Okwukwe nke Otu Nne Nyeere Ya Aka Idi Obi Mgbawa

“Ọ bụrụ na unu na-agụ akwụkwọ ozi a, ọ pụtara na m nwụrụ mgbe a na-awa m ahụ́ nakwa na mụ na unu agaghịzi anọ.”

NKE a bụ otú otu nne bụ́ Onye Kraịst, onye aha ya bụ Carmen, si malite akwụkwọ ozi o degaara ụmụ ya nwanyị atọ. Otu dị afọ iri abụọ na ise, nke ọzọ dị afọ iri na itoolu, ebe nke atọ dị afọ iri na isii. Ọ dị mwute na Carmen mesịrị nwụọ ka a na-awa ya ahụ́.

Ọ na-agbawa obi onye bụ́ nne ịma na ya na-aga ịkpatara ụmụ ya nwanyị atọ oké iru uju dị otú a. Ma, okwukwe siri ike nne a nwere n’ebe Jehova nọ na ná nkwa ya, nyeere ya aka idi obi mgbawa a. Okwukwe ya mere ka o nwee obi iru ala, bụ́ nke pụtara nnọọ ìhè n’akwụkwọ ozi ya na-agba anya mmiri. Lee ihe ọ gwara ụmụ ya atọ.

“Ihe mbụ m chọrọ ịgwa unu bụ na ahụrụ m unu n’anya nke ukwuu. . . . Unu bụ ụmụ kasị mma nne ọ bụla ga-achọ inwe, ejikwa m nnọọ unu eme ọnụ.

“Ọ gaara amasị m ka mụ na unu nọrọ ruo mgbe ụwa ọhụrụ ahụ Chineke kwere ná nkwa ga-abịa . . . , ma ebe nke ahụ na-agaghịzi enwe isi, arịọla m Jehova ka o nyere unu aka ka unu nwee ike ịnọgide na-ekwesị ntụkwasị obi dị ka unu na-eme. Mụ na unu ediela ọtụtụ ule, ọ dịbeghịkwa mgbe Jehova gbahapụrụ anyị. . . . N’ihi ya, nọgidenụ na-anakwere nduzi ọ na-enye site ná nzukọ ya, nọgidekwanụ na-akwado ọgbakọ na ndị okenye. Na-agachinụ ozi ọma anya ruo okè unu nwere ike, na-ahụkwanụ ụmụnna nile n’anya.

“Nkewa a dị n’etiti anyị ugbu a agaghị adịte aka. . . . Ana m arịọ unu ka unu gbaghara m ebe nile m mejọrọ unu, gbagharakwanụ m oge nile m ghọtahiere unu ma ọ bụ oge ndị m na-agwaghị unu na m hụrụ unu n’anya. . . . Ama m na onye ọ bụla n’ime unu nwere mkpa nke ya. Jehova maara nke a karịa ka onye ọ bụla n’ime unu maara, ọ ga-enyekwa unu ihe nile dị unu mkpa ma kwụghachi unu ụgwọ maka ihe nile unu diworo.

“Unu echefula ihe mgbaru ọsọ unu, nke bụ́ ibi n’ime ụwa ọhụrụ ahụ, na-agbalịsikwanụ ike ịbanye n’ime ya. Ka Jehova gọzie unu ma nye unu ume ka unu wee nwee ike ikwesị ntụkwasị obi ruo ọgwụgwụ. . . . Ya ewutela unu, ụmụ ọma m. Ahụrụ m unu n’anya!”

Ọdachi pụrụ ịdakwasị mmadụ mgbe ọ na-atụghị anya ya. Eze Solomọn oge ochie dere, sị: “Mgbe na ihe ndapụta na-adabara ha nile.” (Eklisiastis 9:11) Otú ọ dị, ndị nwere okwukwe siri ike n’ebe Chineke nọ nwere ụdị obi ike Pọl onyeozi nwere mgbe ọ sịrị: “Ekwetara m na ọnwụ ma ọ bụ ndụ . . . ma ọ bụ ihe ọ bụla ọzọ e kere eke agaghị enwe ike ikewapụ anyị n’ịhụnanya Chineke nke dị n’ime Kraịst Jizọs Onyenwe anyị.”—Ndị Rom 8:38, 39; Ndị Hibru 6:10.