Ezi Ndụmọdụ Ọ̀ Dị Mkpa?

TAA, ọtụtụ mmadụ kweere na ha pụrụ ịma ihe bụ́ ihe ọma na ihe ọjọọ nakwa na ha nweere onwe ha ime ihe ọ bụla masịrị ha. Ndị ọzọ na-ekwu na ihe ọ bụla dị mma ma ọ bụrụhaala na ọ na-eme ka mmadụ nwee obi ụtọ. Ọ na-enwe mmetụta dị njọ n’alụmdi na nwunye na ndụ ezinụlọ, bụ́ ihe ndị e leworo anya eri ogologo oge dị ka ntọala nke ọha mmadụ.—Jenesis 3:5.

Tụlee ihe banyere Verónica, * bụ́ onye bi na Mexico. Ọ na-akọ, sị: “Mgbe anyị lụworo di na nwunye ruo ihe fọrọ nke nta ka ọ bụrụ afọ 15, di m gwara m na ya na nwanyị ọzọ na-eme enyi. O kwuru na ebe ọ bụ na nwanyị a bụ nwa agbọghọ karịa m ma na-eme ya obi ụtọ karị na ya agaghị ahapụ ya. Ọ wụrụ m akpata oyi na ezigbo enyi m agaghịzi anọnyere m ọzọ. M na-echebu na ọnwụ nke ndị anyị hụrụ n’anya bụ ihe kasị akpata ihe mgbu. Ma nye m, ịkwa iko nke di m na-egbu m mgbu ọbụna karị n’ihi na ọ bụghị nanị na onye m hụrụ n’anya nke ukwuu hapụrụ m kama ọ nọgidere na-eme ihe na-agbawa m obi.”

E nwekwara otu nwoke gbara afọ 22 bụ́ onye gbaworo alụkwaghịm nke nwere otu nwa nwoke ma ọ dịghị njikere ịnakwere ibu ọrụ ya dị ka nna. Ọ na-atụ anya ka nne ya na-elekọta ya na nwa ya. Ọ bụrụ na nne ya emezughị ihe nile ọ chọrọ, ọ na-ewe oké iwe ma na-akparị ya, dị nnọọ ka nwa na-enweghị ezi àgwà. Nne ya amakwaghị ihe ọ ga-eme n’ihi àgwà mkparị dị otú ahụ.

Ọnọdụ ndị a abụghị ihe ndị a na-adịghị ahụkebe. Nkewa na alụkwaghịm a na-eme n’ụlọikpe na-arịwanye elu n’ebe nile. Ọtụtụ ụmụaka na-ahụ ka otu n’ime ndị mụrụ ha na-ahapụ ụlọ iji malite ndụ ọhụrụ. Ụfọdụ ndị na-eto eto adịghị akwanyere ndị ọzọ ùgwù, gụnyere ndị mụrụ ha, ha na-etinyekwa aka  n’omume ndị a na-agatụghị echeta n’echiche n’oge ndị gara aga. Ịnwale mmekọahụ, ịṅụ ọgwụ ọjọọ, mwakpo sitere n’aka ndị ntorobịa na ụmụaka igbu ndị nkụzi ma ọ bụ ndị nne na nna ha aghọwo ihe a na-ahụkarị n’ọtụtụ ala. Ị pụkwara ịhụwo na ọzụzụ nke ụmụaka na alụmdi na nwunye abụghị nanị akụkụ ndị a na-enwe ihe isi ike na ha n’ụwa nke taa.

Ka anyị na-ahụ ihe ndị a na-emenụ, anyị pụrụ ịdị na-eche ihe meworo ọha mmadụ. Ọ bụrụ n’ezie na ndị mmadụ ma ihe bụ́ ihe ọma na ihe ọjọọ, gịnị mere na e dozibeghị ọtụtụ nsogbu? È nwere mkpa maka ezi ndụmọdụ? È nwere isi iyi nke ndụmọdụ bara uru dị otú ahụ, nke gosiworo onwe ya ịbụ ihe a pụrụ ịtụkwasị obi? Ọ bụ ezie na ọtụtụ na-ekwu na ha kwere na Chineke na Okwu ya e dere ede, nke a eyighị ka ọ̀ na-emetụta mkpebi ha. Ma uru ndị dị aṅaa ka anyị pụrụ irite mgbe anyị na-achọ ma na-anata ndụmọdụ site n’aka Chineke? Ka anyị tụlee nke ahụ n’isiokwu na-esonụ.

[Ihe e dere n’ala ala peeji]