Ajụjụ Ndị Na-agụ Akwụkwọ Anyị Na-ajụ

Setan bụ́ Ekwensu ò nwere ikike ịma ihe mmadụ bu n’uche?

Ọ bụ ezie na anyị ejichaghị nke a n’aka, o yiri ka ma Setan ma ndị mmụọ ọjọọ ya adịghị nke nwere ikike ịma ihe anyị na-eche.

Tụlee aha ndị a na-eji akọwa Setan. A na-akpọ ya Setan (Onye Nguzogide), Ekwensu (Onye Nkwutọ), Agwọ (nke ya na Onye Nduhie pụtara otu ihe), Onye Ọnwụnwa, na Onye Ụgha. (Job 1:6; Matiu 4:3; Jọn 8:44; 2 Ndị Kọrint 11:3; Mkpughe 12:9) Ọ dịghị nke ọ bụla n’ime aha nkọwa a na-egosi na Setan nwere ikike ịma ihe mmadụ bu n’uche.

Otú ọ dị, n’ụzọ dị iche, a na-akọwa Jehova Chineke dị ka “onye na-enyocha obi.” (Ilu 17:3, NW; 1 Samuel 16:7; 1 Ihe E Mere 29:17) “Ọ dịghịkwa ihe e kere eke nke na-apụtaghị ìhè n’anya ya [Jehova],” ka Ndị Hibru 4:13 na-ekwu, “ma ihe nile gba ọtọ ma bụrụ ndị e kpughepụrụ ekpughepụ n’anya onye ahụ anyị ga-aza ajụjụ.” Ọ bụghị ihe ijuanya na Jehova enyewo Ọkpara ya, bụ́ Jizọs, ikike inyocha obi. Jizọs ahụ e si n’ọnwụ kpọlite kwupụtara, sị: “Abụ m onye ahụ na-enyocha akụrụ na obi, m ga-enyekwa unu n’otu n’otu dị ka ihe ndị unu na-eme si dị.”—Mkpughe 2:23.

Bible adịghị ekwu na Setan nwere ikike inyocha obi na uche ụmụ mmadụ. Nke a dị ịrịba ama, ebe ọ bụ na Pọl onyeozi emesiwo anyị obi ike na Ndị Kraịst “abụghị ndị na-amaghị atụmatụ [Setan].” (2 Ndị Kọrint 2:11) Ya mere, ọ dịghị anyị mkpa ịtụwa ụjọ na Setan nwere ikike ụfọdụ pụrụ iche nke anyị na-amatụghị banyere ya.

Otú o sina dị, nke a apụtaghị na Onye Iro anyị apụghị ịmata adịghị ike anyị. Setan ejiwo ọtụtụ narị afọ mụọ akparamàgwà mmadụ. Ọ dịghị ya mkpa inwe ikike ịma ihe anyị bu n’uche iji mara ụdị àgwà anyị na-akpa, iji hụ ụdị ntụrụndụ ndị anyị na-achụso, ma ọ bụ iji nụ ihe anyị na-ekwu, na ihe ndị ọzọ. Ihu anyị na otú anyị si anọ pụkwara ime ka a matatụ ihe anyị na-eche ma ọ bụ mmetụta anyị na-enwe.

Otú ọ dị, n’ụzọ bụ́ isi, Setan na-eji otu ụzọ ahụ o si mee ihe n’ogige Iden—ụgha, aghụghọ, na ihe ọmụma na-abụghị eziokwu—eme ihe. (Jenesis 3:1-5) Ọ bụ ezie na ọ dịghị mkpa ka Ndị Kraịst na-atụ ụjọ na Setan ga-ama ihe ha bu n’uche, e nwere ihe mere ha ga-eji na-enwe nchegbu banyere echiche Setan pụrụ ịgbalị itinye n’ime obi ha. Ọ na-achọ ka Ndị Kraịst bụrụ “ndị e merụrụ uche ha emerụ na ndị a napụrụ eziokwu ahụ.” (1 Timoti 6:5) Ka a sịkwa ihe mere ụwa Setan jiworo na-emepụta imerime ihe ọmụma na ntụrụndụ ndị na-emerụ emerụ. Iji guzogide ajọ mwakpo a, Ndị Kraịst aghaghị ichebe uche ha site n’iyikwasị “okpu ígwè bụ́ nzọpụta.” (Ndị Efesọs 6:17) Ha na-eme nke a site n’iji eziokwu Bible na-emeju uche ha ma na-ezere mmetụta ọjọọ nke ụwa Setan.

Setan bụ ajọ onye iro. Ma ọ dịghị mkpa ka anyị na-atụ ya ma ọ bụ ndị mmụọ ọjọọ ya ụjọ na-enweghị isi. Jems 4:7 na-emesi anyị obi ike, sị: “Na-eguzogidenụ Ekwensu, ọ ga-agbapụkwa n’ebe unu nọ.” Ọ bụrụ na anyị agbasoo ndụmọdụ a, anyị ga-enwe ike ikwu, dị ka Jizọs, na Setan enweghị ike n’ebe anyị nọ.—Jọn 14:30.