1. Olee otú okwukwe dịruru ná mkpa? (Lee ihe e sere ná mmalite isiokwu a.)

Ị̀ JỤTỤLA onwe gị, sị, ‘Àbụ m ụdị onye Jehova ga-achọ ichebe n’oké mkpagbu ma mee ka ọ banye n’ụwa ọhụrụ?’ N’eziokwu, e nwere ọtụtụ ihe anyị ga-eme ka Jehova chebe anyị. Ma, Pọl onyeozi kwuru otu ihe dị́ ezigbo mkpa. Ọ sịrị: ‘Ọ bụrụ na okwukwe adịghị, ọ gaghị ekwe omume ime ihe dị Chineke ezi mma.’ (Hib. 11:6) O nwere ike iyi ihe dị́ mfe, ma nke bụ́ eziokwu bụ na “ọ bụghị mmadụ niile nwere okwukwe.” (2 Tesa. 3:2) Amaokwu Baịbụl abụọ a na-enyere anyị aka ịghọta na inwe okwukwe siri ike dị ezigbo mkpa.

2, 3. (a) Gịnị ka anyị na-amụta n’ihe Pita kwuru banyere otú okwukwe si dị́ mkpa? (b) Olee ajụjụ ndị anyị ga-atụle n’isiokwu a?

² Ihe Pita onyeozi kwuru gosiri na okwukwe dị mkpa. O kwuru banyere okwukwe “a nwalere anwale,” nke ga-abụ “ihe na-eweta otuto na ebube na nsọpụrụ mgbe a ga-ekpughe Jizọs Kraịst.” (Gụọ 1 Pita 1:7.) Ebe oké mkpagbu na-abịa n’ike n’ike, anyị kwesịrị ịchọpụta ma ànyị nwere ụdị okwukwe ga-eme ka anyị soro ná ndị Eze anyị dị́ ebube ga-echebe mgbe ọ ga-abịa ibibi ụwa ochie a. O doro anya na anyị chọrọ ịbụ “ndị nwere okwukwe ka e wee chebe mkpụrụ obi ha ndụ.” (Hib. 10:39) N’ihi ya, ka anyị rịọ Chineke ihe otu nwoke rịọrọ Jizọs, ya bụ, “Nyere m aka n’ebe okwukwe dị m mkpa!” (Mak 9:24) Ma  ọ bụkwanụ, anyị arịọ ihe ndịozi Jizọs rịọrọ. Ha sịrị: “Nyekwuo anyị okwukwe.”—Luk 17:5.

³ N’ihi otú inwekwu okwukwe si dị́ mkpa, ajụjụ ndị anyị ga-atụle n’isiokwu a bụ: Olee otú anyị ga-esi nwekwuo okwukwe? Olee otú anyị ga-esi gosi na anyị nwere okwukwe? Gịnị mere obi kwesịrị iji sie anyị ike na Chineke ga-aza ekpere anyị na-ekpe ka o nyekwuo anyị okwukwe?

4. Olee ndị akụkọ banyere ha nwere ike ime ka anyị mee ka okwukwe anyị sie ike?

⁴ Baịbụl kwuru, sị: “Ihe niile e dere n’oge gara aga, e dere ha iji nye anyị ntụziaka.” N’ihi ya, anyị ga-amụta ezigbo ihe n’ihe Baịbụl kọrọ banyere ọtụtụ ndị nwere okwukwe n’oge ochie. (Rom 15:4) Anyị gụọ banyere Ebreham, Sera, Aịzik, Jekọb, Mozis, Rehab, Gidiọn, Berak, na ọtụtụ ndị ọzọ, o nwere ike ime ka anyị chebara okwukwe anyị echiche. (Hib. 11:32-35) Anyị gụọkwa banyere ụmụnna ndị nwere okwukwe pụrụ iche n’oge anyị a, o nwere ike ime ka anyị na-agba mbọ ka okwukwe anyị sie ike. *

5. Olee otú Ịlaịja si gosi na o nwere okwukwe siri ike n’ebe Jehova nọ? Gịnị ka ihe o mere kwesịrị ime ka anyị chebara echiche?

⁵ Otu n’ime ndị Baịbụl kọrọ akụkọ ha bụ Ịlaịja onye amụma. Ka ị na-atụgharị uche n’akụkọ a, cheta ihe ise o mere iji gosi na ọ tụkwasịrị Jehova obi. Nke mbụ bụ na mgbe ọ gwara Eze Ehab na Jehova ga-eme ka ọkọchị kọọ, o ji obi ike sị ya: “Dị nnọọ ka Jehova . . . dị ndụ, . . . igirigi agaghị ada, mmiri agaghịkwa ezo . . . ọ gwụla ma m̀ kwuru ka o mee!” (1 Eze 17:1) Nke abụọ bụ na Ịlaịja kwetara na Jehova ga na-egboro ya na ndị ọzọ mkpa ha n’oge ahụ mmiri na-agaghị ezo. (1 Eze 17:4, 5, 13, 14) Nke atọ bụ na obi siri ya ike na Jehova ga-akpọlite nwa otu nwaanyị di ya nwụrụ n’ọnwụ. (1 Eze 17:21) Nke anọ bụ na o meghị ya obi abụọ na Jehova ga-eme ka ọkụ si n’eluigwe repịa àjà ya n’Ugwu Kamel. (1 Eze 18:24, 37) Nke ise bụ na tupu mmiri ezoo, Ịlaịja ji obi ike sị Ehab: “Lawa, rie ihe, ṅụọkwa ihe ọṅụṅụ; n’ihi na ụda nke mkpọtụ oké mmiri ozuzo na-ada.” (1 Eze 18:41) Ụdị akụkọ ahụ ọ́ naghị eme ka anyị chebara onwe anyị echiche iji mata ma okwukwe anyị ò sikwara ike?

6. Gịnị ka Jehova ga-enye anyị iji mee ka okwukwe anyị sie ike?

⁶ Ebe ọ bụ na anyị agaghị enweli okwukwe n’ike nke aka anyị, anyị kwesịrị ịrịọ Chineke ka o nye anyị mmụọ nsọ ya. N’ihi gịnị? N’ihi na okwukwe so ná mkpụrụ nke mmụọ nsọ ya. (Gal. 5:22) Anyị kwesịrị ịna-arịọ ka Chineke nyekwuo anyị mmụọ nsọ otú ahụ Jizọs sịrị ka anyị na-eme. O kwere anyị nkwa na Jehova ‘ga-enye ndị na-arịọ ya mmụọ nsọ.’—Luk 11:13.

7. Nye ihe atụ gosiri otú anyị ga-esi mee ka okwukwe anyị na-esikwu ike.

⁷ Anyị nwehaala okwukwe, anyị kwesịrị ịna-eme ka ọ na-esikwu ike. E nwere ike iji okwukwe tụnyere ọkụ. É jiri nkụ kwanye ọkụ, o nwere ike inwusiwe ike. Ma, á kwụsị itinyekwu ya nkụ, ọ ga-emecha nyụọ kpamkpam. Ma, á na-etinyekwu ya nkụ, ọ ga na-enwu n’anyụghị anyụ. Ọ bụ otú ahụ ka okwukwe anyị dị. Ọ bụrụ na anyị ana-agụ ma na-amụ Okwu Chineke kwa ụbọchị, anyị ga-ahụkwu Jehova n’anya, jirikwa Baịbụl kpọrọ ihe. Okwukwe anyị agaghị anyụ ka ọkụ, kama ọ ga na-esikwu ike.

8. Olee ihe ga-enyere anyị aka ka okwukwe anyị sikwuo ike?

 ⁸ Olee ihe ọzọ ị ga-eme ka okwukwe gị sikwuo ike? Echela na naanị ihe ndị ahụ ị mụtara tupu e mee gị baptizim ezuola. (Hib. 6:1, 2) Dị ka ihe atụ, ịmụ banyere amụma Baịbụl ndị mezurula ga-eme ka okwukwe gị na-esikwu ike. I nwekwara ike iji ihe Baịbụl kwuru chọpụta ma okwukwe gị ọ̀ dị ka nke ndị ahụ Baịbụl kwuru na okwukwe ha siri ike.—Gụọ Jems 1:25; 2:24, 26.

9, 10. Olee otú ihe ndị a si eme ka okwukwe anyị sie ike: (a) ezigbo ndị enyi? (b) ọmụmụ ihe? (ch) ozi ọma?

⁹ Pọl onyeozi gwara ụmụnna ya ka ha ‘na-agbarịta ibe ha ume, onye ọ bụla site n’okwukwe nke ibe ya.’ (Rom 1:12) Ka anyị na ụmụnna anyị na-akpakọrịta, anyị ga na-eme ka okwukwe ibe anyị na-esi ike, karịchaa ma ọ bụrụ na ndị anyị na ha na-anọrị bụ ndị ‘a nwalerela’ okwukwe ha. (Jems 1:3) Mkpakọrịta ọjọọ na-eme ka okwukwe ghara isi ike, ma ezigbo ndị enyi na-eme ka okwukwe anyị na-esikwu ike. (1 Kọr. 15:33) Ọ bụ ya mere e ji dụọ anyị ọdụ ka anyị ghara ‘ịna-ahapụ nzukọ anyị,’ kama ka anyị “na-agbarịta ibe anyị ume.” (Gụọ Ndị Hibru 10:24, 25.) Ihe ọzọ bụ na ihe ndị anyị na-amụ n’ọmụmụ ihe na-emekwa ka okwukwe anyị sie ike. Ọ dabara adaba n’ihi na Pọl onyeozi kwuru, sị: “A na-esi n’ihe a nụrụ enwe okwukwe.” (Rom 10:17) N’ihi ya, jụọ onwe gị, sị: ‘M̀ na-agbalịsi ike ka m na-agachi ọmụmụ ihe anya?’

¹⁰ Mgbe anyị na-ekwusa ozi ọma, anyị na-emekwa ka okwukwe anyị na nke ndị ọzọ sie ike. Dị ka Ndị Kraịst oge ochie, anyị na-amụta inwe okwukwe siri ike n’ebe Jehova nọ, jirikwa obi ike na-ekwusa ozi ọma n’agbanyeghị nsogbu ọ bụla.—Ọrụ 4:17-20; 13:46.

11. Gịnị mere Keleb na Jọshụa ji nwee okwukwe siri ike? Olee otú anyị ga-esi mee ka ha?

¹¹ Okwukwe anyị ga na-esikwu ike ma anyị hụ otú Jehova si na-enyere anyị aka nakwa otú o si na-aza ekpere anyị. Ụdị ihe a mere ka okwukwe Keleb na Jọshụa sie ike. Ha gosiri na ha nwere okwukwe n’ebe Jehova nọ mgbe ha gara ledo Ala Nkwa ahụ. Ka oge na-aga, okwukwe ha sikwuru ike ka ha na-ahụ otú Jehova si na-enyere ha aka. Ka a sịkwa ihe mere obi ji sie Jọshụa ike, ya asị ndị Izrel: “Ọ dịghị otu ihe n’ime ihe ọma niile Jehova bụ́ Chineke unu gwara unu nke na-emezughị.” O mechara kwuokwa, sị: “Tụọnụ egwu Jehova, feekwanụ ya n’ụzọ na-enweghị ntụpọ nakwa n’eziokwu . . . Ma mụ onwe m na ezinụlọ m, anyị ga-efe Jehova.” (Jọsh. 23:14; 24:14, 15) Ọ bụrụ na anyị ahụ ihe gosiri na Jehova dị mma, obi ga-esikwa anyị ike otú ahụ.—Ọma 34:8.

¹² Olee otú anyị ga-esi gosi na anyị nwere okwukwe siri ike? Jems, bụ́ onye na-eso ụzọ Jizọs, zara ajụjụ a. Ọ sịrị: “M ga-egosikwa gị okwukwe m site n’ọrụ m.” (Jems 2:18) Omume anyị ga-egosi na okwukwe anyị bụ nke ezigbo ya. Ka anyị leba anya n’ihe atụ ụfọdụ.

13. Gịnị mere ikwusa ozi ọma ji egosi na anyị nwere okwukwe?

¹³ Ikwusa ozi ọma bụ ụzọ magburu onwe ya anyị ga-esi gosi na anyị nwere okwukwe. N’ihi gịnị? N’ihi na ikwusa ozi ọma na-egosi na anyị kwetara na Chineke ga-ebibi ụwa ochie a n’oge na-adịghị anya nakwa na “ọ gaghị anọ ọdụ.” (Hab. 2:3) Ọ bụrụ na anyị chọrọ ịma ma okwukwe anyị ò sikwara ike, anyị nwere ike ịjụ onwe anyị, sị: ‘Ikwusa ozi ọma ọ̀ dị m  ezigbo mkpa? M̀ na-agbalịsi ike ịgwa ndị ọzọ banyere Chineke? M̀ na-achọ ụzọ dị́ iche iche m ga-esi jekwuoro Jehova ozi?’ (2 Kọr. 13:5) N’eziokwu, otú anyị ga-esi egosi na okwukwe anyị siri ike bụ ‘ịna-eme nkwupụta ihu ọha maka nzọpụta,’ ya bụ, ịna-ekwusa ozi ọma.—Gụọ Ndị Rom 10:10.

¹⁴ Anyị nwekwara ike igosi na anyị nwere okwukwe siri ike n’ebe Jehova nọ ka anyị na-edi nsogbu ndị na-abịara anyị kwa ụbọchị. Ma ànyị na-arịa ọrịa, ma ànyị dara ogbenye, ma ànyị dara mbà ma ọ bụ na nsogbu ọzọ bịaara anyị, obi kwesịrị isi anyị ike na Jehova na Jizọs ga-enyere anyị aka “n’oge kwesịrị ekwesị.” (Hib. 4:16) Otú anyị ga-esi egosi na anyị nwere ụdị obi ike ahụ bụ ịna-ekpe ekpere ka Jehova nyere anyị aka. Jizọs gwara anyị ka anyị na-arịọ Jehova ka o “nye anyị nri anyị ga-eri taa dị ka ihe ga-ezuru anyị taa si dị.” (Luk 11:3) Ihe ndị a kọrọ na Baịbụl na-eme ka obi sie anyị ike na Jehova ga na-egboro anyị mkpa anyị. Dị ka ihe atụ, mgbe e nwere oké ọkọchị n’Izrel, Jehova nọ na-enye Ịlaịja nri na mmiri. Baịbụl kwuru, sị: “Ugoloọma na-ewetakwara ya achịcha na anụ n’ụtụtụ nakwa achịcha na anụ n’anyasị, ọ nọkwa na-aṅụ mmiri si n’iyi ndagwurugwu ahụ.” (1 Eze 17:3-6) Anyị nwere okwukwe na Jehova ga na-egbokwara anyị mkpa anyị.

14, 15. (a) Olee otú anyị ga-esi gosi na anyị nwere okwukwe? (b) Kọọ akụkọ mere eme nke gosiri na mmadụ nwere okwukwe siri ike.

¹⁵ Obi siri anyị ike na anyị mee ihe Baịbụl kwuru, anyị ga-enwe ike ịna-egboro ndị ezinụlọ anyị mkpa ha. Otu nwanna nwaanyị bí n’Eshia kọwara otú ya na di ya na ụmụ ya si mee ihe e kwuru na Matiu 6:33 na Ilu 10:4, ya bụ, ibu ụzọ na-achọ Alaeze Chineke nakwa ịna-arụsi ọrụ ike. O kwuru na di ya chọpụtara na ọrụ ya nwere ike ime ka ya na Jehova ghara ịdị ná mma. N’ihi ya, ọ gbara arụkwaghịm. Ma, ha nwere ụmụ anọ ha na-elekọta. Ọ bụ ya mere ha ji malite ire nri. Otú ha si na-arụsi ọrụ ike mere ka ha na-akpata ego ha ji na-egbo mkpa ezinụlọ ha. Nwanna nwaanyị ahụ sịrị: “Anyị ghọtara na Jehova  ahapụghị anyị. O nweghị mgbe anyị na-ahụghị ihe anyị ga-eri.” È nwetụla mgbe i mere ihe gosiri na obi siri gị ike na ime ihe Baịbụl kwuru na-abara ndị mmadụ ezigbo uru n’oge anyị a?

16. Gịnị ga-eme ma anyị tụkwasị Chineke obi?

¹⁶ O kwesịghị ịna-eme anyị obi abụọ ma Chineke ọ̀ ga-enyere anyị aka ma anyị mee ihe o kwuru. Mgbe Pọl onyeozi na-ekwughachi ihe Habakọk onye amụma kwuru, ọ sịrị: “Onye ezi omume ga-adị ndụ n’ihi okwukwe ya.” (Gal. 3:11; Hab. 2:4) N’ihi ya, anyị kwesịrị inwe okwukwe siri ezigbo ike n’ebe Chineke nọ n’ihi na ọ bụ ya ga-enyere anyị aka n’eziokwu. Pọl chetaara anyị na Chineke bụ “onye ahụ nke pụrụ ime ihe nke ukwuu karịa ihe niile anyị na-arịọ ma ọ bụ na-eche n’echiche dị ka ike ya nke na-arụ ọrụ n’ime anyị si dị.” (Efe. 3:20) Ndị ohu Jehova na-agbalịsi ike ime ihe dị́ Chineke mma, ma ha makwa na e nwere ihe ndị ha na-agaghị emeli. N’ihi ya, ha na-atụkwasị Jehova obi na ọ ga-agọzi mbọ ha na-agba. Obi ọ́ naghị atọ anyị ụtọ na Chineke nọnyeere anyị?

17. (a) Olee otú e si meere ndịozi Jizọs ihe ha rịọrọ? (b) Gịnị mere anyị ga-eji na-atụ anya na Jehova ga-aza ekpere anyị na-ekpe ka o nyekwuo anyị okwukwe?

¹⁷ Ugbu a anyị tụlechara ihe ndị a, o nwere ike ịdị anyị otú ahụ ọ dị ndịozi Jizọs mgbe ha rịọrọ ya, sị: “Nyekwuo anyị okwukwe.” (Luk 17:5) Mgbe e meere ha ihe a ha rịọrọ bụ na Pentikọst nke afọ 33 mgbe e nyere ha mmụọ nsọ, ha aghọtakwuo nzube Chineke. O mere ka okwukwe ha sikwuo ike. N’ihi ya, ha malitere ikwusa ozi ọma otú a na-ekwusatụbeghị ya n’oge ahụ. (Kọl. 1:23) Ànyị kwesịrị ịna-atụ anya na a ga-aza ekpere anyị na-ekpe ka e nyekwuo anyị okwukwe? Baịbụl mere ka obi sie anyị ike na Chineke ga-emere anyị “ihe ọ bụla nke anyị rịọrọ ya dị ka uche ya si dị.”—1 Jọn 5:14.

18. Olee otú Jehova si agọzi ndị na-agba mbọ ka okwukwe ha sie ike?

¹⁸ O doro anya na obi na-atọ Jehova ụtọ ma anyị tụkwasị ya obi anyị niile. Ọ ga-enyekwu anyị okwukwe otú anyị na-arịọ ya. Okwukwe anyị ga-esikwu ike, nke ga-eme ka ‘a gụọ anyị ná ndị ruru eru inweta alaeze Chineke.’—2 Tesa. 1:3, 5.