Ị̀ Dị Ka Osisi Lagani Auna?

N’OTU obodo dị ná mpụga Port Moresby, Papua New Guinea, ụmụnna nwoke abụọ si ozi ọma na-alọta. Ka ha na-alọta, ha hụrụ otu osisi mara mma. Onye nke okenye tụgharịrị ma gwa onye nke nta, sị, “Ihe a bụ osisi lagani auna, aha ahụ pụtara ‘osisi na-erugharị akwụkwọ kwa afọ.’ N’adịghị ka ọtụtụ osisi ndị ọzọ nọ n’ebe okpomọkụ, ọ na-agbụsị akwụkwọ kwa afọ ma yie ka ọ nwụọla. Otú ọ dị, ọ na-eteghasị n’udu mmiri, puo okooko, ma maghachi mma.”

Anyị pụrụ ịmụta ihe site n’osisi lagani auna, ma ọ bụ royal poinciana, nke bụ́ aha e ji mara ya. Dị ka ụfọdụ ndị ọkachamara si kwuo, ọ bụ otu n’ime osisi ise kasị epu okooko ndị mara mma n’ụwa nile. N’agbanyeghị na ọ na-agbụsị okooko ya na akwụkwọ ya n’oge ọkọchị, osisi ahụ na-echekwa mmiri na-ezuru ya. Mkpọrọgwụ ya siri ike, ọ pụkwara ịtụhị gburugburu nnukwu okwute ndị bamiri n’ime ala. N’ụzọ dị otú a, ọ na-akwụsị ike mgbe e nwere oké ifufe. Ya bụ, ọ na-eto nke ọma ọbụna n’oge ọ na-esiri osisi ndị ọzọ ike ịdịgide ndụ.

Anyị pụrụ ịchọta onwe anyị n’ọnọdụ ndị pụrụ ịnwale otú okwukwe anyị siruru n’ike. Gịnị ga-enyere anyị aka ịtachi obi? Dị ka osisi lagani auna, anyị pụrụ ịdị na-amịta mmiri na-enye ndụ nke Okwu Chineke ma na-echekwa ya. Anyị kwesịkwara ịrapagidesi ike ‘n’oké nkume anyị,’ bụ́ Jehova, nakwa ná nzukọ ya. (2 Samuel 22:3) N’ezie, osisi lagani auna na-echetara anyị na anyị pụrụ ịnọgide na-agbasi ike n’ụzọ ime mmụọ ọbụna na gburugburu ebe ihe siri oké ike, ma ọ bụrụ na anyị ejiri ndokwa ndị Jehova mere kpọrọ ihe. Site n’ime otú a, anyị ‘ga-eketa nkwa ndị e kwere,’ tinyere nkwa nke ịdị ndụ ebighị ebi.—Ndị Hibru 6:12; Mkpughe 21:4.