“Ndị Amamihe Atọ Ahụ”—Hà Bụ Ole Ndị?

N’ihe ngosi nke Ọmụmụ Jizọs, a na-egosikarị ndị ikom atọ yi uwe mwụda na kamel ha ka ha nọ na-erute n’otu ụlọ anụ ụlọ bụ́ ebe nwa ọhụrụ bụ́ Jizọs dina n’ihe e ji etinyere anụ ụlọ nri. A na-akpọkarị ndị nleta ahụ jiri ejiji ndị oké ozu ndị amamihe atọ. Gịnị ka Bible nwere ikwu banyere ha?

Dị ka Bible si kwuo, ndị ahụ a sị na ha bụ ndị amamihe “sitere n’akụkụ ebe ọwụwa anyanwụ,” ọ bụkwa ebe ahụ ka ha nọ mara banyere ọmụmụ Jizọs. (Matiu 2:1, 2, 9) Ọ ghaghị iwewo ndị ikom a ogologo oge iji rute Judia. Mgbe ha mesịrị chọta Jizọs, ọ bụghịzi nwa ọhụrụ nke nọ n’ụlọ anụ ụlọ. Kama nke ahụ, ndị ikom ahụ hụrụ Meri na “nwatakịrị ahụ” ka ha bi n’ụlọ.—Matiu 2:11.

Bible na-akpọ ndị ikom a “ndị na-agụ kpakpando,” o kwughịkwa ole ha dị. Akwụkwọ bụ́ The Oxford Companion to the Bible na-akọwa, sị: “A na-ahụ njikọ dị n’etiti majik na ịgụ kpakpando n’oké mmasị ndị nleta ahụ nwere n’ebe kpakpando nke dutere ha Betlehem dị.” Bible na-akatọ ụdị majik nile na omume ndị Babilọn nke ịnwa isi na kpakpando nweta ihe ọmụma.—Deuterọnọmi 18:10-12; Aịsaịa 47:13.

Ihe ọmụma ndị ikom a nwetara arụpụtaghị ezi ihe ọ bụla. Ọ kpaliri iwe ekworo nke ajọ Eze Herọd. N’aka nke ya, nke a mere ka Josef, Meri, na Jizọs gbaga Ijipt, meekwa ka e gbuo ụmụntakịrị nwoke nile nọ na Betlehem “malite ná ndị dị afọ abụọ gbadaa.” Herọd ji nlezianya chọpụta oge a mụrụ Jizọs site n’ihe ọ nụrụ n’ọnụ ndị ahụ na-agụ kpakpando. (Matiu 2:16) N’iburu n’uche nsogbu nleta ha kpatara, ọ bụ ihe ezi uche dị na ya ikwubi na kpakpando ahụ ha hụrụ na ozi banyere “onye ahụ a mụrụ ịbụ eze ndị Juu,” si n’aka onye iro Chineke, bụ́ Setan Ekwensu, onye chọrọ igbu Jizọs.—Matiu 2:1, 2.