Jehova Agụwo “Ntutu Nile nke Isi Unu Ọnụ”

“O nweghị otu n’ime [nza] ga-ada n’ala Nna unu aghara ịma. Ma a gụwo ntutu nile nke isi unu ọnụ.”—MATIU 10:29, 30.

1, 2. (a) Gịnị mere Job ji chee na Chineke agbahapụla ya? (b) Ihe ndị Job kwuru hà na-egosi na ọ gbakụtala Jehova azụ? Kọwaa.

“ANA M etiku Gị [Chineke], ma ị dịghị aza m: eguzoro m ọtọ, I wee lekwasị m anya. Ị na-agbanwe ịbụrụ m onye na-enweghị obi ebere: Ị na-eji ume aka Gị kpagbuo m.” Onye kwuru okwu ahụ nọ n’oké nhụjuanya, ọ bụghịkwa ihe ijuanya na ọ nọ n’ọnọdụ ahụ! Ihe ndị o ji biri efunahụla ya, ọdachi dị mgbagwoju anya egbukpọọla ụmụ ya, ugbu a kwa, a kụọla ya ọrịa na-agwụ ike. Aha nwoke ahụ bụ Job, e dekọkwara ahụhụ ọ tara n’ime Bible maka abamuru anyị.—Job 30:20, 21.

² Ihe ndị Job kwuru pụrụ ime ka o yie ka ọ̀ gbakụtala Chineke azụ, ma ọ bụghị otú ahụ ka ọ dị. Nanị ihe Job mere bụ ikwupụta otú ọ dị ya n’obi. (Job 6:2, 3) Ọ maghị na ọ bụ Setan na-anwa ya, ya mere, o kwubiri n’ụzọ hiere ụzọ na Chineke agbahapụla ya. N’otu oge, Job jụdịrị Jehova, sị: “N’ihi gịnị ka Ị na-ezo ihu Gị, na-echekwa na m bụ onye iro n’ebe Ị nọ?” *—Job 13:24.

3. Mgbe anyị na-ata ahụhụ, gịnị pụrụ ịgbata anyị n’obi?

³ Taa, ọtụtụ Ndịàmà Jehova nọgidere na-ata ahụhụ n’ihi agha, ọgba aghara ọchịchị ma ọ bụ nke obodo, ọdachi ndị na-emere onwe ha, nká, ọrịa, ogbenye ọnụ ntụ na mmachibido iwu nke ndị ọchịchị. Ọ pụkwara ịbụ na gị onwe gị na-enwe otu ọnwụnwa ma ọ bụ ọzọ. Mgbe ụfọdụ, ị pụrụ ịdị na-eche na Jehova na-ezonahụ gị ihu ya. Ị maara ihe dị na Jọn 3:16 nke ọma. Ọ na-asị: “Chineke hụrụ ụwa n’anya nke ukwuu nke na o nyere Ọkpara ọ mụrụ nanị ya.” N’agbanyeghị nke ahụ, mgbe ị na-ata ahụhụ n’enweghị olileanya na ọ ga-akwụsị, ị pụrụ iche, sị: ‘Chineke ọ̀ hụrụ mụnwa n’anya n’ezie? Ọ̀ maara maka ahụhụ m na-ata? Ọ̀ na-eche banyere mụ onwe m?’

4. Olee ọnọdụ na-ekweghị akwụsị akwụsị Pọl na-aghaghị ịnagide, n’ụzọ ndị dịkwa aṅaa ka ọnọdụ dị otú ahụ pụrụ isi metụta anyị?

⁴ Tụlee ihe mere Pọl onyeozi. O dere, sị: “E mere ka m nwee ogwu n’anụ ahụ́ m, bụ́ mmụọ ozi Setan, ka ọ nọgide na-ama m ụra,” ọ gbakwụnyere, sị: “Ugboro atọ ka m rịọsiri Onyenwe anyị arịrịọ ike ka ihe a wee si n’ebe m nọ pụọ.” Jehova nụrụ arịrịọ ya. Otú ọ dị, ọ gwara Pọl na ya agaghị ewepụ ogwu ahụ n’ụzọ ọrụ ebube. Kama nke ahụ, Pọl aghaghị ịdabere n’ike Chineke iji nyere ya aka ịnagide ‘ogwu ahụ dị ya n’anụ ahụ́.’ * (2 Ndị Kọrint 12:7-9) Dị ka Pọl, ọ pụrụ ịbụ na o nwere ọnwụnwa gị na ya na-alụ. Eleghị anya, ị na-eche, sị, ‘Na o yiri ka Jehova emebeghị ihe ọ bụla banyere ule m ọ̀ na-egosi na ọ maghị maka ọnọdụ m, ka ọ̀ bụ na ọ naghị eche banyere m?’ Ọ bụtụghị otú ahụ! Ihe Jizọs gwara ndịozi ya obere oge tupu ya ahọpụta ha mere ka nchegbu Jehova nwere maka ohu ya nke ọ bụla na-ekwesị ntụkwasị obi pụta ìhè. Ka anyị hụ otú ihe ndị o kwuru pụrụ isi gbaa anyị ume taa.

 “Unu Atụla Egwu”—N’ihi Gịnị?

5, 6. (a) Olee otú Jizọs si nyere ndịozi ya aka ịghara ịtụ egwu maka ihe ndị ga-eme n’ọdịnihu? (b) Olee otú Pọl si gosi na ya nwere obi ike na Jehova na-eche banyere ya?

⁵ Jizọs nyere ndịozi ya ikike pụrụ iche, gụnyere “ikike n’ebe ndị mmụọ na-adịghị ọcha nọ, ka ha wee chụpụ ha na ka ha gwọọ ụdị ọrịa ọ bụla na ụdị nsogbu ahụ́ ike ọ bụla.” Ma, nke a apụtaghị na ha agaghị enweta ule na ihe isi ike ná ndụ. Kama nke ahụ, Jizọs kọwara n’ụzọ zuru ezu ụfọdụ n’ime ihe ndị ga-adakwasị ha. Otú ọ dị, ọ gbara ha ume, sị: “Unu atụkwala egwu ndị na-egbu ahụ́ ma ha enweghị ike igbu mkpụrụ obi; kama na-atụnụ egwu onye ahụ nke pụrụ ibibi ma mkpụrụ obi ma ahụ́ n’ime Gehena.”—Matiu 10:1, 16-22, 28.

⁶ Iji nyere ndịozi ya aka ịghọta ihe mere ha na-ekwesịghị iji tụọ egwu, Jizọs nyeziri ha ihe atụ abụọ. Ọ gwara ha, sị: “Ọ̀ bụ na a dịghị ere nza abụọ otu mkpụrụ ego nke ga-azụta nanị ihe dị nta? Ma o nweghị otu n’ime ha ga-ada n’ala Nna unu aghara ịma. Ma a gụwo ntutu nile nke isi unu ọnụ. Ya mere unu atụla egwu: Unu dị oké ọnụ ahịa karịa ọtụtụ nza.” (Matiu 10:29-31) Rịba ama na Jizọs jikọtara atụghị egwu mgbe anyị na-ata ahụhụ na inwe obi ike na Jehova na-eche banyere anyị n’otu n’otu. Ihe àmà na-egosi na Pọl onyeozi nwere obi ike dị otú ahụ. O dere, sị: “Ọ bụrụ na Chineke nọnyeere anyị, ònye ga-emegide anyị? Onye ahụ nke na-azọghị ọbụna Ọkpara nke ya kama nyefee ya maka anyị nile, gịnị mere ya na ya na-agaghịkwa eji obiọma nye anyị ihe nile ọzọ?” (Ndị Rom 8:31, 32) N’agbanyeghị ihe ịma aka ndị ị na-eche ihu, ị pụkwara ijide n’aka na Jehova na-eche banyere gị onwe gị ma ọ bụrụhaala na ị nọgide na-eguzosi ike n’ihe nye ya. Nke a ga-apụta ìhè ọbụna karị ma anyị lebakwuo anya na ndụmọdụ Jizọs nyere ndịozi ya.

Otú E Si Were Nza

7, 8. (a) Olee otú e si lee nza anya n’oge Jizọs? (b) Dị ka ihe àmà na-egosi, olee ihe mere Matiu 10:29 ji jiri ụdị okwu Grik e ji eme ihe maka “nza” bụ́ nke pụtara obere nnụnụ mee ihe?

⁷ Ihe atụ Jizọs kọwara nke ọma nchegbu Jehova na-enwe maka ohu Ya nke ọ bụla. Buru ụzọ tụlee banyere nza. N’oge Jizọs, a na-eri nza eri, ma ebe ọ bụ na ha na-emebisị ihe a kụrụ akụ, a na-elekarị ha anya dị ka ihe ndị na-akpata nsogbu. Nza juru ebe nile, dịkwa ọnụ ala nke na a pụrụ iji ihe na-erughị cent ise zụta abụọ. Cent iri ga-azụta, ọ bụghị nza anọ, kama ise—nke ga-eme ya ise ga-abụ nke e ji mezie ya, dị ka à ga-asị na ọ baghị uru * ọ bụla!—Luk 12:6.

⁸ Cheekwa banyere otú nnụnụ a juru ebe nile hà. E jiri ya tụnyere ọtụtụ nnụnụ ndị ọzọ, ọbụna nza nke tozurula etozu na-adị nnọọ  ntakịrị. N’agbanyeghị nke ahụ, okwu Grik a sụgharịrị ịbụ “nza” na Matiu 10:29 pụtara kpọmkwem obere nza. Ihe àmà na-egosi na Jizọs chọrọ ka ndịozi ya jiri anya nke uche ha hụ obere nnụnụ nke na-abachaghị uru. Dị ka otu akwụkwọ e mere nnyocha na ya si kwuo, “Jizọs kpọtụrụ nnụnụ dị nnọọ ntakịrị aha ma jirikwa okwu gosiri na ọ bụ nnọọ obere nnụnụ mee ihe!”

9. Olee isi ihe gbara ọkpụrụkpụ Jizọs mere ka ọ pụta ìhè n’ihe atụ o mere banyere nza?

⁹ Ihe atụ Jizọs ji nza mee mere ka otu isi ihe gbara ọkpụrụkpụ pụta ìhè: Ihe yiri ihe na-abaghị uru n’anya ụmụ mmadụ dị mkpa n’anya Jehova Chineke. Jizọs gara n’ihu ime ka eziokwu a pụta ìhè site n’ịgbakwụnye na obere nza agaghị ‘ada n’ala’ Jehova aghara ịma. * Ihe mmụta dị na ya doro anya. Ọ bụrụ na Jehova Chineke maara maka nnụnụ kasị nta na nke a kasị ele anya dị ka ihe na-enweghị ihe ọ bụ, lezienụ ka ọ ga-esi na-echegbu onwe ya karị banyere ọnọdụ nke onye kpebiri ijere ya ozi!

10. Gịnị ka okwu ahụ bụ́: “A gụwo ntutu nile nke isi unu ọnụ” pụtara?

¹⁰ Tụkwasị n’ihe atụ o mere banyere nza, Jizọs kwuru, sị: “A gụwo ntutu nile nke isi unu ọnụ.” (Matiu 10:30) Okwu a nke dị mkpirikpi ma gbaa ọkpụrụkpụ na-eme ka ihe Jizọs kwuru n’ihe atụ o mere banyere nza pụta ìhè. Tụlee nke a: Ntutu isi nke na-adị n’isi mmadụ na-adị ihe dị ka otu narị puku. Dị ka ọ na-adịkarị, otu ntutu na-eyi nnọọ ibe ya, ọ dịghịkwa ntutu nke o yiri ka ànyị na-elebara anya n’ụzọ pụrụ iche karịa ndị ọzọ. Ma, Jehova Chineke maara banyere ntutu isi nke ọ bụla, gụọkwa ya ọnụ. Ya bụrụ otú ahụ, ò nwere ihe banyere ndụ anyị nke Jehova na-apụghị ịma? N’ezie, Jehova maara otú e si kee onye nke ọ bụla n’ime ndị ohu ya. N’ezie, ọ “na-ele obi.”—1 Samuel 16:7.

11. Olee otú Devid si gosi obi ike o nwere na Jehova na-eche banyere ya?

¹¹ Devid, bụ́ onye jiworo anya ya hụ ihe a na-akpọ ihe isi ike, nwere obi ike na Jehova maara ya. O dere, sị: “Jehova, I gwupụtawo ala obi m, I wee mara m. Gị onwe gị amawo nnọdụ ala m na mbili ọtọ m, Ị na-aghọta echiche m nile site n’ebe dị anya.” (Abụ Ọma 139:1, 2) Ị pụkwara ijide n’aka na Jehova maara gị onwe gị. (Jeremaịa 17:10) Ekwubila ngwa ngwa na ị dị nnọọ ntakịrị nke na anya Jehova nke na-ahụ ihe nile apụghị ịhụ gị!

“Tinye Anya Mmiri M Nile n’Ime Karama Akpụkpọ Gị”

12. Olee otú anyị si mara na Jehova maara ahụhụ ndị ya na-ata nke ọma?

¹² Ọ bụghị nanị na Jehova maara ndị ohu ya n’otu n’otu kamakwa ọ maara ahụhụ nke ọ bụla n’ime ha na-ata nke ọma. Dị ka ihe atụ, mgbe a na-akpagbu ndị Izrel dị ka ndị ohu, Jehova gwara Mozis, sị: “Ahụwo m n’ezie mweda n’ala nke ndị m nke dị n’Ijipt, anụwokwa m iti mkpu ha n’ihi ndị na-achị ha n’ihe ike; n’ihi na amawo m ihe mgbu ha nile.” (Ọpụpụ 3:7) Lee ka o si bụrụ ihe na-akasi obi ịmata na mgbe anyị na-atachi obi n’ule, Jehova na-ahụ ihe na-emenụ ma na-anụ iti mkpu anyị! N’ezie, ahụhụ anyị na-ata na-emetụ ya n’obi.

13. Gịnị na-egosi na Jehova na-eche banyere ndị ohu ya n’ezie?

 ¹³ Mmetụta Jehova nwere maka ụmụ Izrel na-egosi na ọ na-eche banyere ndị ya na ha na-emekọ ihe. N’agbanyeghị na ahụhụ ha na-ata na-abụkarị n’ihi isi ike ha, Aịzaịa dere banyere Jehova, sị: “Ná mkpagbu nile ha Ya ka a na-akpagbu.” (Aịsaịa 63:9) Ya mere, dị ka ohu Jehova kwesịrị ntụkwasị obi, ị pụrụ ijide n’aka na mgbe ihe na-ewute gị, ọ na-ewute Jehova. Ọ̀ bụ na nke a adịghị akpali gị iche ahụhụ ọ bụla ihu n’atụghị ụjọ na ịnọgide na-eme ike gị nile ijere ya ozi?—1 Pita 5:6, 7.

14. Olee ọnọdụ a nọ na ya dee Abụ Ọma nke 56?

¹⁴ E mere ka obi ike Eze Devid nwere na Jehova na-eche banyere ya ma nwee ọmịiko n’ahụ́ ya pụta ìhè n’Abụ Ọma nke 56, bụ́ nke Devid dere mgbe ọ na-agbara Eze Sọl na-achọ igbu ya ọsọ. Devid gbagara Gat, ma o chere na a ga-ejide ya mgbe ndị Filistia matara onye ọ bụ. O dere, sị: “Ndị na-eche m anwụ na-ekusi ume ike ilo m ogologo ụbọchị nile: n’ihi na ha bara ụba, bụ́ ndị na-ebu agha imegide m n’ibuli onwe ha elu.” N’ihi ọnọdụ ya nke dị nnọọ ize ndụ, Devid chigharịkwuuru Jehova. O kwuru, sị: “Ogologo ụbọchị nile ka ha na-ahịgharị okwu m nile: n’imegide m echiche nile ha bụ ime ihe ọjọọ.” —Abụ Ọma 56:2, 5.

15. (a) Gịnị ka Devid bu n’obi mgbe ọ rịọrọ Jehova ka o tinye anya mmiri ya na karama akpụkpọ ma ọ bụ detuo ya n’akwụkwọ? (b) Mgbe anyị na-atachi obi n’ọnọdụ na-ama okwukwe anyị aka, gịnị ka anyị pụrụ ijide n’aka?

¹⁵ Mgbe ahụ, dị ka e dekọrọ n’Abụ Ọma nke 56:8, Devid kwuru ihe ndị a na-adọrọ mmasị: “Mwagharị m ka Gị onwe gị gụworo ọnụ: tinye anya mmiri m nile n’ime karama akpụkpọ Gị; hà adịghị n’akwụkwọ Gị?” Lee otú e si kọwaa nlekọta ịhụnanya Jehova n’ụzọ na-emetụ n’ahụ́! Mgbe e nwere ihe na-echegbu anyị, anyị pụrụ ịkpọku Jehova n’anya mmiri. Ọbụna Jizọs, bụ́ onye zuru okè, mere otú ahụ. (Ndị Hibru 5:7) Obi siri Devid ike na Jehova na-ahụ ya nakwa na ọ ga-echeta ahụhụ ọ na-ata, dị ka à ga-asị na ọ na-agbanye anya mmiri ya n’ime karama akpụkpọ ma ọ bụ na-edetu ha n’akwụkwọ. * Ikekwe, ị na-eche na anya mmiri gị ga-afọ obere ka o ju karama akpụkpọ ahụ ma ọ bụ ọtụtụ peeji nke akwụkwọ ahụ. Ya bụrụ otú ahụ, kara obi. Bible na-emesi anyị obi ike, sị: “Jehova nọ nso ndị obi ha tiwara etiwa, Ọ na-azọpụtakwa ndị a zọpịaworo n’ime mmụọ ha.”—Abụ Ọma 34:18.

Ịghọ Ezigbo Enyi Chineke

16, 17. (a) Olee otú anyị si mara na nsogbu ndị ohu Jehova na-enwe na-emetụ ya n’obi? (b) Gịnị ka Jehova merela iji mee ka o kwe ụmụ mmadụ omume ịbụ ezigbo ndị enyi ya?

¹⁶ Eziokwu ahụ bụ́ na Jehova agụwo ‘ntutu isi anyị ọnụ’ na-eme ka anyị ghọtatụ ụdị Chineke na-eleru anya ala na nke na-ahụ n’anya anyị nwere ihe ùgwù ife ofufe. Ọ bụ ezie na anyị aghaghị ichere ụwa ọhụrụ ahụ e kwere ná nkwa bụ́ mgbe ihe mgbu nile na nhụjuanya nile ga-apụ n’anya, o nwere ihe magburu onwe ya Jehova na-emere ndị ya ugbu a. Devid dere, sị: “Izu nzuzo [ma ọ bụ ịbụ ezigbo enyi] Jehova dịịrị ndị na-atụ egwu Ya; ya na ọgbụgba ndụ Ya, ime ka ha mara ihe.”—Abụ Ọma 25:14.

¹⁷ ‘Ịbụ ezigbo enyi Jehova.’ Leenụ, nke ahụ yiri ka ọ̀ bụ ihe na-apụghị ikwe omume n’anya ụmụ mmadụ! Ma Jehova na-akpọ ndị na-atụ egwu ya òkù ịnọ dị ka ndị ọbịa n’ụlọikwuu ya. (Abụ Ọma 15:1-5) Gịnịkwa ka Jehova na-emere ndị ọbịa ya? Dị ka Devid si kwuo, ọ na-eme ka ha mara ọgbụgba ndụ ya. Jehova na-akọrọ ha ihe o bu n’obi, na-ekpughere ndị amụma “izu nzuzo” ya ka ha wee mara ihe bụ́ nzube ya na ihe ha na-aghaghị ime iji bie ndụ kwekọrọ na ha.—Emọs 3:7.

18. Olee otú anyị si mara na Jehova chọrọ ka anyị na ya nwee mmekọrịta chiri anya?

 ¹⁸ N’eziokwu, ọ bụ ihe na-enye obi ụtọ ịmara na anyị bụ́ ụmụ mmadụ na-ezughị okè pụrụ ịbụ ezigbo ndị enyi nke Onye Kasị Ihe Nile Elu, bụ́ Jehova Chineke. N’eziokwu, ọ na-agba anyị ume ime otú ahụ. Bible na-ekwu, sị: “Bịaruonụ Chineke nso, ọ ga-abịarukwa unu nso.” (Jems 4:8) Jehova chọrọ ka anyị na ya nwee mmekọrịta chiri anya. N’ezie, o nweela ihe ndị o mere iji mee ka mmekọrịta dị otú ahụ kwe omume. Àjà mgbapụta Jizọs emeela ka o kwe omume anyị na Chineke Pụrụ Ime Ihe Nile ịbụ enyi. Bible na-ekwu, sị: “Ma anyị onwe anyị, anyị na-ahụ n’anya, n’ihi na o bu ụzọ hụ anyị n’anya.”—1 Jọn 4:19.

19. Olee otú ntachi obi pụrụ isi mee ka mmekọrịta anyị na Jehova chikwuo anya?

¹⁹ Anyị na-eme ka mmekọrịta ahụ chikwuo anya mgbe anyị na-atachi obi n’ọnọdụ ndị siri oké ike. Onye na-eso ụzọ bụ́ Jems dere, sị: “Ka ntachi obi rụzuo ọrụ ya, ka unu wee zuo ezu ma gbasie ike n’ụzọ nile, n’enweghị ihe ọ bụla kọrọ unu.” (Jems 1:4) Olee “ọrụ” a na-arụzu site n’ịtachi obi n’ihe isi ike? Cheta na Pọl nwere “ogwu n’anụ ahụ́.” Gịnị ka ntachi obi rụzuru n’ebe ọ nọ? Pọl kwuru banyere ule ndị bịaara ya, sị: “Ya mere, n’ụzọ kasị enye ọṅụ, ọ kara m mma ịnya isi n’ihe metụtara adịghị ike m, ka ike nke Kraịst ahụ wee nọgide na-ekpuchi m dị ka ụlọikwuu. Ya mere, ana m enweta obi ụtọ n’adịghị ike, ná mkparị, n’ịnọgasị ná mkpa, ná mkpagbu na ihe isi ike, maka Kraịst. N’ihi na mgbe m na-adịghị ike, mgbe ahụ ka m na-adị ike.” (2 Ndị Kọrint 12:9, 10) Ihe Pọl maara bụ na Jehova ga-enye ya ike dị ya mkpa—“ike karịrị ike nkịtị,” ma ọ bụrụ na ọ dị mkpa—iji tachie obi. N’aka nke ya, nke ahụ dọtakwuru ya nso n’ebe Kraịst na Jehova Chineke nọ.—2 Ndị Kọrint 4:7; Ndị Filipaị 4:11-13.

20. Olee otú anyị pụrụ iji jide n’aka na Jehova ga-akwado anyị ma kasie anyị obi mgbe anyị na-ata ahụhụ?

²⁰ Ikekwe, Jehova ekwela ka ọnwụnwa gị dịrị gaa n’ihu. Ya bụrụ otú ahụ, buru nkwa a o kwere ndị na-atụ egwu ya n’obi: “M gaghị ahapụ gị ma ọlị, m gaghịkwa agbahapụ gị ma ọlị.” (Ndị Hibru 13:5) Ị pụrụ inweta nkwado na nkasi obi dị otú ahụ. Jehova agụọla ‘ntutu nile nke isi gị ọnụ.’ Ọ na-ahụ ntachi obi ị na-enwe. Ihe mgbu gị na-emetụ ya n’obi. Ọ na-eche banyere gị n’ezie. Ọ gaghịkwa ‘echefu ọrụ gị na ịhụnanya i gosiri maka aha ya.’—Ndị Hibru 6:10.

[Ihe ndị e dere n’ala ala peeji]

Ị̀ Na-echeta?

• Olee ihe ndị pụrụ ime ka mmadụ chee na Chineke agbahapụla ya?

• Olee ihe anyị mụtara site n’ihe atụ Jizọs banyere nza nakwa banyere ịgụ ntutu nile nke isi anyị ọnụ?

• Gịnị ka itinye anya mmiri mmadụ n’ime “karama akpụkpọ” Jehova ma ọ bụ idetu ya ‘n’akwụkwọ’ ya pụtara?

• Olee otú anyị pụrụ isi bụrụ ‘ezigbo ndị enyi Jehova’?

[Ajụjụ Nke Paragraf Ndị a Na-amụ Amụ]

[Foto dị na peeji nke 22]

Gịnị mere na Jehova ewepụghị “ogwu n’anụ ahụ́” Pọl?

[Foto dị na peeji nke 23]

Gịnị ka anyị pụrụ ịmụta site n’ihe atụ Jizọs mere banyere nza?

[Ebe E Si Nweta Foto]

© J. Heidecker/VIREO

[Foto dị na peeji nke 25]

Site n’ịgụchi Bible anya, anyị pụrụ inwe obi ike na Chineke na-eche banyere anyị n’otu n’otu