Ị̀ Ma Onye Nna Gị nke Bi n’Eluigwe Bụ?

Ị̀ MA nna gị nke ọma? O nwere otú ajụjụ a ga-ada gị ná ntị ma ọ bụrụ na i tolitere n’ezinụlọ hụrụ onwe ha n’anya. I nwere ike ịza, ‘Eenụ, ama m ya nke ọma!’ N’eziokwu, ọtụtụ ndị ma ihe na-adị nna ha mma na ihe na-anaghị adị ya mma, marakwa ihe ọ ga-eme ma ihe ụfọdụ mee, nakwa otú o si elekọta ezinụlọ ya.

Ma, ọ ga-abụ na o nweela oge ụfọdụ nna gị mere ihe ọ na-enweghị mgbe ị tụrụ anya na ọ ga-eme. Dị ka ihe atụ, ihe nwata nwere ike ịma bụ na nna ya dị nwayọọ, ruo mgbe otu ihe mere. Ya ahụzie ka nna ya na-akpa ike iji hụ na o nweghị ihe mere ezinụlọ ya.

Olee maka Onye kere anyị? A gwara anyị banyere ya, sị: “Ọ bụ ya nyere anyị ndụ, meekwa ka anyị na-ejegharị, na-adị ndụ.” (Ọrụ 17:28) Ọ bụ Chineke kere anyị; ọ bụ ya mere o ji bụrụ Nna nke ndị niile dị ndụ. (Aịzaya 64:8) Ọ dị mma ma ọ bụrụ otú ahụ ka i si ele Chineke anya, n’ihi na ọ bụ otú ahụ ka anyị kwesịrị isi na-ele ya anya. Ma, a ka nwere ọtụtụ ihe ga-atọ anyị ụtọ ma baara anyị uru anyị ga-amata ma chọpụta banyere ya.

Ọ bụ otú ị maruru nna mụrụ gị na-ekpebi otú i si ele ya anya ma na-akwanyere ya ùgwù. Ọ bụ otú ahụ ka ọ dị n’ebe Chineke nọ, ọ bụrụ na ị mara ya nke ọma, gị na ya ga-adị ná mma karị. Chineke ga-enyere gị aka idi ọnwụnwa na nsogbu ndị na-abịara gị ná ndụ ma ọ bụrụ na ị mara ya nke ọma ma mụta ime uche ya.

Olee ụdị onye Chineke bụ? Olee otú àgwà ya kwesịrị isi metụta otú i si ele ya anya? Ò nwere ihe ịmara onye Chineke bụ ga-achọ n’aka gị? Ị ga-ahụ azịza ajụjụ ndị a n’isiokwu na-esonụ.

[Ihe odide gbatụrụ okpotokpo dị na peeji nke 3]

Ọ bụ otú ị maruru ndị ọzọ na-ekpebi otú i si ele ha anya