Imere Ndị Ọzọ Ihe Ọma Ka Ọ̀ Bụ Emela Ha Ihe Ọjọọ?

“IHE ị na-achọghị ka e mee gị, emela ya onye ọzọ.” E kwuru na ọ bụ onye nkụzi China na ọkà ihe ọmụma a ma ama bụ́ Confucius kwupụtara ụkpụrụ omume a ndị mmadụ na-ekwughachikarị. Taa, ihe dị ka afọ 2,500 ka e mesịrị, ọtụtụ ndị ka kweere na mmadụ emewo omume ọma nanị site n’izere ime ndị ọzọ ihe ọjọọ.

N’ezie, ụkpụrụ omume Confucius a bara uru ruo n’ókè ụfọdụ. Bible, n’aka nke ọzọ, na-ekpughe akụkụ ọzọ nke akparamàgwà na mkpakọrịta ụmụ mmadụ. Tụkwasị n’ihe a pụrụ ịkpọ mmehie nke ime ihe na-ezighị ezi, ya bụ, ime mmadụ ibe anyị ihe ọjọọ, Bible na-ekwu banyere mmehie nke emeghị ihe ziri ezi. Onye Kraịst na-eso ụzọ bụ́ Jems dere, sị: “Ọ bụrụ na mmadụ maara ụzọ isi mee ihe ziri ezi ma o meghịkwa ya, ọ bụụrụ ya mmehie.” (Jems 4:17) Kama ịkụziri Ndị Kraịst nanị ka ha ghara ime ndị ọzọ ihe ọjọọ, Jizọs Kraịst nyere ndụmọdụ a: “Ihe nile unu chọrọ ka ndị mmadụ na-emere unu, unu onwe unu aghaghị imere ha otú ahụ.”—Matiu 7:12.

Ná mmalite, Chineke zubere ka ihe a kpọrọ mmadụ na-emeso ibe ha ihe dị ka ọ ga-amasị ha ka e si na-emeso ha. O setịpụrụ ihe nlereanya kasị mma nke igosipụta nchegbu maka ọdịmma ndị ọzọ n’ụzọ o si kee ụmụ mmadụ: “Chineke wee kee mmadụ n’onyinyo Ya, n’onyinyo Chineke ka O kere ya: nwoke na nwanyị ka O kere ha.” (Jenesis 1:27) Nke a pụtara na Chineke ji ịhụnanya nye ụmụ mmadụ akọ na uche, bụ́ nke, mgbe a zụrụ ya nke ọma, ga-eduzi ha imeso ndị ọzọ ihe n’ụzọ ha onwe ha ga-achọ ka e si na-emeso ha.

Ọtụtụ ndị taa na-ahụju anya n’enweghị olileanya na n’enweghị onye enyemaka n’aka ndị na-adịghị echebara ndị ọzọ echiche na ndị na-eche nanị banyere onwe ha. N’ụzọ doro anya, ihe dị mkpa abụghị nanị izere ime ndị ọzọ ihe ọjọọ na ihe ga-emerụ ha ahụ́, kama nke ahụ, imere ha ihe ọma na ihe ga-enyere ha aka. N’ihi nke a, Ndịàmà Jehova na-eji afọ ofufo eme ihe ndị doro anya iji nyere ndị ọzọ aka ịmụta banyere olileanya dị ebube a na-achọta n’Okwu Chineke. Mgbe ha ji ozi ọma sitere na Bible jekwuru ndị agbata obi ha, ha na-eji mmụọ nke ịhụnanya eme ya, na-emere ndị ọzọ ihe ha ga-achọ ka e meere ha onwe ha.