Ị̀ Pụrụ Ịchọta Udo nke Obi?

Laa azụ na 1854, onye America na-ede akwụkwọ bụ́ Henry Thoreau dere, sị: “Ọnụ ọgụgụ dị ukwuu nke ụmụ mmadụ na-ebi ndụ nke enweghị olileanya n’ekwupụtaghị ya n’ọnụ.”

Ihe àmà na-egosi na n’oge ya, ihe ka ọtụtụ n’ụmụ mmadụ enweghị udo nke obi. Otú ọ dị, nke ahụ bụ ihe fọrọ nke nta ka ọ bụrụ afọ 150 gara aga. Ihe ọ̀ gbanwewo n’oge a? Ka okwu Thoreau ọ̀ ka metụtara oge a? Gịnị banyere gị onwe gị? Ì nwere afọ ojuju, nwee udo nke obi? Ka ị̀ bụ onye obi na-erughị ala, na-amaghị ihe ọdịnihu ga-abụ, ‘na-enweghị olileanya ma ghara ikwupụta ya n’ọnụ,’ n’ikwu okwu Thoreau n’ụzọ ọzọ?

N’ỤZỌ dị mwute, e nwere ọtụtụ ihe dị n’ụwa na-anapụ ụmụ mmadụ udo nke obi. Ka anyị kpọtụ nanị ole na ole aha. N’ọtụtụ mba, enweghị ọrụ na ịkpata ego dị nta na-akpata ịda ogbenye nakwa oké nchegbu n’ihi akụ̀ na ụba. N’ala ndị ọzọ, ọtụtụ ndị na-etinye ihe ka ukwuu n’ume ọrụ ha n’ịchụso akụ̀ na ụba na ihe onwunwe. Otú ọ dị, mgbe mgbe, ụzọ ndụ asọmpi nke na-eso ya na-eweta nchegbu, ọ bụghị udo nke obi. Nrịanrịa, agha, mpụ, ikpe na-ezighị ezi, na mmegbu na-anapụkwa ụmụ mmadụ udo nke obi.

Ha Chọrọ Udo nke Obi

Ọtụtụ ndị adịghị njikere ịnagide ụwa a otú a ọ dị. Antônio * bụbu onye ndú nke ndị ọrụ n’otu nnukwu ụlọ mmepụta ihe dị na São Paulo, Brazil. N’ịbụ onye nwere olileanya ime ka ọnọdụ ya ná ndụ ka mma, o keere òkè ná mkpesa na njegharị iwe dị iche iche, ma nke a ewetaghịrị ya udo nke obi.

Ụfọdụ na-eche na alụmdi na nwunye ga-eme ka ha nwee udo nke obi ruo ọ̀tụ̀tụ̀ ụfọdụ ná ndụ ha, ma ha pụrụ inwe ndakpọ olileanya. Marcos bụbu onye ọchụ ntá ego ihe na-agara nke ọma. O tinyere isi na ndọrọ ndọrọ ọchịchị ma ghọọ onyeisi nke otu obodo ukwu a na-emepụta ihe na ya. Otú ọ dị, ndụ ọ na-ebi n’ụlọ dakpọrọ nnọọ adakpọ. Mgbe ụmụ ya hapụrụ ụlọ, ya na nwunye ya kewara n’ihi esemokwu ndị ha na-apụghị idozi.

Gerson, bụ́ nwata tolitere n’okporo ámá dị na Salvador, Brazil, chọrọ inwe ahụmahụ na-akpali akpali. Ọ kpagharịrị site n’otu obodo gaa n’ọzọ, na-eso ndị  na-anya gwongworo eme njem. N’oge na-adịghị anya ọ ghọrọ onye ọgwụ ọjọọ riri ahụ, na-apụnara ndị mmadụ ihe iji na-akwado àgwà ọjọọ ya. Ndị uwe ojii jidere ya ọtụtụ ugboro. Otú ọ dị, n’agbanyeghị ịbụ onye na-achọ okwu, nke na-eme ihe ike, Gerson chọsiri ike inwe udo nke obi. Ọ̀ dị mgbe ọ bụla ọ pụrụ ịchọta ya?

Mgbe Vania ka bụ nwata, nne ya nwụrụ, Vania wee buru ibu ọrụ nke ilekọta ụlọ, gụnyere ilekọta nwanne ya nwanyị na-arịa ọrịa. Vania gara chọọchị ma nwee mmetụta na Chineke agbahapụla ya. N’ezie o nweghị udo nke obi.

E nwekwara Marcelo. Nanị ihe Marcelo chọrọ bụ ikpori ndụ. Ọ na-amasị ya isoro ndị na-eto eto ndị ọzọ na-enwe nnọkọ oriri—na-agba egwú, na-aṅụ ihe ọṅụṅụ, na-aṅụkwa ọgwụ ọjọọ. N’otu oge, ọ lụrụ ọgụ ma merụọ onye ntorobịa ọzọ ahụ. Mgbe nke ahụ gasịrị, ọ kwara ụta nke ukwuu maka ihe o meworo ma kpekuo Chineke ekpere maka enyemaka. Ya onwe ya kwa chọrọ udo nke obi.

Ahụmahụ ndị a na-egosi ọnọdụ ụfọdụ pụrụ ime ka mmadụ ghara inwe udo nke obi . Ọ̀ dị ụzọ ọ bụla onye ndú ndị ọrụ ahụ, onye ndọrọ ndọrọ ọchịchị ahụ, nwata ahụ toro n’okporo ámá, nwata nwanyị ahụ na-arụgbu onwe ya n’ọrụ, na onye ahụ na-aga nnọkọ oriri pụrụ isi nweta udo nke obi ha chọrọ inwe? Ihe mere ha ọ̀ na-akụziri anyị ihe ọ bụla? Azịza nye ajụjụ abụọ ahụ bụ ee, dị ka anyị ga-ahụ n’isiokwu na-esonụ.

[Ihe ndị e dere n’ala ala peeji]

[Foto dị na peeji nke 3]

Ị̀ na-achọsi udo nke obi ike?