Olee Otú I Si Enye Ndụmọdụ?

Ò nwetụla mgbe ndị ọzọ gwara gị ka i nye ha ndụmọdụ? Dị ka ihe atụ, à jụtụla gị ajụjụ ndị dị ka: ‘Gịnị ka m kwesịrị ime? M̀ kwesịrị ịga oriri a? M̀ kwesịrị ịrụ ọrụ a ma ọ bụ ịlụ onye a?’

Ndị mmadụ nwere ike iji obi ha niile gwa gị ka i nyere ha aka n’ihe ha chọrọ ikpebi, ya bụ, ihe ndị nwere ike ịgbasa mmekọrịta ha na ndị enyi ha, ndị ezinụlọ ha ma ọ bụdị nke ha na Jehova. Olee ebe ị ga-agbakwasị ụkwụ nye ha ndụmọdụ? Olee otú i si enye ndị mmadụ ndụmọdụ? Ma ihe a jụrụ mmadụ ò yiri obere ihe ma ọ bụ nnukwu ihe, Ilu 15:28 kwuru na “obi onye ezi omume na-atụgharị uche iji zaa okwu.” Ka anyị hụ otú ihe ise ndị a Baịbụl kwuru nwere ike isi nyere anyị aka mgbe anyị na-enye ndụmọdụ.

1 Ghọta Nsogbu Onye Ahụ.

“Mgbe onye ọ bụla na-aza okwu tupu ya anụ ya, ọ bụụrụ ya nzuzu na mmechuihu.”—ILU 18:13.

Ihe ga-eme ka anyị nye mmadụ ezigbo ndụmọdụ bụ ịghọta nsogbu onye ahụ na otú o si ele ya anya. Ka e were ya na mmadụ kpọrọ gị n’ekwe ntị, jụọ gị otú ọ ga-esi rute n’ụlọ gị, gịnị ka i kwesịrị ịma iji nyere ya aka? Ị̀ ga-enwe ike ịgwa ya ụzọ kacha mma ọ ga-esi ma ọ bụrụ na i bughị ụzọ mata ebe ọ nọ? Mbanụ! Ọ bụ otú ahụ ka inye ezigbo ndụmọdụ dị. I kwesịrị ibu ụzọ mata “ebe onye ahụ nọ,” ya bụ, nsogbu ya na otú o si ele ya anya. Ọ̀ ga-abụ na e nwere ọnọdụ pụrụ iche anyị kwesịrị ichebara echiche tupu anyị azaa ya? Ọ bụrụ na anyị amachaghị nsogbu onye ahụ, anyị nwere ike inye ndụmọdụ ga-eme ka onye ahụ ghara ịma ihe ọ ga-eme eme.—Luk 6:39.

Chọpụta ma Onye ahụ Ò Meela Nchọnchọ. O nwekwara ike ịdị mma ka ị jụọ onye chọrọ ka i nye ya ndụmọdụ ajụjụ ndị dị ka: “Olee ihe Baịbụl kwuru i chere gbasara okwu a?” “Gịnị ka i chere bụ́ uru na ọghọm dị n’ihe ndị ị chọrọ ikpebi ime?” “Olee nchọnchọ i merela?” “È nweela aro ndị okenye ọgbakọ, ndị mụrụ gị, onye na-amụrụ gị ihe ma ọ bụ ndị ọzọ tụụrụ gị?”

Ihe onye ahụ zara nwere ike inyere gị aka ịmata otú o sirila gbalịa inweta enyemaka. Anyị ga-ebukwa ihe ndị ọzọ gwarala ya n’obi mgbe anyị na-adụ ya ọdụ. Anyị nwekwara ike ịchọpụta ma onye ahụ ọ̀ na-achọ onye ga-agwa ya ihe ‘ga-atọ ya ụtọ ná ntị.’—2 Tim. 4:3.

  2 Enyela Ndụmọdụ Ngwa Ngwa.

“Onye ọ bụla aghaghị ịbụ onye na-anụ ihe ngwa ngwa, onye na-adịghị ekwu okwu ngwa ngwa.”—JEMS 1:19.

Anyị nwere ike ibu ezigbo ihe n’obi nye ndụmọdụ ngwa ngwa. Ma, ọ̀ ga-egosi na anyị ma ihe, nke ka nke, ma ọ bụrụ na anyị achọpụtabeghị ihe anyị kwesịrị ịchọpụta banyere okwu ahụ? Ilu 29:20 kwuru, sị: “Ị̀ hụla onye ọ na-adị ngwa ikwu okwu? Olileanya dịịrị onye nzuzu karịa ka ọ dịịrị ya.”

Wepụta oge chọpụta ma Baịbụl ọ̀ kwadoro ndụmọdụ ị chọrọ inye. Jụọ onwe gị, sị, ‘“Mmụọ nke ụwa” na otú ndị ụwa si eche echiche ò meela ka m na-eche echiche ka ndị ụwa?’ (1 Kọr. 2:12, 13) Cheta na ibu ezi ihe n’obi abụghị ebe okwu biri. Mgbe Pita onyeozi nụrụ banyere ihe siri ike Chineke chọrọ ka Jizọs mee, ọ dụrụ Jizọs ọdụ, sị: “Meere onwe gị ebere, Onyenwe anyị; ihe a agaghị eme gị ma ọlị.” Gịnị ka ihe a Pita mere na-akụziri anyị? Ọ na-akụziri anyị na ọ bụrụ na onye bu ezi ihe n’obi akpacharaghị anya, o nwere ike iche “ihe ndị na-abụghị echiche Chineke, kama nke mmadụ.” (Mat. 16:21-23) Ọ dị ezigbo mkpa ka anyị chee echiche tupu anyị ekwuo okwu! A sị ka e kwuwe, ò nwere ebe amamihe anyị ruru nke Chineke?—Job 38:1-4; Ilu 11:2.

3 Jiri Obi Umeala Mee Ihe Baịbụl Kwuru.

‘Adịghị m eme ihe ọ bụla n’uche nke aka m; kama m na-ekwu ihe ndị a dị nnọọ ka Nna m kụziiri m.”—JỌN 8:28.

Ị̀ ga-asị, “M bụrụ gị, ihe m ga-eme bụ . . .”? Ọ bụrụgodị na i chere na ị ma ihe ị ga-aza onye ahụ, i kwesịrị ịmụta ihe n’otú Jizọs si dị obi umeala. N’agbanyeghị na amamihe o nwere karịrị nke mmadụ ọ bụla, o kwuru, sị: “Ihe m kwuru esighị n’echiche m, kama ọ bụ Nna m . . . nyere m iwu ihe m ga-akọ na ihe m ga-ekwu.” (Jọn 12:49, 50) Ihe Jizọs kụziri na ndụmọdụ o nyere mgbe niile bụ ihe Nna ya chọrọ.

Dị ka ihe atụ, Luk 22:49 kwuru na ndị na-eso ụzọ Jizọs jụrụ ya ma hà kwesịrị ịlụ ọgụ mgbe a bịara ijide ya. Otu onye na-eso ụzọ ya ji mma agha gbupụ otu onye ntị. Ị ga-achọpụta na ebe ọzọ e dere akụkọ ahụ na Matiu 26:52-54 kwuru na Jizọs wepụtara oge kọwaara onye ahụ na-eso ụzọ ya ihe bụ́ uche Jehova n’agbanyeghị nsogbu Jizọs nọ na ya. Ebe ọ bụ na Jizọs ma ihe e kwuru na Jenesis 9:6 na amụma ndị dị n’Abụ Ọma nke 22 nakwa n’Aịzaya isi nke 53, o ji amamihe nye ndụmọdụ zọpụtara ndụ ndị mmadụ ma mee Jehova obi ụtọ.

  4 Jiri Ọ́bá Akwụkwọ E Ji Amụ Baịbụl Na-eme Nchọnchọ.

“Ònye n’ezie bụ ohu ahụ kwesịrị ntụkwasị obi, onye nwekwara uche, nke nna ya ukwu mere onye na-elekọta ezinụlọ ya, ka ọ na-enye ha nri ha n’oge kwesịrị ekwesị?”—MAT. 24:45.

Jizọs ahọpụtala ohu ọ tụkwasịrị obi nke ga na-enye ndị na-eso ụzọ ya nri ime mmụọ dị mkpa. Mgbe ị chọrọ inye ndụmọdụ banyere ihe ndị dị mkpa, ị̀ na-ewepụta oge eme nchọnchọ nke ọma n’akwụkwọ ndị ha bipụtara e ji amụ Baịbụl?

Watch Tower Publications Index na Watchtower Library * na-enyere anyị aka ịchọta isiokwu ọ bụla ngwa ngwa. Ọ gaghị adị mma ka anyị hapụ ihe ndị ahụ mgbe anyị na-enye ndụmọdụ! E dere isiokwu dị iche iche nakwa ọtụtụ ebe ga-enyere onye chọrọ ndụmọdụ aka. Ị̀ ma otú e si enyere ndị ọzọ aka ịtụle ihe Baịbụl kwuru ma tụgharịa uche na ya? Map nwere ike inyere mmadụ aka ịmata ebe ọ nọ na otú ọ ga-esi ruo ebe ọ na-aga. Otú ahụ ka ihe ndị e ji eme nchọnchọ nwere ike inyere mmadụ aka ịghọta ihe ọ na-eme, matakwa otú ọ ga-esi nọgide n’ụzọ ndụ.

Ọtụtụ ndị okenye akụzierela ndị nkwusa otú e si eji Index ma ọ bụ Watchtower Library achọta isiokwu dị iche iche. Ha na-esi otú ahụ enyere ụmụnna ha aka ịtụgharị uche n’Akwụkwọ Nsọ. Enyemaka ahụ na-eme ka ndị nkwusa nwee ike ikpebi ihe ha ga-eme ozugbo banyere ihe na-echu ha ụra, meekwa ka ha mụta otú e si achọta ihe n’akwụkwọ anyị nakwa ịtụkwasị ihe Jehova nyere anyị obi. Ha na-esi otú ahụ ‘azụ ikike nghọta ha azụ ịmata ihe dị iche n’ihe ziri ezi na ihe na-ezighị ezi.’—Hib. 5:14.

5 Ekpebirila Ndị Ọzọ Ihe Ha Ga-eme.

“Onye ọ bụla ga-ebu ibu nke ya.”—GAL. 6:5.

N’ikpeazụ, onye ọ bụla ga-eji aka ya kpebie ihe ọ ga-eme ma a dụchaa ya ọdụ. Jehova na-ahapụ anyị niile ka anyị jiri aka anyị kpebie ma ànyị ga-eme ihe o kwuru ma ọ bụ na anyị agaghị eme. (Diut. 30:19, 20) N’ụfọdụ nsogbu, o nwere ike ịdị mkpa ka a tụlee ihe dị iche iche Baịbụl kwuru. Mee elu mee ala, ọ bụ onye ahụ chọrọ ka e nye ya ndụmọdụ ga-ekpebi ihe ọ ga-eme. Mmadụ chọọ ka i nye ya ndụmọdụ, nsogbu ya ma ọ bụ afọ ole onye ahụ dị nwere ike ime ka anyị jụọ onwe anyị, sị, ‘Ọ̀ bụ m kwesịrị ịza onye a ajụjụ a?’ E nwere okwu ụfọdụ ọ ga-akacha mma ka e wegara ndị okenye ọgbakọ ma ọ bụkwanụ ndị mụrụ onye ahụ, ma ọ bụrụ onye na-eto eto.

[Ihe e dere n’ala ala peeji]

[Igbe/Foto dị na peeji nke 8]

Ihe E Nwere Ike Ime n’Ofufe Ezinụlọ

Ọ́ gaghị adị mma ka i mee nchọnchọ iji chọta azịza nke ajụjụ ndị a jụrụ gị n’oge na-adịbeghị anya ma tụlee ha n’Ofufe Ezinụlọ unu? Olee ụfọdụ isiokwu na ihe ụfọdụ Baịbụl kwuru i nwere ike ịchọta, bụ́ ndị nwere ike inyere onye jụrụ ụdị ajụjụ ahụ aka? Dị ka ihe atụ, ka e were ya na nwanna jụrụ gị ihe i chere banyere onye ọ chọrọ ịlụ? Mgbe ị na-achọ ihe n’Index ma ọ bụ na Watchtower Library, chọọ okwu kacha gbasa ihe ị na-achọ. Dị ka ihe atụ, i nwere ike ịchọ okwu bụ́ “Alụmdi na Nwunye.” Ihe ị ga-achọzi bụ isiokwu nta ndị gbasara isiokwu ahụ. Mgbe ị na-agụ otu isiokwu, lee ma è nwere ebe e dere isiokwu ọzọ nke ga-aka enyere gị aka.

[Igbe dị na peeji nke 9]

N’ihi ihe ndị Jehova jirila nzukọ ya nye anyị, anyị nwere ike inye ndị ọzọ ndụmọdụ kacha mma, nwetakwa ụdị ndụmọdụ ahụ. Ekliziastis 12:11 kwuru, sị: “Okwu ndị maara ihe dị ka ndụdụ e ji achị ehi, ndị na-emikpu onwe ha n’ịchịkọta ahịrịokwu dị iche iche dịkwa ka ntu a kụmiri akụmi; o si n’aka otu onye ọzụzụ atụrụ.” Otú ahụ e si eji “ndụdụ” achị ehi, ezi ndụmọdụ e ji ịhụnanya nye ndị nwere ezi obi na-enyere ha aka ime ihe ziri ezi. “Ntu a kụmiri akụmi” na-eme ka ihe sie ike. Ọ bụ otú ahụ ka inye mmadụ ezigbo ndụmọdụ nwere ike ịrụpụta ihe bara ezigbo uru. Ndị maara ihe “na-emikpu onwe ha n’ịchịkọta ahịrịokwu dị iche iche” ndị na-egosi amamihe “onye ọzụzụ atụrụ” bụ́ Jehova.

Ṅomie Onye Ọzụzụ Atụrụ ahụ mgbe ị na-enye ndụmọdụ. Ọ bụ ezigbo ihe ùgwù ige ntị nke ọma ma nye mmadụ ndụmọdụ nwere ike ịbara ya uru! Iji ihe Baịbụl kwuru enye ndụmọdụ ga-eme ka anyị na-enye ezigbo ndụmọdụ, nke nwere ike ime ka onye gere anyị ntị nweta ndụ ebighị ebi.