Bịaruo Chineke Nso

Onye Okike nke Anyị Kwesịrị Inye Otuto

Mkpughe 4:11

Ò NWETỤLA mgbe ị jụrụ, sị, ‘Olee ihe mere mmadụ ji dịrị ndụ?’ Ndị kweere na anyị pụtara n’onwe anyị, n’enweghị onye okike nwere ọgụgụ isi kere anyị, anaghị achọtali azịza ajụjụ a. Ma, ọ bụghị otú ahụ ka ọ dị ndị kweere eziokwu doro anya bụ́ na Jehova Chineke bụ Isi Iyi nke ndụ. (Abụ Ọma 36:9) Ha ma na o nwere ihe mere o ji kee anyị. A kọwara ihe mere o ji kee anyị ná Mkpughe 4:11. Ka anyị hụ otú ihe ahụ Jọn onyeozi dere si kọwaa ihe mere anyị ji dịrị ndụ.

Jọn dere na ndị mmụọ ozi bụkuru Chineke abụ otuto, sị: “I kwesịrị ekwesị, Jehova, bụ́ Chineke anyị, ịnata otuto na nsọpụrụ na ike, n’ihi na ọ bụ gị kere ihe niile, ọ bụkwa n’ihi uche gị ka ha ji dịrị, ọ bụkwa ya mere e ji kee ha.” Ọ bụ naanị Jehova ka anyị kwesịrị ịkwanyere ụdị ùgwù a. N’ihi gịnị? N’ihi na ọ bụ ya “kere ihe niile.” Ma, olee ihe ndị o kere eke nwere ọgụgụ isi kwesịrị ime?

E kwuru na Jehova kwesịrị “ịnata” otuto, nsọpụrụ, na ike. O doro anya na ọ bụ ya bụ Onye kacha dị ebube, onye kacha nwee ùgwù na onye kacha dị ike n’eluigwe na ala. Ma, ọtụtụ mmadụ ekwetaghị n’ezie na ọ bụ ya kere ihe niile. N’agbanyeghị nke ahụ, e nwere ndị na-esi n’ihe e kere eke na-ahụ “àgwà [Chineke] ndị a na-apụghị ịhụ anya,” na-ahụ ha nke ọma. (Ndị Rom 1:20) Ebe ọ bụ na obi ha juru n’ekele, ha na-enye Jehova otuto na nsọpụrụ. Ha na-akpọsara ndị niile nwere mmasị ihe ndị magburu onwe ha na-egosi na ọ bụ Jehova kere ihe niile, kee ha ha amaa mma. Ha na-akpọsakwara ha na ọ bụ ya ka anyị kwesịrị ịkwanyere ùgwù.—Abụ Ọma 19:1, 2; 139:14.

Ma, olee otú Jehova si anata ike n’aka ndị na-efe ya? N’eziokwu, ọ dịghị ihe e kere eke ma ọ bụ onye e kere eke ga-enyeli Onye okike pụrụ ime ihe niile ike. (Aịzaya 40:25, 26) Ma, ebe ọ bụ na e kere anyị n’onyinyo Chineke, anyị ketara àgwà Chineke ụfọdụ, nke otu n’ime ha bụ ike. (Jenesis 1:27) Ọ bụrụ na ihe Onye kere anyị meere anyị masịrị anyị n’ezie, anyị ga-eji ike anyị na ume anyị na-asọpụrụ ya ma na-enye ya otuto. Kama iji ike anyị na-egbo naanị mkpa anyị, anyị na-egosi na ọ bụ Jehova bụ́ Chineke kwesịrị ịnata ike anyị niile mgbe anyị na-ejere ya ozi.—Mak 12:30.

Ma, olee ihe mere anyị ji dịrị ndụ? Okwu mmechi e kwuru ná Mkpughe 4:11 zara, sị: “Ọ bụkwa n’ihi uche gị ka ha [ya bụ, ihe niile e kere eke] ji dịrị, ọ bụkwa ya mere e ji kee ha.” Ọ bụghị ọchịchọ anyị mere anyị ji pụta ụwa. Anyị dị ndụ maka na ọ bụ uche Chineke. Ọ bụ ya mere onye na-achọ naanị ọdịmma onwe ya ná ndụ na-anaghị enwe obi ụtọ, ndụ ya anaghịkwa enwe isi. Tupu obi eruo anyị ala, anyị enweekwa ọṅụ, afọ ojuju na obi ụtọ, anyị ga-amụta ihe bụ́ uche Chineke ma na-ebi ndụ otú ọ chọrọ. Ọ bụ naanị mgbe ahụ ka anyị ga-egosi na anyị ma ihe mere e ji kee anyị na ihe mere anyị ji dịrị ndụ.—Abụ Ọma 40:8.

[Ebe E Si Nweta Foto dị na peeji nke 31]

NASA, ESA, na A. Nota (STScI)