esonụ.