1. Gịnị ka anyị kwesịrị ịtụ anya ya? Gịnịkwa ka obi kwesịrị isi anyị ike na ya?

 ANYỊ kwesịrị ịtụ anya na a ga na-emegide anyị n’ozi ọma anyị na-ekwusa. Mmegide ahụ nwere ike ịka njọ n’ọdịnihu. (Dan. 11:44; 2 Tim. 3:12; Mkpu. 16:21) Ma, obi kwesịrị isi anyị ike na Jehova ga na-enyere anyị aka. Maka gịnị? Ọ bụ maka na Jehova na-enyere ndị ohu ya aka mgbe niile ịrụ ọrụ o nyere ha n’agbanyeghị otú ọrụ ahụ siruru n’ike. Dị ka ihe atụ, ka anyị kwuo banyere ụfọdụ ihe mere Ezikiel onye amụma mgbe ọ nọ na-ezi ndị Juu a dọọrọ n’agha laa Babịlọn ozi si n’aka Chineke.

2. Olee otú Jehova si kọwaa ndị Ezikiel kwusaara okwu ya? Gịnịkwa ka anyị ga-amụ n’isiokwu a? (Ezikiel 2:3-6)

² Olee ụdị ndị Ezikiel ziri ozi Chineke ziri ya? Jehova sịrị na ha bụ ndị “na-aka anya,” “ndị isi ike,” na “ndị nnupụisi.” Ha dị njọ ka ogwu na akpị. Ka a sịkwa ihe mere Jehova ji gwa Ezikiel ugboro ugboro, sị: “Atụkwala ụjọ.” (Gụọ Ezikiel 2:3-6.) Ezikiel jezuru ozi ya n’ihi na (1) ọ bụ Jehova ziri ya ozi ahụ, (2) mmụọ nsọ Chineke nyere ya ike, (3) okwu Chineke mekwara ka okwukwe ya sie ike. Olee otú ihe atọ ndị a si nyere Ezikiel aka? Oleekwa otú ha si enyere anyị aka taa?

3. Olee okwu o nwere ike ịbụ na ọ gbara Ezikiel ume? Oleekwa otú Jehova si mee ka obi sie Ezikiel ike na ya ga-akwado ya?

³ Jehova gwara Ezikiel, sị: “M na-ezi gị ka ị gakwuru ndị Izrel.” (Ezik. 2:3, 4) Ọ ga-abụrịrị na ihe a mere ka obi sie Ezikiel ike. N’ihi gịnị? O nwere ike ịbụ n’ihi na o chetara  na Jehova kwuru ụdị ihe ahụ mgbe o mere ka Mosis na Aịzaya bụrụ ndị amụma ya. (Ọpụ. 3:10; Aịza. 6:8) Ezikiel makwa otú Jehova si nyere ndị amụma abụọ ahụ aka ịrụ ọrụ ahụ siri ike. N’ihi ya, mgbe Jehova gwara Ezikiel ugboro abụọ na ọ bụ ya na-eziga ya, o kwesịrị ịtụkwasị Jehova obi na ọ ga-enyere ya aka. Ezikiel onye amụma dekwara ugboro ugboro, sị: “Jehova gwara m, sị.” (Ezik. 3:16) Ọtụtụ ugboro, o dekwara, sị: “Jehova gwara m okwu ọzọ, sị.” (Ezik. 6:1) A naghị ajụ ajụ na obi siri Ezikiel ike na ọ bụ Jehova dunyere ya ozi ahụ. Ihe ọzọ bụ na, ebe Ezikiel bụ nwa onye nchụàjà, ọ ga-abụ na nna ya kụziiri ya otú Jehova sirila na-emesi ndị amụma ya obi ike kemgbe ụwa na ọ nọnyeere ha. Jehova gwara Aịzik, Jekọb, na Jeremaya, sị: “M nọnyeere gị.”​—Jen. 26:24; 28:15; Jere. 1:8.

4. Olee okwu na-akasi obi o nwere ike ịbụ na o mere ka obi sie Ezikiel ike?

⁴ Gịnị ka ọtụtụ ndị Izrel ga-eme ma ha nụ ozi Ezikiel? Jehova gwara ya, sị: “Ndị Izrel agaghị ege gị ntị, ebe ọ bụ na ha achọghị ige m ntị.” (Ezik. 3:7) Ịjụ ozi Ezikiel pụtara na ha jụrụ Jehova. Ihe ahụ Jehova kwuru mere ka obi sie Ezikiel ike na ọjụjụ ndị Izrel jụrụ ya apụtaghị na ọ rụtaghị ọrụ ibu amụma Chineke nyere ya. Jehova mesikwara Ezikiel obi ike na mgbe ikpe ahụ ọ na-ekwusa ga-emezu, ndị Izrel “ga-amara na e nwere mgbe ha na onye amụma nọ.” (Ezik. 2:5; 33:33) O doro anya na okwu ahụ na-akasi obi mere ka Ezikiel nwee ike ijezu ozi ya.

5. Gịnị ka Aịzaya 44:8 kwuru ga-eme ka obi sie anyị ike?

⁵ Obi na-esikwa anyịnwa ike maka na  anyị ma na ọ bụ Jehova gwara anyị gaa kwusaa ozi ọma. O meere anyị ihe ọma kwe ka anyị bụrụ “ndị àmà” ya. (Aịza. 43:10) Ọ bụ ezigbo ùgwù ka ọ kwanyeere anyị. Otú ahụ Jehova sịrị Ezikiel: ‘Atụla egwu,’ ka ọ na-asịkwa anyị: “Unu atụla ụjọ.” Gịnị mere na anyị ekwesịghị ịtụ ndị na-emegide anyị ụjọ? Ọ bụ maka na, dị ka Ezikiel, ọ bụ Jehova dunyere anyị ozi, na-akwadokwa anyị.​—Gụọ Aịzaya 44:8.

6. (a) Olee otú Jehova si eme ka obi sie anyị ike na ya na-akwado anyị? (b) Olee ihe na-eme ka obi sie anyị ezigbo ike?

⁶ Jehova kwere anyị nkwa na ọ ga na-enyere anyị aka. Dị ka ihe atụ, tupu Jehova asị: “Unu bụ ndị àmà m,” ọ sịrị: “Ọ bụrụ na unu agafewe mmiri, m ga-anọnyere unu. Ọ bụrụkwa na unu agafewe osimiri, ọ gaghị eri unu. Ọ bụrụ na unu agafewe ebe ọkụ dị, ọ gaghị ere unu, ire ọkụ agaghịkwa ere unu.” (Aịza. 43:2) N’ozi ọma anyị na-ekwusa, nsogbu ndị na-abịara anyị mgbe ụfọdụ na-adị ka idei mmiri, ọnwụnwa ndị na-abịara anyị na-adịkwa ka ọkụ. Ma, Jehova ga-enyere anyị aka ka anyị ghara ịkwụsị ikwusa ozi ọma. (Aịza. 41:13) Otú ahụ ọtụtụ ndị jụrụ ozi Ezikiel ziri ha ka ọtụtụ ndị taa na-ajụkwa ozi ọma anyị. Mana, ọ pụtaghị na anyị anaghị ekwusa ozi ọma nke ọma. Obi na-esi anyị ezigbo ike maka na obi na-adị Jehova ụtọ ma ọ bụrụ na anyị anọsie ike n’ozi a ọ sịrị anyị kwusaa. Pọl onyeozi kwuru, sị: “A ga-akwụ onye ọ bụla . . . ụgwọ ihe ọ rụrụ.” (1 Kọr. 3:8; 4:1, 2) Otu nwanna nwaanyị bụ́ ọsụ ụzọ kemgbe ọtụtụ afọ sịrị: “Obi na-atọgbu m atọgbu ma m cheta na Jehova ga-akwụ anyị ụgwọ maka mbọ anyị na-agba.”

7. Mgbe ọ bụla Ezikiel chere banyere ọhụụ ahụ ọ hụrụ, olee otú ọ ga-abụrịrị na o mere ka obi dị ya? (Kọwaa ihe e sere n’ihu Ụlọ Nche a.)

⁷ Ezikiel hụrụ otú mmụọ Chineke si akpa ike. Ihe Ezikiel hụrụ n’ọhụụ mere ka ọ mata na ọ bụ mmụọ nsọ na-enyere ndị mmụọ ozi dị ike aka, na-eduzikwa nnukwu wiil ndị dị n’otu ụgbọ ịnyịnya eluigwe. (Ezik. 1:20, 21) Gịnịzi ka Ezikiel mere? O dere ihe o mere. Ọ sịrị: “Mgbe m hụrụ ya, m gburu ikpere n’ala, kpudo ihu n’ala.” Ụjọ na-atụ ya mere ka ọ daa n’ala. (Ezik. 1:28) Mgbe ọ bụla Ezikiel chebaara ọhụụ ahụ dị ebube echiche, ọ ga-abụrịrị na o mere ka obi sikwuo ya ike na mmụọ nsọ Chineke ga-enyere ya aka ijezu ozi ya.

8-9. (a) Gịnị ka Jehova nyere Ezikiel iwu ka o mee? (b) Olee otú Jehova si mee ka obi sikwuo Ezikiel ike ịga zie ndị isi ike ozi?

⁸ Jehova nyere Ezikiel iwu, sị: “Nwa nke mmadụ, bilie ọtọ ka m gwa gị okwu.” Mmụọ nsọ na iwu ahụ Jehova nyere ya mere ka o nwee ike isi n’ala bilie ọtọ. Ezikiel dere, sị: “Mmụọ nsọ dakwasịrị m ma mee ka m guzoro ọtọ.” (Ezik. 2:1, 2) N’oge niile Ezikiel nọ na-eje ozi ya, aka Chineke, ya bụ, mmụọ nsọ Chineke, nọ na-eduzi ya. (Ezik. 3:22; 8:1; 33:22; 37:1; 40:1) Mmụọ Chineke nyeere Ezikiel aka ịrụ ọrụ Chineke nyere ya, nke bụ́ izi ‘ndị isi ike na ndị obi ha kpọchiri akpọchi’ ozi Chineke. (Ezik. 3:7) Jehova sịrị Ezikiel: “Emeela m ka ihu gị sie ike ka ihu ha, meekwa ka egedege ihu gị sie ike ka egedege ihu ha. Emeela m ka egedege ihu gị dịrị ka dayamọnd, siekwa ike karịa nkume. . . . Atụla ha egwu. Ụjọ atụkwala gị ma ị hụ ihu ha.” (Ezik. 3:8, 9) Ihe Jehova na-agwa Ezikiel bụ: ‘Ekwela ka isi ike  ndị Izrel mee ka ike gwụ gị. M ga-eme ka obi sie gị ike.’

⁹ Mmụọ Chineke mechara buga Ezikiel n’ebe ọ ga-ezi ozi Chineke ziri ya. O dere, sị: “Mmụọ Jehova nọkwa na-akpa ike dị egwu n’ahụ́ m.” Onye amụma ahụ ji otu izu mụtachaa banyere ozi ahụ ma ghọta ya nke ọma ka o nwee ike izi ya ka onye ihe ọ na-ekwu doro anya. (Ezik. 3:14, 15) Jehova gwara ya ka ọ gaa n’otu ndagwurugwu, ‘mmụọ nsọ adakwasị ya’ n’ebe ahụ. (Ezik. 3:23, 24) Ezikiel ejikerela ịmalite ozi ya.

10. Olee ihe ga-enyere anyị aka ịna-ekwusa ozi ọma? N’ihi gịnịkwa?

¹⁰ Olee ihe ga-enyere anyị aka ịna-ekwusa ozi ọma? Iji zaa ajụjụ a, cheta ihe mere Ezikiel. Tupu ya ebido izi ozi Chineke ziri ya, mmụọ Chineke mere ka ọ dị ike. Otú ahụ ọ dị Ezikiel ka ọ dịkwa anyị. Anyị ga-ekwusali ozi ọma naanị ma mmụọ nsọ Chineke nyere anyị aka. N’ihi gịnị? Ọ bụ n’ihi na Setan na-alụso anyị ọgụ ka anyị kwụsị ikwusa ozi ọma. (Mkpu. 12:17) E jiri anya mmadụ lewe ya, o nwetụdịghị ebe ike anyị ruru nke Setan. Ma, anyị ji ozi ọma anyị na-ekwusa na-emeri ya. (Mkpu. 12:9-11) Olee otú anyị si na-emeri ya? Mgbe anyị na-ekwusa ozi ọma, anyị na-egosi na anyị anaghị atụ ụjọ mba Setan na-aba. Mgbe ọ bụla anyị ziri ozi ọma, ọ bụ mmeri ka anyị meriri Ekwensu. N’ihi ya, gịnị ka anyị nwere ike ikwu maka ozi ọma a anyị na-ezi n’agbanyeghị na a na-emegide anyị? Anyị nwere ike ikwu na ọ bụ mmụọ nsọ na-enye anyị ike nakwa na ozi anyị na-eje dị Jehova mma.​—Mat. 5:10-12; 1 Pita 4:14.

11. Gịnị ka mmụọ nsọ Chineke na-emere anyị? Oleekwa otú anyị ga-esi na-enweta ya?

¹¹ Olee ihe ọzọ anyị na-aghọta ma anyị cheta otú Jehova si mee ka ihu Ezikiel na egedege ihu ya sie ezigbo ike? Anyị na-aghọta na mmụọ nsọ Chineke ga-emeli ka anyị nwee ike imeri nsogbu ọ bụla bịaara anyị n’ozi anyị. (2 Kọr. 4:7-9) Ma,  gịnịkwanụ ka anyị ga-eme ka anyị nwee ike ịna-enweta mmụọ nsọ? Anyị kwesịrị ịna-ekpe ekpere mgbe niile maka ya, obi esiekwa anyị ike na Jehova ga-anụ ekpere anyị. Jizọs kụziiri ndị na-eso ụzọ ya, sị: “Na-arịọnụ, . . . na-achọnụ, . .v. na-akụnụ aka.” Anyị mee otú ahụ, Jehova ‘ga-enye anyị mmụọ nsọ anyị na-arịọ ya.’​—Luk 11:9, 13; Ọrụ 1:14; 2:4.

12. N’ihi ihe e kwuru n’Ezikiel 2:9–3:3, olee ebe akwụkwọ mpịakọta ahụ si? Gịnịkwa ka e dere na ya?

¹² Ọ bụghị naanị na mmụọ Chineke mere ka Ezikiel kata obi na-ezi ozi Chineke, kamakwa okwu Chineke mere ka okwukwe ya na-esikwu ike. N’ọhụụ e gosiri Ezikiel, ọ hụrụ aka ji otu akwụkwọ mpịakọta. (Gụọ Ezikiel 2:9–3:3.) Olee ebe akwụkwọ mpịakọta ahụ si? Gịnị ka e dere na ya? Olee otú o si mee ka okwukwe Ezikiel sikwuo ike? Ka anyị chọpụta. Akwụkwọ mpịakọta ahụ si n’ocheeze Chineke. Ọ ga-abụ na Jehova si n’aka otu n’ime ndị mmụọ ozi anọ ahụ Ezikiel hụburu nye ya akwụkwọ mpịakọta ahụ. (Ezik. 1:8; 10:7, 20) Ihe e dere na ya bụ okwu Chineke, ya bụ, ozi amamikpe toro ogologo Ezikiel ga-ezi ndị nnupụisi ahụ a dọọrọ n’agha. (Ezik. 2:7) E dere ozi ahụ ma n’ihu akwụkwọ mpịakọta ahụ ma n’azụ ya.

13. Gịnị ka Jehova gwara Ezikiel ka o mee akwụkwọ mpịakọta ahụ? Gịnịkwa mere o ji tọọ ya ụtọ n’ọnụ?

¹³ Jehova gwara Ezikiel ka ọ taa akwụkwọ mpịakọta ahụ, “tajuo afọ.” Ezikiel rubere isi, tachaa akwụkwọ mpịakọta ahụ. Gịnị ka ihe a Ezikiel hụrụ n’ọhụụ pụtara? Ezikiel kwesịrị ịghọta ozi ahụ ọ na-aga izi nke ọma. O kwesịrị ikweta ihe e kwuru na ya ka o nwee ike ịna-enu ya enu ịga zie ya ndị ọzọ. Ihe na-eju anya meziri. Ezikiel chọpụtara na akwụkwọ mpịakọta ahụ ‘tọrọ ya ụtọ ka mmanụ aṅụ.’ (Ezik. 3:3) N’ihi gịnị? Ezikiel ghọtara na ùgwù Jehova kwanyeere ya kwe ka ọ gaa nọchite anya ya na-atọ ka mmanụ aṅụ. (Ọma 19:8-11) Obi dị ya ezigbo ụtọ na Jehova họpụtara ya ka ọ bụrụ onye amụma ya.

14. Olee ihe nyeere Ezikiel aka ịdị njikere ịrụ ọrụ Chineke nyere ya?

¹⁴ Jehova mechara sị Ezikiel: “Nụrụ okwu niile m na-agwa gị, burukwa ha n’obi.” (Ezik. 3:10) Jehova ji ihe a o kwuru na-agwa Ezikiel ka ọ gbalịa na-echeta ihe ndị e dere n’akwụkwọ mpịakọta ahụ ma na-atụgharị uche na ha. Ezikiel si otú ahụ mee ka okwukwe ya na-esikwu ike. O mekwara ka o nweta ozi na-akpa ike ọ ga-ezi ndị Izrel. (Ezik. 3:11) Ebe ozi Chineke dị Ezikiel n’obi nakwa n’egbugbere ọnụ, ọ dịla njikere ịga ziwe ozi Chineke ziri ya ruo mgbe ọ ga-ezicha ya.​—I nwere ike ịtụle Abụ Ọma 19:14.

15. Anyị chọọ ịnọsi ike n’ozi anyị, gịnị ka anyị kwesịrị ‘iburu n’obi’?

¹⁵ Anyị chọọ ịnọsi ike n’ozi anyị, anyị kwesịkwara ikwe ka okwu Chineke mee ka okwukwe anyị na-esikwu ike. Anyị kwesịrị ‘iburu n’obi’ ihe niile Jehova na-agwa anyị. Jehova si n’Okwu ya bụ́ Baịbụl na-agwa anyị okwu taa. Olee otú anyị ga-esi mee ka Okwu Chineke na-eduzi ihe anyị na-eche, otú obi dị anyị, na ihe mere anyị ji eme ihe ndị anyị na-eme?

16. Gịnị ka anyị kwesịrị iji Okwu Chineke na-eme? Oleekwa otú anyị ga-esi mee ka ọ baa anyị n’obi?

¹⁶ Ọ na-abụ, anyị rie nri, ya agbarie,  nye anyị ihe n’ahụ́. Ọ bụ otú ahụ ka ịmụ Okwu Chineke ma tụgharịa uche na ya na-eme ka okwukwe anyị na-esikwu ike. Anyị kwesịrị ịna-echeta ihe Jehova ji akwụkwọ mpịakọta ahụ na-akụziri anyị. Jehova chọrọ ka anyị na-eri Okwu ya ka nri, na-eriju ya afọ, ya bụ, ka ọ baa anyị n’ụmị. Otú anyị ga-esi eme ya bụ ịna-ekpe ekpere, na-agụ Okwu ya, na-atụgharịkwa uche na ya. Ihe mbụ anyị ga-eme bụ ịkwadebe obi anyị ka o nwee ike ịnabata echiche Chineke. Ihe ọzọ bụ ịgụ ebe anyị chọrọ ịgụ na Baịbụl. Anyị gụchaa, anyị akwụsịtụ chebara ihe anyị gụrụ echiche. Olee uru ọ ga-abara anyị? Ọ bụrụ na anyị ana-atụgharị uche na ya, anyị ga na-aghọtakwu Okwu Chineke, ya emee ka okwukwe anyị na-esikwu ike.

17. Gịnị mere o ji dị ezigbo mkpa ka anyị na-atụgharị uche n’ihe anyị gụrụ na Baịbụl?

¹⁷ Gịnị mere ịgụ Baịbụl na ịtụgharị uche na ya ji dị ezigbo mkpa? Ọ bụ maka na ọ na-eme ka anyị kata obi na-ezi ozi ọma anyị na-ezi ugbu a, dịkwa njikere izi ozi amamikpe anyị nwere ike izi n’oge na-adịghị anya. Ọ bụrụ na anyị ana-atụgharịkwa uche n’ọmarịcha àgwà Jehova nwere, anyị na ya ga na-adịkwu ná mma. Ọ ga-eme ka obi na-eru anyị ala, obi ana-adịkwa anyị ezigbo ụtọ. Ọ bụ ihe magburu onwe ya nke na-atọkarị mmanụ aṅụ.​—Ọma 119:103.

18. Gịnị ka ndị anyị na-ezi ozi ọma ga-emecha ghọta? N’ihi gịnịkwa?

¹⁸ Chineke enyeghị anyị ọrụ ibu amụma otú ahụ o nyere Ezikiel. Ma, anyị kpebisiri ike ịna-ekwusa ozi Jehova mere ka e dee na Baịbụl ruo mgbe e kwusachara ya otú ọ chọrọ. Oge ikpe ruo, ndị anyị na-ezi ozi ọma agaghị ahụ ihe ha ga-akụdo aka sị na a dọghị ha aka ná ntị ma ọ bụ na Chineke leghaara ha anya. (Ezik. 3:19; 18:23) Kama, ha ga-emecha ghọta na ozi anyị ziri ha si n’aka Chineke.

19. Olee ihe ga-eme ka obi sie anyị ike ijezu ozi anyị?

¹⁹ Olee ihe ga-eme ka obi sie anyị ike ijezu ozi anyị? Ọ bụ ụzọ ihe atọ ahụ mere ka obi sie Ezikiel ike. Anyị anaghị akwụsị ikwusa ozi ọma n’ihi na anyị ma na ọ bụ Jehova ziri anyị ozi a, na mmụọ nsọ Chineke na-enye anyị ike, nakwa na Okwu Chineke na-eme ka okwukwe anyị na-esikwu ike. Jehova ga-enyere anyị aka ikpebisikwu ike ijezu ozi anyị ma na-atachi obi “ruo ọgwụgwụ.”​—Mat. 24:13.