“Chọpụtanụ Onye Kwesịrị Ekwesị”

DAMASKỌS bụ obodo bara ọgaranya na narị afọ mbụ nke Oge Anyị. N’ịbụ nke ubi mkpụrụ osisi gbara gburugburu, ọ dị ka ebe izu ike nye ndị njem si n’ala ndị dị n’ebe ọwụwa anyanwụ nke obodo ahụ. Oge na-adịghị anya ka Jizọs Kraịst nwụsịrị, e nwere ọgbakọ Ndị Kraịst na Damaskọs. Ndị Juu ndị ọ pụrụ ịbụ na ha ghọrọ ụmụazụ Jizọs n’oge Ememe Pentikọst na Jeruselem na 33 O.A. so n’ọgbakọ ahụ. (Ọrụ 2:5, 41) Ọ pụrụ ịbụ na ụfọdụ ndị na-eso ụzọ si Judia kwagara Damaskọs mgbe mkpagbu malitere ka a tụgbusịrị Stivin na nkume.—Ọrụ 8:1.

Eleghị anya, na 34 O.A., otu Onye Kraịst si Damaskọs aha ya bụ Ananaịas natara otu ọrụ dị ịrịba ama. Onyenwe anyị gwara ya, sị: “Bilie, gaa n’okporo ámá a na-akpọ Nke Kwụ Ọtọ, chọọkwa, n’ụlọ Judas, otu nwoke aha ya bụ Sọl, onye Tasọs. N’ihi na, lee! ọ na-ekpe ekpere.”—Ọrụ 9:11.

Okporo ámá ahụ a na-akpọ Nke Kwụ Ọtọ dị ihe dị ka otu kilomita na ọkara n’ogologo ma si n’etiti Damaskọs gafee. Site n’ihe osise dị n’ebe a nke e sere na narị afọ nke 19, anyị na-aghọtatụ ihe okporo ámá ahụ dị ka ya n’oge ochie. N’ihi otú e si rụọ ya, ọ pụrụ ịbụwo na o were Ananaịas oge ụfọdụ ịchọta ụlọ Judas. Otú ọ dị, Ananaịas chọtara ya, ọbịbịa ya dugakwara na Sọl ịghọ Pọl onyeozi, bụ́ onye nkwusa ozi ọma na-anụ ọkụ n’obi.—Ọrụ 9:12-19.

Jizọs ezipụwo ndị na-eso ụzọ ya ma gwa ha ka ha ‘chọpụta ndị kwesịrị’ ozi ọma ahụ. (Matiu 10:11) O yiri nnọọ ka Ananaịas ọ̀ chọrọ Sọl achọ n’ezie. Dị ka Ananaịas, Ndịàmà Jehova na-eji obi ụtọ achọ ndị kwesịrị ekwesị, ha na-enwekwa obi ụtọ dị ukwuu mgbe ndị mmadụ nabatara ozi ọma nke Alaeze ahụ. Ịchọta ha na-eme ka mgbalị ahụ nile kwesị ekwesị.—1 Ndị Kọrint 15:58.

[Foto dị na peeji nke 32]

‘Okporo ámá a na-akpọ Nke Kwụ Ọtọ’ taa

[Ebe E Si Nweta Foto Dị na peeji 32]

Site n’akwụkwọ La Tierra Santa, Mpịakọta nke Abụọ, 1830