Ihe Anụ Ufe Pụrụ Ịkụziri Anyị

“LERUONỤ anụ ufe nke eluigwe anya nke ọma, n’ihi na ha adịghị akụ mkpụrụ ma ọ bụ na-aghọrọ ma ọ bụ na-ekpokọta ihe n’ụlọ nkwakọba ihe; ma Nna unu nke eluigwe na-enye ha nri. Ọ̀ bụ na unu adịghị oké ọnụ karịa ha?” (Matiu 6:26) Jizọs Kraịst kwuru ihe a n’ozizi a ma ama o ziri n’akụkụ ugwu dị nso n’Oké Osimiri Galili. Ọ bụghị nanị ụmụazụ ya nọ na-ege ya ntị. Oké ìgwè mmadụ ndị pụrụ ịghọ ndị na-eso ụzọ ya bụ́ ndị si n’ebe nile n’ala ahụ, nọ n’ebe ahụ. Ọtụtụ n’ime ha bụ ndị ogbenye bụ́ ndị kpọtara ndị na-arịa ọrịa ka Jizọs gwọọ ha.—Matiu 4:23–5:2; Luk 6:17-20.

Mgbe Jizọs gwọsịrị ndị ọrịa nile nọ ebe ahụ, o lebaara mkpa ime mmụọ ha, bụ́ nke ka mkpa, anya. Otu n’ime ihe ndị ọ kụziri bụ ihe ahụ e kwuru n’elu.

E nwewo anụ ufe nke eluigwe eri ogologo oge. Ụfọdụ n’ime ha na-eri ụmụ ahụhụ, ndị ọzọ na-eri mkpụrụ osisi na mkpụrụ ọghịgha. Ọ bụrụ na Chineke mere ka anụ ufe nwee nri n’ụba otú ahụ, n’ezie o nwere ike nke inyere ndị ohu ya bụ́ mmadụ aka inweta ihe ha ga na-eri kwa ụbọchị. Ọ pụrụ ime nke a site n’inyere ha aka inweta ọrụ iji na-akpata ego maka nri. Ma ọ bụ ọ pụrụ ime ka ha nwee ihe ịga nke ọma n’ịkọ nri. A bịa n’ihe banyere oge e nwere ọnọdụ mberede, Chineke pụrụ ịkpali obi ndị agbata obi na ndị enyi nwere obiọma iso ndị nọ ná mkpa kerịta nri ọ bụla ha nwere.

E nwere ọtụtụ ihe ndị ọzọ anyị pụrụ ịmụta site n’iji nlezianya na-ekiri ndụ anụ ufe. Chineke kenyere ha amamihe ebumpụta ụwa ndị dị ịtụnanya iji na-ewu ụlọ ndị ha pụrụ ịnọ na-azụ ụmụ ha. Tụlee ụdị ụlọ abụọ. Foto dị n’aka ekpe bụ nke ụlọ nnụnụ Africa a na-akpọ rock martin. Ọ na-arụ ụlọ ya n’ahụ́ oké nkume ma ọ bụ n’ahụ́ ụlọ. Nnụnụ a na-arụ ụlọ ya otú ọ ga-esi jiri ebe pụtara apụta nke oké nkume ma ọ bụ, dị ka e gosiri na foto a, elu ụlọ, mere elu ụlọ ya. Ọ na-eji ụmụ irighiri ụrọ a kpụkọtara ka o yie iko na-arụ ebe ala nke ụlọ ya. Ma oké ma nne nnụnụ a na-arụsi ọrụ ike iweta ụmụ irighiri ụrọ, ọ pụkwara iwe ha ihe karịrị otu ọnwa iji rụchaa ụlọ ha. E mesịa, ha na-atụkwasị ahịhịa na ábụ́bà ha n’elu ụrọ ahụ. Ha abụọ na-ekere òkè n’inye ụmụ ha nri. Foto nke dị n’okpuru bụ nke akwụ́ oké asha. Nnụnụ Africa a na-agba mbọ na-eji ahịhịa akpa akwụ́ ya. Ọ pụrụ ịkpacha otu akwụ́ n’otu ụbọchị, ọ pụkwara ịkpa ihe karịrị akwụ́ 30 n’otu oge ọrụ ha!

Gịnị ka anyị na-amụta na ya? Ọ bụrụ na Chineke na-enye anụ ufe nkà na ngwá ọrụ dị otú ahụ bara ụba ha ji akpa akwụ́, n’ezie ọ pụrụ inyere ndị ohu ya bụ́ mmadụ aka inweta ụlọ dị ha mkpa. Otú ọ dị, Jizọs gosiri na ọ dị ihe ọzọ dị mkpa ma ọ bụrụ na anyị chọrọ ka Jehova Chineke nyere anyị aka inweta ihe ndị na-akpa anyị. Jizọs kwere nkwa, sị: “Ya mere, nọgidenụ buru ụzọ na-achọ alaeze ahụ na ezi omume ya, a ga-atụkwasịkwara unu ihe ọzọ ndị a nile.” (Matiu 6:33) Ị pụrụ iche n’echiche, sị, ‘Gịnị ka ibu ụzọ na-achọ Alaeze Chineke na-agụnye?’ Obi ga-adị Ndịàmà Jehova, bụ́ ndị na-ekesa magazin a, ụtọ ịza ajụjụ ahụ.