Olee otú i chere ndụ ga-adị n’ụwa a ma á sị na e nweghị anyanwụ? Anyanwụ na-eme ka osisi na-eru akwụkwọ, amị okooko na mkpụrụ. Anyanwụ na-emekwa ka osisi si ná mgbọrọgwụ ya na-amịrị mmiri n’ala gaa n’akwụkwọ ya, mechaa anwụ amịkọrọ ya gaa n’ikuku.

Mmiri bụ ezigbo onyinye Chineke nyere anyị. Ọ na-eme ka ụwa na-emepụta nri anyị na-eri. Chineke na-enye anyị mmiri ozuzo site n’eluigwe. Ọ na-enyekwa anyị mkpụrụ n’oge mkpụrụ ji amị, na-enye anyị nri, na-eme ka anyị na-enwe obi ụtọ.

Ọtụtụ ndị bụ́ nna na-echegbu onwe ha gbasara nri ndị ezinụlọ ha ga-eri na uwe ha ga-eyi. Ma, Baịbụl gwara anyị sị: “Leruonụ anụ ufe nke eluigwe anya, n’ihi na ha adịghị akụ mkpụrụ, ha adịghị aghọrọ mkpụrụ, ha adịghịkwa ekpokọta mkpụrụ n’ụlọ nkwakọba ihe; ma Nna unu nke eluigwe na-enye ha nri. Ọ̀ bụ na unu adịghị oké ọnụ ahịa karịa ha?”​—Matiu 6:​25, 26.

“Mụtanụ ihe site n’okooko lili dị n’ọhịa, otú ha si eto . . . ; ma ana m asị unu na ọbụna [Eze] Sọlọmọn, n’ebube ya niile, eyighị uwe mara mma dị ka otu n’ime ha. Ma ọ bụrụ na Chineke na-eyiwe ahịhịa ndụ dị n’ubi uwe . . . , ọ̀ bụ na ọ gaghị eyiwe unu uwe karị?”​—Matiu 6:​28-30.

Ebe ọ bụ na Chineke na-enye anyị nri na uwe, o doro anya na ọ ga-enyekwara anyị aka inweta ihe ndị ọzọ e ji enyere ndụ aka. Ọ bụrụ na anyị ana-eme uche Chineke, ọ ga-agọzi mbọ anyị na-agba ịkọ nri. O nwekwara ike inyere anyị aka ịchọta ọrụ ka anyị nwee ike ịna-azụta ihe ndị dị anyị mkpa.​—Matiu 6:​32, 33.

N’eziokwu, anyị nwere ezigbo ihe mere anyị ji kwesị ịhụ Chineke n’anya ma anyị tụlee ihe gbasara anyanwụ, mmiri ozuzo, ụmụ nnụnụ, na okooko osisi. Isiokwu na-esonụ ga-atụle otú Onye kere anyị si na-agwa anyị okwu.