“Ogbugbu Mma nke Enyi”

PỌL onyeozi hụrụ mkpa ọ dị ịgwa ndị Kraịst nke narị afọ mbụ nọ na Galetia okwu mgbazi ụfọdụ. Ikekwe iji zere ịkpasu onye ọ bụla iwe, ọ jụrụ, sị: “Ya mere, àghọwo m onye iro unu, n’ihi na ana m agwa unu eziokwu?”—Ndị Galetia 4:16.

Pọl aghọbeghị onye iro ha n’ihi ‘ikwu eziokwu.’ N’ezie, ọ na-eme ihe kwekọrọ n’ụkpụrụ Bible bụ́: “Ihe kwesịrị ntụkwasị obi ka ogbugbu mma nke enyi bụ.” (Ilu 27:6, King James Version) Ọ maara na ọ ga-emetụta ùgwù onwe onye nke onye ahụ hiere ụzọ. Ma, ọ maara na ịghara inye onye mmehie mgbazi dị ya mkpa pụrụ ime ka Jehova Chineke ghara igosipụta ịhụnanya ya n’ebe onye ahụ nọ. (Ndị Hibru 12:5-7) N’ihi ya, dị ka enyi kwesịrị ntụkwasị obi nke bu ọdịmma na-adịte aka nke ọgbakọ ahụ n’obi, Pọl alaghị azụ n’inye ndụmọdụ na-agbazi agbazi.

Taa, Ndịàmà Jehova na-arụzu ọrụ e nyere ha ‘ịga mee mba nile ka ha bụrụ ndị na-eso ụzọ, na-ezi ha ka ha debe ihe nile Jisọs Kraịst nyere n’iwu.’ N’ime otú ahụ, ndị Kraịst a nwere obi eziokwu adịghị ezochi eziokwu Bible bụ́ ndị na-ekpughe ma na-akatọ nkwenkwe na-ezighị ezi na àgwà na-ekwesịrịghị ndị Kraịst. (Matiu 15:9; 23:9; 28:19, 20; 1 Ndị Kọrint 6:9, 10) Kama ịghọ ndị iro a ga-ajụ ajụ, ha na-egosipụta ụdị mmasị e ji amata ndị bụ́ ezi ndị enyi.

Ọbụ abụ ahụ ji nghọta Chineke ji ike mmụọ nsọ nye ya dee, sị: “Ka onye ezi omume tigbuo m, ọ ga-abụ ebere; ya baakwara m mba, ọ ga-abụ mmanụ isi; ekwela ka isi m sị, Ee e.”—Abụ Ọma 141:5.